15 વર્ષ, 181 દિવસ અને એક સદી… વૈભવ સૂર્યવંશી એશિયન ગેમ્સમાં તોડશે 30 વર્ષ જૂનો વર્લ્ડ રેકોર્ડ?
ભારતીય ક્રિકેટનો યુવા સ્ટાર વૈભવ સૂર્યવંશી હવે એક એવા રેકોર્ડની નજીક છે, જે છેલ્લા 30 વર્ષથી અતૂટ છે. માત્ર 15 વર્ષની ઉંમરે આંતરરાષ્ટ્રીય ક્રિકેટમાં ધમાલ મચાવનાર વૈભવ પાસે એશિયન ગેમ્સ 2026માં સદી ફટકારીને ક્રિકેટ ઈતિહાસ બદલવાની તક છે.
બિહારના સમસ્તીપુરનો 15 વર્ષીય વૈભવ સૂર્યવંશી પોતાની બેટિંગથી સતત ચર્ચામાં છે. માત્ર 15 વર્ષ અને 99 દિવસની ઉંમરે આંતરરાષ્ટ્રીય ક્રિકેટમાં ડેબ્યૂ કરનાર વૈભવે પોતાની પ્રતિભાથી દુનિયાને ચોંકાવી દીધી છે.
ડેબ્યૂ બાદ જ વૈભવે ઝિમ્બાબ્વે સામે 18 બોલમાં અડધી સદી ફટકારી હતી. આ સાથે તે પુરુષ આંતરરાષ્ટ્રીય ક્રિકેટમાં સૌથી ઓછી ઉંમરે ફિફ્ટી ફટકારનાર ખેલાડી બન્યો હતો. તેની આક્રમક બેટિંગે તેને અલગ ઓળખ અપાવી છે.
હવે વૈભવની નજર એશિયન ગેમ્સ 2026 પર છે. 24 સપ્ટેમ્બરે શરૂ થનારી T20 સ્પર્ધા દરમિયાન તે 15 વર્ષ અને 181 દિવસનો હશે. જો તે અહીં સદી ફટકારશે તો પાકિસ્તાનના શાહિદ આફ્રિદીનો 30 વર્ષ જૂનો રેકોર્ડ તોડી શકે છે.
શાહિદ આફ્રિદીએ 1996માં શ્રીલંકા સામે 16 વર્ષ અને 217 દિવસની ઉંમરે સદી ફટકારી હતી. જ્યારે મહિલા ક્રિકેટમાં સૌથી નાની ઉંમરે સદીનો રેકોર્ડ રવાન્ડાની ફેની ઉતાગુશીમાનિંદેના નામે છે, જેણે 15 વર્ષ અને 223 દિવસની ઉંમરે આ સિદ્ધિ મેળવી હતી.
વૈભવ સૂર્યવંશી પાસે હવે બંને રેકોર્ડ તોડવાની તક છે. તેની પ્રતિભા, આક્રમક શૈલી અને મળેલી તકને જોતા એશિયન ગેમ્સ 2026 તેની કારકિર્દીની સૌથી ઐતિહાસિક ટૂર્નામેન્ટ બની શકે છે. એક સદી અને વૈભવનું નામ ક્રિકેટ ઈતિહાસમાં હંમેશા માટે નોંધાઈ જશે. (PC:PTI/X)
