IPL: હાર્દિક પંડ્યાની ટ્રેડ ડીલ પહેલા મુંબઈ ઈન્ડિયન્સનો માસ્ટર પ્લાન, આ અનુભવી ખેલાડીને ટીમમાં કર્યો સામેલ
હાર્દિક પંડ્યાની ટ્રેડ ડીલની ચર્ચા વચ્ચે મુંબઈ ઈન્ડિયન્સે એક મોટો નિર્ણય લીધો છે. ફ્રેન્ચાઇઝીએ અનુભવી ઝુબિન ભરૂચાને ડિરેક્ટર ઓફ પર્ફોર્મન્સ તરીકે ટીમમાં સામેલ કર્યો છે. તેની પાસે ભારતીય ક્રિકેટ અને IPLનો લાંબો અનુભવ છે. હવે ભરૂચાની એન્ટ્રી પાછળ મુંબઈનો શું પ્લાન છે અને હાર્દિકના ભવિષ્ય સાથે તેનો કોઈ સંબંધ છે કે કેમ, તેના પર સૌની નજર છે.
મુંબઈ ઈન્ડિયન્સે સત્તાવાર રીતે ઝુબિન ભરૂચાને ડિરેક્ટર ઓફ પર્ફોર્મન્સ બનાવવાની જાહેરાત કરી છે. તે ટીમના મલ્ટી ડિસિપ્લિન લીડરશિપ ગ્રુપ સાથે મળીને ખેલાડીઓના પ્રદર્શન અને ગ્રોથ પર કામ કરશે.
ઝુબિન ભરૂચા ભૂતપૂર્વ ફર્સ્ટ ક્લાસ ક્રિકેટર છે. તે મુંબઈ અને સરે માટે રમી ચૂક્યો છે. IPLમાં તે રાજસ્થાન રોયલ્સ સાથે લાંબા સમય સુધી જોડાયેલો રહ્યો હતો અને 2008થી 2015 સુધી ટીમના ડિરેક્ટર તરીકે કામ કર્યું હતું.
ત્યારબાદ 2016 અને 2017માં તે દિલ્હી કેપિટલ્સનો ટેકનિકલ ડિરેક્ટર રહ્યો હતો. 2018થી તે ફરી રાજસ્થાન રોયલ્સ સાથે ક્રિકેટ ઓપરેશન્સ ડિરેક્ટર તરીકે કાર્યરત હતો. હવે તે મુંબઈ ઈન્ડિયન્સનો ભાગ બન્યો છે.
56 વર્ષીય ભરૂચાની ફર્સ્ટ ક્લાસ કારકિર્દીમાં 17 મેચમાં 1,021 રન છે, જેમાં ત્રણ સદી અને ચાર અડધી સદી સામેલ છે. લિસ્ટ-એ ક્રિકેટમાં પણ તેણે 11 મેચ રમી છે.
બીજી તરફ, હાર્દિક પંડ્યાની ટ્રેડ ડીલને લઈને ચર્ચા ચાલી રહી છે. જો તે મુંબઈ છોડે છે તો તિલક વર્મા આગામી કેપ્ટન માટે સૌથી આગળ હોવાનું માનવામાં આવે છે. આવી સ્થિતિમાં ભરૂચાનો અનુભવ મુંબઈ માટે મહત્વપૂર્ણ સાબિત થઈ શકે છે. (PC:X/MI/RR)
