Yuvraj Singh Birthday : યુવરાજ સિંહને મળી ગળું કાપવાની ધમકી, પછી ફટકારી 6 બોલમાં 6 સિક્સર, વર્લ્ડ રેકોર્ડ પાછળની વાસ્તવિક કહાની
2007 T20 વર્લ્ડ કપમાં યુવરાજ સિંહે 6 બોલમાં 6 સિક્સર ફટકારીને ઈતિહાસ રચ્યો હતો. યુવરાજનું આ પરાક્રમ આજે પણ દરેક ક્રિકેટ પ્રેમીને યાદ છે. આ મેચમાં યુવરાજે T20 ઈતિહાસમાં સૌથી ઝડપી ફિફ્ટી ફટકારી હતી, જે હજુ પણ એક રેકોર્ડ છે. 6 બોલમાં 6 સિક્સર પાછળની કહાની છે ખૂબ જ મજેદાર, જાણો આ આર્ટિકલમાં.
T20 વર્લ્ડ કપ 2007ની આ 21મી મેચ હતી. આ મેચમાં યુવરાજે ભારતીય ઈનિંગની 19મી ઓવરમાં 6 બોલમાં 6 સિક્સર ફટકારી હતી. પરંતુ યુવરાજ આ પરાક્રમ વિશે વિચારીને મેદાનમાં આવ્યો ન હતો. વાસ્તવમાં, ઈનિંગની 18મી ઓવરમાં એન્ડ્રુ ફ્લિન્ટોફ સાથે તેની દલીલ થઈ હતી. આ પછી યુવરાજે પોતાનો બધો ગુસ્સો સ્ટુઅર્ટ બ્રોડ પર ઠાલવ્યો હતો.
ખરેખર, ભારતીય ઈનિંગની 18મી ઓવર એન્ડ્રુ ફ્લિન્ટોફે ફેંકી હતી. યુવરાજે આ ઓવરમાં 2 ચોગ્ગા ફટકાર્યા હતા. જે બાદ ઓવરના અંતે એન્ડ્રુ ફ્લિન્ટોફ અને યુવરાજ વચ્ચે દલીલ જોવા મળી અને મામલો એટલો વધી ગયો કે અમ્પાયરોએ દરમિયાનગીરી કરવી પડી.
ફ્લિન્ટોફની આ ભૂલ ઈંગ્લેન્ડની આખી ટીમને મોંઘી પડી અને તે મેચમાં યુવરાજે 12 બોલમાં અડધી સદી ફટકારીને ઈતિહાસ રચ્યો અને કુલ 16 બોલમાં 58 રન બનાવ્યા. જેમાં 3 ફોર અને 7 સિક્સ સામેલ હતી. યુવરાજે તે મેચમાં T20 ઈતિહાસમાં સૌથી ઝડપી અર્ધસદી ફટકારી હતી, જે હજુ પણ એક રેકોર્ડ છે.
વર્ષો પછી, ભારતીય ખેલાડીએ યુવરાજ અને ફ્લિન્ટોફ વચ્ચે તે દિવસે થયેલી વાતચીત વિશે ખુલાસો કર્યો હતો. એક ઈન્ટરવ્યુમાં તે ઘટના વિશે વાત કરતી વખતે યુવીએ કહ્યું હતું કે, 'મેં એન્ડ્રુ ફ્લિન્ટોફને બે ચોગ્ગા ફટકાર્યા, જે તેને પસંદ નહોતા. ઓવર પૂરી થયા બાદ ફ્લિન્ટોફે મારા શોટ્સને ખરાબ પણ ગણાવ્યા હતા. આ સિવાય તેણે મને કહ્યું કે તે મારું ગળું કાપી નાખશે.
આ લડાઈ પહેલા મારો 6 સિક્સર મારવાનો કોઈ ઈરાદો નહોતો. પછી મેં ફ્લિન્ટોફને કહ્યું કે તમે જાણો છો કે મારા હાથમાં જે બેટ છે તેનાથી હું તમને ક્યાં ફટકારી શકું છું. આ પછી અમ્પાયરો વચ્ચે આવ્યા અને પછી મેં નક્કી કર્યું કે હું દરેક બોલને બાઉન્ડ્રીની બહાર જ ફટકારીશ. હું નસીબદાર હતો કે તે દિવસે હું આમ કરવામાં સફળ રહ્યો. (All Photo Credit : PTI / GETTY / ESPN)
Published On - 9:51 pm, Wed, 11 December 24
