ચેમ્પિયન્સ ટ્રોફી વિવાદ વચ્ચે ટીમ ઈન્ડિયા પાકિસ્તાન સામે હારી, અંડર 19 એશિયા કપમાં મળી કારમી હાર
મેન્સ અંડર-19 એશિયા કપ 2024માં ટીમ ઈન્ડિયાએ તેની પ્રથમ મેચ પાકિસ્તાનની ટીમ સામે રમી હતી. આ મેચમાં ભારતીય ટીમને હારનો સામનો કરવો પડ્યો હતો. શાહઝેબ ખાન પાકિસ્તાનની જીતનો હીરો હતો. તેણે 147 બોલમાં 159 રન બનાવ્યા અને જીતનો પાયો નાખ્યો.
મેન્સ અંડર-19 એશિયા કપ 2024 UAEમાં રમાઈ રહ્યો છે. આ ટૂર્નામેન્ટમાં ટીમ ઈન્ડિયાએ પોતાની પ્રથમ મેચ પાકિસ્તાન સામે રમી હતી. દુબઈ ઈન્ટરનેશનલ ક્રિકેટ સ્ટેડિયમમાં રમાયેલી આ મેચમાં ટીમ ઈન્ડિયાને હારનો સામનો કરવો પડ્યો હતો. પાકિસ્તાન એકતરફી રીતે મેચ જીત્યું હતું. આ મેચમાં ભારતીય બોલરો કે બેટ્સમેન કંઈ જ પ્રદર્શન કરી શક્યા નહોતા, જેના કારણે ટૂર્નામેન્ટની શરૂઆત ટીમ માટે ખૂબ જ ખરાબ રહી હતી. બીજી તરફ પાકિસ્તાને રનથી મેચ જીતીને ટુર્નામેન્ટની સારી શરૂઆત કરી હતી.
આ મેચમાં પાકિસ્તાનની ટીમે ટોસ જીતીને પ્રથમ બેટિંગ કરવાનો નિર્ણય લીધો હતો અને તેના બેટ્સમેનોએ તેને સાચો સાબિત કર્યો હતો. પ્રથમ બેટિંગ કરતા પાકિસ્તાને 50 ઓવરમાં 7 વિકેટ ગુમાવીને 281 રન બનાવ્યા હતા. પાકિસ્તાન તરફથી ઈનિંગ્સની શરૂઆત કરવા આવેલા ઉસ્માન ખાન અને શાહઝેબ ખાને શાનદાર બેટિંગ કરી હતી. બંને ખેલાડીઓએ પ્રથમ વિકેટ માટે 160 રન જોડ્યા હતા.
ઉસ્માન ખાને 94 બોલમાં 60 રન બનાવ્યા હતા. જ્યારે શાહઝેબ ખાને 147 બોલમાં 159 રનની ઈનિંગ રમી હતી, જેમાં 10 છગ્ગા અને 5 ચોગ્ગા સામેલ હતા. બીજી તરફ ભારત તરફથી સમર્થ નાગરાજે સૌથી વધુ 3 વિકેટ ઝડપી હતી. આયુષ મ્હાત્રેએ પણ 2 અને યુધાજીત ગુહા-કિરણ ચોરમલેએ એક-એક વિકેટ ઝડપી હતી.
282 રનના ટાર્ગેટના જવાબમાં ભારતીય બેટિંગ સંપૂર્ણ ફ્લોપ રહી હતી. ટીમે 28 રનના સ્કોર પર આયુષ મ્હાત્રેના રૂપમાં પ્રથમ વિકેટ ગુમાવી હતી. આ પછી વિકેટો પડવાની પ્રક્રિયા ચાલુ રહી. ભારતની અડધી ટીમ માત્ર 134 રન પર પેવેલિયન પરત ફરી હતી.
જોકે, નિખિલ કુમારે લડાયક ઈનિંગ રમી હતી. તેણે 77 બોલમાં 67 રન બનાવ્યા, પરંતુ ટીમ ઈન્ડિયાની જીત માટે આ પૂરતું નહોતું, કારણ કે આખી ટીમ માત્ર 47.1 ઓવર જ રમી શકી અને 237 રન બનાવીને ઓલઆઉટ થઈ ગઈ. 13 વર્ષનો વૈભવ સૂર્યવંશી પણ માત્ર 1 રન બનાવી શક્યો હતો. બીજી તરફ પાકિસ્તાન માટે અલી રઝાએ ઘણી સારી બોલિંગ કરી હતી. તેણે 3 બેટ્સમેનોને પોતાનો શિકાર બનાવ્યા.
ભારત-પાકિસ્તાનના ગ્રુપમાં જાપાન અને UAEની ટીમો પણ છે. હવે 2 ડિસેમ્બરે ભારતીય ટીમ શારજાહમાં જાપાન સામે ટકરાશે અને ત્યારબાદ તે 4 ડિસેમ્બરે યુએઈની ટીમ સામે તેની છેલ્લી ગ્રુપ સ્ટેજ મેચ રમશે. આ પછી, બંને જૂથમાંથી 2-2 ટીમો સેમિફાઈનલ માટે ક્વોલિફાય થશે અને ત્યારબાદ 8મી ડિસેમ્બરે ફાઈનલ મેચ રમાશે. (All Photo Credit : X / ACC / PTI )
Published On - 7:05 pm, Sat, 30 November 24