Womens T20 World Cup: સ્મૃતિ મંધાના ઓસ્ટ્રેલિયા સામે ભારતનું ‘ટ્રમ્પ કાર્ડ’, જો તેનું બેટ ચાલ્યું તો સેમિફાઈનલની ટિકિટ કન્ફર્મ!
ભારતીય મહિલા ક્રિકેટ ટીમે મહિલા T20 વર્લ્ડ કપ 2026 માં સેમિફાઈનલમાં સ્થાન મેળવવા માટે તેમના અંતિમ ગ્રુપ મેચમાં ઓસ્ટ્રેલિયાને હરાવવું જરૂરી છે. આ મેચમાં ટીમ ઈન્ડિયાની વાઈસ કેપ્ટન સ્મૃતિ મંધાના ભારત માટે ટ્રમ્પ કાર્ડ સાબિત થઈ શકે છે. જો ઓસ્ટ્રેલિયા સામે સ્મૃતિ મંધાનાનું બેટ ચાલ્યું, તો ટીમ ઈન્ડિયાની સેમિફાઈનલની ટિકિટ કન્ફર્મ સમજવી.
મહિલા T20 વર્લ્ડ કપમાં સેમિફાઈનલમાં સ્થાન મેળવવાના ઈરાદા સાથે ભારતીય મહિલા ક્રિકેટ ટીમ 28 જૂન રવિવારે ગ્રુપ A મેચમાં છ વખતની ચેમ્પિયન ઓસ્ટ્રેલિયા સામે ટકરાશે. હરમનપ્રીત કૌરની આગેવાની હેઠળની ભારતીય ટીમ માટે આ મેચ ક્વાર્ટર ફાઈનલથી ઓછી નહીં હોય.
સેમિફાઈનલમાં સ્થાન મેળવવાની રેસમાં રહેવા માટે ભારતે તેમની બેટિંગ અને ફિલ્ડિંગની નબળાઈઓ દૂર કરવી પડશે અને કાંગારૂ ટીમને કોઈપણ કિંમતે હરાવવી પડશે. આ મેચમાં બધી આશા સ્ટાર બેટ્સમેન સ્મૃતિ મંધાના પર ટકેલી રહેશે.
આ હાઈ-વોલ્ટેજ અને પ્રેશરથી ભરેલી મેચમાં બધાની નજર ટીમ ઈન્ડિયાની વાઈસ-કેપ્ટન અને સ્ટાર ખેલાડી સ્મૃતિ મંધાના પર રહેશે. ઓસ્ટ્રેલિયા જેવી મજબૂત ટીમ સામે મંધાનાનો રેકોર્ડ જોરદાર છે, જેના કારણે તે ભારતીય ટીમની જીતની સૌથી મોટી આશા બની છે. મોટી મેચોમાં કાંગારૂ ટીમ સામે મંધાનાનું બેટ હંમેશા ચાલ્યું છે.
હકીકતમાં, ભારત અને ઓસ્ટ્રેલિયા વચ્ચે અત્યાર સુધીમાં કુલ 38 T20 આંતરરાષ્ટ્રીય મેચ રમાઈ છે. આ 38 માંથી જે 9 મેચમાં ભારતને જીત મળી છે, તેમાંથી 8 મેચમાં સ્મૃતિ મંધાના ભારતીય ટીમની પ્લેઈંગ ઈલેવનનો ભાગ રહી છે અને તેણીએ મોટી ઈનિંગ રમી છે.
ઓસ્ટ્રેલિયા સામે ભારતે જેટલી પણ મેચ જીતી છે, તેમાં મંધાનાની વિકેટ મેળવવી હંમેશા ઓસ્ટ્રેલિયા માટે મુશ્કેલ કાર્ય સાબિત થયું છે. આ બધી જીત દરમિયાન, સ્મૃતિ મંધાના ફક્ત એક જ વાર 29 થી ઓછા રનમાં આઉટ થઈ છે. આનો અર્થ એ થયો કે જ્યારે પણ ભારત જીત્યું છે, ત્યારે મંધાનાએ ટીમને મજબૂત શરૂઆત આપી છે.
સ્મૃતિ મંધાનાએ ઓસ્ટ્રેલિયા સામે 29 મેચ રમી છે. જેમાં 32.07 ની સરેરાશ અને 124.78 ના સ્ટ્રાઈક રેટથી 866 રન બનાવ્યા છે. મંધાનાએ આઠ અડધી સદી ફટકારી છે. ઓસ્ટ્રેલિયા સામે જીતેલી મેચોમાં તેણીએ 58.5 ની સરેરાશ અને 122.29 ના સ્ટ્રાઈક રેટથી 351 રન બનાવ્યા છે, જેમાં ચાર અડધી સદીનો સમાવેશ થાય છે.
આનો અર્થ એ થયો કે જો ઓસ્ટ્રેલિયા સામે સ્મૃતિ મંધાનાનું બેટ ચાલ્યું અને તેણીએ મોટી ઈનિંગ રમી, તો ટીમ ઈન્ડિયાની મહિલા T20 વર્લ્ડ કપ 2026 માં સેમિફાઈનલની ટિકિટ કન્ફર્મ થઈ જશે. (PC:PTI/X/BCCI)
