IPL 2025 પહેલા મોટો ઝટકો, 11 કરોડ રૂપિયાની કિંમતનો આ ખેલાડી અડધી સિઝનમાંથી થયો બહાર
IPLની 18મી સિઝન 22 માર્ચથી શરૂ થવા જઈ રહી છે. આ પહેલા લખનૌ સુપર જાયન્ટ્સને મોટો ઝટકો લાગ્યો છે. લખનૌ સુપર જાયન્ટ્સના એક સ્ટાર ખેલાડી ઈજાને કારણે 18મી સિઝનના પહેલા ભાગમાં રમી શકશે નહીં.
ચેમ્પિયન્સ ટ્રોફી 2025 પછી, હવે સૌથી મોટી ક્રિકેટ લીગ એટલે કે IPLનો વારો છે. IPLની 18મી સિઝન 22 માર્ચથી શરૂ થવા જઈ રહી છે. આ સિઝન માટે બધી ટીમોએ પોતાની તૈયારીઓ તેજ કરી દીધી છે. આ દરમિયાન લખનૌ સુપર જાયન્ટ્સ ટીમ માટે એક ખરાબ સમાચાર આવ્યા છે.
લખનૌ સુપર જાયન્ટ્સનો ફાસ્ટ બોલર મયંક યાદવ હાલ ઈજા સામે ઝઝૂમી રહ્યો છે. એક રિપોર્ટ અનુસાર ઈજાના કારણે મયંક યાદવ IPL 2025માં ઘણી મેચો ચૂકી જશે. મયંક યાદવને LSGએ મેગા ઓક્શન પહેલા કરોડો રૂપિયા ખર્ચીને રિટેન કર્યો હતો.
ઓક્ટોબર 2024માં બાંગ્લાદેશ સામેની તેની T20I ડેબ્યૂ શ્રેણીમાં મયંક ઘાયલ થયો હતો. તે પીઠની ઈજાથી પીડાઈ રહ્યો છે. ESPNcricinfo ના રિપોર્ટ મુજબ, મયંક યાદવ IPL 2025ના પહેલા ભાગમાંથી બહાર રહેશે, એટલે કે તે લગભગ 7 મેચ રમી શકશે નહીં. મયંકે તાજેતરમાં બેંગલુરુમાં BCCI સેન્ટર ઓફ એક્સેલન્સ ખાતે ફરી બોલિંગ શરૂ કરી છે. જો તે પોતાના બોલિંગ વર્કલોડમાં વધારો કરે અને ફિટનેસના તમામ માપદંડો પૂર્ણ કરે, તો તે IPLના બીજા ભાગમાં રમી શકશે.
મયંક યાદવને IPL 2024 પહેલા લખનૌ સુપર જાયન્ટ્સે અનકેપ્ડ ફાસ્ટ બોલર તરીકે 20 લાખ રૂપિયામાં ખરીદ્યો હતો. આ દરમિયાન તેણે ઘણી હેડલાઈન્સ બનાવી હતી. તે 150 કિલોમીટર પ્રતિ કલાકની ઝડપે સતત બોલિંગ કરી શકે છે. પરંતુ તે IPL 2024 માં ફક્ત 4 મેચ રમી શક્યો. આ પછી તે સાઈડ સ્ટ્રેનને કારણે બહાર થઈ ગયો હતો. પછી રિકવરી દરમિયાન તેને બીજી ઈજા થઈ.
જોકે મયંક યાદવ ગયા સિઝનમાં ઈજાને કારણે ફક્ત 4 મેચ રમી શક્યો હતો, પરંતુ લખનૌ સુપર જાયન્ટ્સે મેગા ઓક્શન પહેલા તેના પર વિશ્વાસ દર્શાવ્યો હતો. લખનૌ સુપર જાયન્ટ્સે તેને 11 કરોડ રૂપિયામાં રિટેન કર્યો. પરંતુ ટુર્નામેન્ટના પહેલા ભાગમાં મયંકની ગેરહાજરી LSG માટે મોટો ફટકો છે. રિપોર્ટ અનુસાર, BCCI એ હજુ સુધી મયંકની વાપસી અંગે કોઈ ચોક્કસ તારીખ આપી નથી. (All Photo Credit : PTI)
Published On - 6:56 pm, Tue, 11 March 25
