39 વર્ષનો ક્રિકેટર બન્યો નંબર-1 ઓલરાઉન્ડર, સ્ટાર ખેલાડીના 5 વર્ષના એકચક્રી શાસનનો અંત
39 વર્ષના આ ખેલાડીએ ICC રેન્કિંગમાં ટોચનું સ્થાન હાંસલ કર્યું છે. આ ખેલાડી ઓલરાઉન્ડરોની ODI રેન્કિંગમાં નંબર વન બની ગયો છે. આ પદ હાંસલ કરીને તેણે શાકિબ અલ હસનના 5 વર્ષના શાસનનો અંત કર્યો છે. અમે વાત કરી રહ્યા છીએ અફઘાનિસ્તાનના મોહમ્મદ નબીની, જેણે બોલિંગ અને બેટિંગ બંનેમાં પોતાની તાકાત બતાવીને ICC રેન્કિંગમાં ટોપ ઓલરાઉન્ડરનું સ્થાન હાંસલ કર્યું છે.
ICCએ લેટેસ્ટ રેન્કિંગ જાહેર કર્યા છે, જેમાં એક મોટો ફેરફાર જોવા મળ્યો છે. ઓલરાઉન્ડરોના રેન્કિંગમાં નંબર 1 પર છેલ્લા પાંચ વર્ષથી ટોપ રેન્કિંગ પર રહેલા બાંગ્લાદેશના સ્ટાર ખેલાડી શાકિબ અલ હસનને 39 વર્ષના ખેલાડીએ પાછળ ધકેલી દીધો છે.
ICC રેન્કિંગમાં અફઘાનિસ્તાનનો 39 વર્ષીય મોહમ્મદ નબી 314 રેટિંગ પોઈન્ટ સાથે નંબર વન ઓલરાઉન્ડર બની ગયો છે. જ્યારે શાકિબ અલ હસન બીજા નંબર પર સરકી ગયો છે. શાકિબનો રેટિંગ પોઈન્ટ 310 છે. મતલબ કે નબી તેનાથી 4 પોઈન્ટ આગળ નીકળી ગયો છે.
ઝિમ્બાબ્વેનો સિકંદર રઝા ICC ODI ઓલરાઉન્ડર્સની રેન્કિંગમાં ત્રીજા સ્થાને છે, જેના 288 રેટિંગ પોઈન્ટ છે. જ્યારે અફઘાનિસ્તાનનો રાશિદ ખાન 255 રેટિંગ પોઈન્ટ સાથે ચોથા સ્થાન પર છે. એટલે કે ODI ઓલરાઉન્ડરોની ટોપ 5 રેન્કિંગમાં બે અફઘાન ખેલાડીઓ છે.
જો ભારતની વાત કરીએ તો ટોપ 10 ઓલરાઉન્ડર્સમાં જો કોઈ નામ દેખાય છે તો તે રવીન્દ્ર જાડેજાનું છે. જાડેજા 209 રેટિંગ પોઈન્ટ સાથે 10મા સ્થાને છે. આ યાદીમાં ઓસ્ટ્રેલિયાના ગ્લેન મેક્સવેલ છઠ્ઠા સ્થાને છે. ન્યૂઝીલેન્ડના મિશેલ સેન્ટનર અને બાંગ્લાદેશના મેહદી હસનનું નામ પણ ટોપ 10માં છે. સેન્ટનરનું રેન્કિંગ 8મું છે. જ્યારે મેહદી હસન 9મા સ્થાને છે.
ODI ઓલરાઉન્ડરોની રેન્કિંગમાં નંબર વન બન્યા બાદ મોહમ્મદ નબીએ જણાવ્યું હતું કે જો ફિટનેસ અને ફોર્મ સાથે હોય તો ઉંમરથી કોઈ ફરક પડતો નથી. એવી આશા છે કે મોહમ્મદ નબી હવે પોતાનું ટોપ સ્થાન જાળવી રાખશે. કારણ કે શાકિબ અલ હસન શ્રીલંકા સામેની હોમ વનડે શ્રેણીમાં રમી રહ્યો નથી. જો તે રમી રહ્યો હોત, તો તે ફરીથી નંબર વન પર પહોંચી શક્યો હોત.
Published On - 6:58 pm, Wed, 14 February 24