IPL 2025: ચાલુ મેચમાં બદલાયો પ્રીટિ ઝિન્ટાની ટીમનો કેપ્ટન, ઐયરની જગ્યાએ આ ખેલાડીને મળી કમાન
IPL 2025 ની 59મી મેચ દરમિયાન એક અનોખો નજારો જોવા મળ્યો. મેચની વચ્ચે જ પંજાબ કિંગ્સને પોતાનો કેપ્ટન બદલવો પડ્યો. હકીકતમાં, પ્રથમ ઇનિંગ પછી, શ્રેયસ ઐયરની જગ્યાએ ઇમ્પેક્ટ સબ તરીકે મેદાન પર લાવવામાં આવ્યો.
IPL 2025 ની 59મી મેચ દરમિયાન, જયપુરના સવાઈ માનસિંહ સ્ટેડિયમમાં એક અનોખો નજારો જોવા મળ્યો. રાજસ્થાન ટીમ સામેની મેચની વચ્ચે જ પંજાબ કિંગ્સને પોતાનો કેપ્ટન બદલવો પડ્યો. શ્રેયસ ઐયરના સ્થાને, એક અનકેપ્ડ ખેલાડીને પંજાબ કિંગ્સની કમાન સોંપવામાં આવી. આ ખેલાડીએ પણ જોરદાર ઇનિંગ્સ રમી, જેના કારણે પંજાબની ટીમ મેચમાં પ્રથમ બેટિંગ કરતી વખતે 200+ રન બનાવી શકી.
વાસ્તવમાં, પંજાબ કિંગ્સના કેપ્ટન શ્રેયસ ઐયરને મેચના એક દિવસ પહેલા પ્રેક્ટિસ સેશન દરમિયાન તેની તર્જની આંગળીમાં ઊંડી ઈજા થઈ હતી. પરંતુ તેણે રાજસ્થાન સામે રમવાનું નક્કી કર્યું અને બેટિંગ પણ કરી. પરંતુ પંજાબની ઇનિંગ પૂરી થયા પછી, શ્રેયસ ઐયરની જગ્યાએ હરપ્રીત બ્રારને ઇમ્પેક્ટ સબ તરીકે મેદાનમાં લાવવામાં આવ્યો.
એટલે કે શ્રેયસ ઐય્યર આ મેચમાં ફિલ્ડિંગમાં આવ્યો ન હતો. આવી સ્થિતિમાં, અનકેપ્ડ ખેલાડી શશાંક સિંહને કેપ્ટનશીપની જવાબદારી સોંપવામાં આવી. જ્યારે શ્રેયસ ઐયર ટોસ માટે મેદાન પર આવ્યો ત્યારે તેની આંગળી પર ભારે પાટો બાંધેલો હતો.
આ પછી તે પાંચમા નંબરે બેટિંગ કરવા પણ આવ્યો. તેણે 25 બોલમાં 30 રનની ઇનિંગ રમી. ઐયરે આ રન 120 ના સ્ટ્રાઇક રેટથી બનાવ્યા, જેમાં ૫ ચોગ્ગાનો સમાવેશ થાય છે. બીજી તરફ, શશાંક સિંહે વિસ્ફોટક ઇનિંગ્સ રમી. તે 30 બોલમાં 59 રન બનાવીને અણનમ રહ્યો. આ દરમિયાન તેણે 5 ચોગ્ગા અને 3 છગ્ગા ફટકાર્યા. શશાંક સિંહનો સ્ટ્રાઇક રેટ પણ 196.66 હતો.
શશાંક સિંહે આ સિઝનમાં ટીમ માટે ખૂબ જ મહત્વપૂર્ણ રન બનાવ્યા છે. તેણે 12 મેચની 10 ઇનિંગ્સમાં 273 રન બનાવ્યા છે, જેમાં 2 અડધી સદીનો પણ સમાવેશ થાય છે. ખાસ વાત એ છે કે તેણે આ રન 68.25 ની સરેરાશથી બનાવ્યા છે અને તેનો સ્ટ્રાઇક રેટ પણ 151.66 રહ્યો છે. તે IPL 2024 પછી છઠ્ઠા કે તેનાથી નીચેના નંબર પર રમતા સૌથી વધુ અડધી સદી ફટકારનાર બેટ્સમેન પણ છે. તેણે 3 અડધી સદી ફટકારી છે. (All Image - BCCI)
Published On - 6:46 pm, Sun, 18 May 25
