રેલ મુસાફરો માટે ખુશખબર: સ્ટેશનો પર ભારે સામાન ઊંચકીને ફરવાની ઝંઝટ ખતમ, શરૂ થઈ ડિજિટલ લગેજ લોકર સુવિધા
ટ્રેનની રાહ જોતી વખતે કે શહેર ફરવા જવા માટે હવે રેલવે સ્ટેશન પર ભારે સામાન સાથે રાખવાની જરૂર નથી. ઉત્તર રેલવેએ નવી દિલ્હી અને હઝરત નિઝામુદ્દીન સ્ટેશન પર 24 કલાક કાર્યરત ડિજિટલ લગેજ લોકર સિસ્ટમ શરૂ કરી છે. માત્ર મોબાઈલ નંબર અને OTP ની મદદથી આ સુવિધાનો લાભ કેવી રીતે મેળવવો?
રેલવે મુસાફરો માટે રાહતના મોટા સમાચાર સામે આવ્યા છે. હવે મુસાફરોએ રેલવે સ્ટેશનો પર ભારે-ભરખમ સામાન લઈને ફરવું નહીં પડે. દિલ્હીના બે મોટા સ્ટેશનો પર ડિજિટલ લગેજ લોકરની અદ્યતન સુવિધા શરૂ કરી દેવામાં આવી છે, જ્યારે અન્ય બે મુખ્ય સ્ટેશનો પર પણ ટૂંક સમયમાં તેનો પ્રારંભ કરવામાં આવશે.
ટ્રેનની લાંબી રાહ જોતી વખતે સામાન સાચવવાની ચિંતામાંથી મુક્તિ આપવા માટે ઉત્તર રેલવેના દિલ્હી ડિવિઝને નવી દિલ્હી અને હઝરત નિઝામુદ્દીન સહિત 4 પ્રમુખ સ્ટેશનો પર ડિજિટલ લગેજ લોકરની સુવિધા ઉપલબ્ધ કરાવી છે. નવી દિલ્હી અને નિઝામુદ્દીન ખાતે આ સેવા કાર્યરત થઈ ચૂકી છે,
જ્યારે દિલ્હી જંક્શન (જૂની દિલ્હી) અને આનંદ વિહાર ટર્મિનલ ખાતે પણ તેને ટૂંક સમયમાં શરૂ કરવામાં આવશે. આ સુવિધા ખાસ કરીને એવા પ્રવાસીઓ માટે વરદાનરૂપ સાબિત થશે જેમને કનેક્ટિંગ ટ્રેન માટે કલાકો સુધી રાહ જોવાની હોય છે અથવા જેઓ સામાન સ્ટેશને મૂકીને દિલ્હી શહેર ફરવા જવા માંગતા હોય છે.
આ રીતે બુક કરી શકાશે લોકર: લોકર બુક કરવા માટે મુસાફરે સૌથી પહેલાં કિયોસ્ક મશીન પર પોતાનો મોબાઈલ નંબર નાખી OTP વેરિફાય કરવો પડશે. ત્યારબાદ સામાન મુજબ લોકરની સાઈઝ અને કેટલા સમય માટે લોકર રાખવું છે તેની પસંદગી કરવાની રહેશે. સમય અને સાઈઝ નક્કી કર્યા બાદ Google Pay, Paytm, PhonePe જેવા કોઈપણ ડિજિટલ માધ્યમથી ચૂકવણી કરવાની રહેશે. પેમેન્ટ થતાં જ લોકર ખૂલી જશે.
સામાન પાછો મેળવવાની સરળ રીત: સામાન પાછો લેવા માટે લોકર મશીન પર ફરીથી પોતાનો મોબાઈલ નંબર દાખલ કરવાનો રહેશે. OTP વેરિફિકેશન પૂર્ણ થયા બાદ સ્ક્રીન પર દેખાતા 'Release' વિકલ્પ પર ક્લિક કરતાં જ લોકર ઓટોમેટિક અનલોક થઈ જશે અને મુસાફર પોતાનો સામાન બહાર કાઢી શકશે.
કયા પ્લેટફોર્મ પર ઉપલબ્ધ છે લોકર? નવી દિલ્હી રેલવે સ્ટેશન: પ્લેટફોર્મ નંબર 16 પાસે આવેલા મેઇન હોલમાં ડિજિટલ ડિસ્પ્લે બોર્ડની નીચે આ લોકર ગોઠવવામાં આવ્યા છે. હઝરત નિઝામુદ્દીન રેલવે સ્ટેશન: મુખ્ય એન્ટ્રી ગેટ પાસે સીડીઓની બાજુમાં આ લોકરની સુવિધા સ્થાપિત કરાઈ છે. આ બંને સ્ટેશનો પર આ ડિજિટલ લોકર સિસ્ટમ મુસાફરો માટે 24 કલાક અને સાતેય દિવસ (24X7) ઉપલબ્ધ રહેશે.
પહેલાં જ્યારે મુસાફરો કનેક્ટિંગ ટ્રેનની રાહ જોતા હોય કે થોડા કલાકો માટે શહેર ફરવા નીકળવું હોય, ત્યારે સ્ટેશન પર ભારે-ભરખમ સામાન સાચવવા માટે ક્લોકરૂમની લાંબી લાઈનો, કાગળી કાર્યવાહી અને ચોરીના ડર વચ્ચે ભારે હેરાન-પરેશાન થવું પડતું હતું અને ઘણીવાર સામાનના ભાર હેઠળ બહાર જવાનો પ્લાન જ માંડી વાળવો પડતો હતો; પરંતુ હવે દિલ્હીમાં શરૂ થયેલી આધુનિક 24X7 ડિજિટલ લગેજ લોકર ટેક્નોલોજી આવ્યા પછી મુસાફરોને સામાનની રજમાત્ર પણ ચિંતા કરવી નહીં પડે, કારણ કે માત્ર એક મોબાઈલ નંબર અને OTP વેરિફિકેશનથી મિનિટોમાં સામાન સુરક્ષિત લોકરમાં મૂકીને પ્રવાસીઓ કોઈપણ ઝંઝટ વગર ખુલ્લા હાથે શહેરમાં હરી-ફરી શકશે.
