અજિંક્ય રહાણેએ IPL 2025ની પહેલી અડધી સદી ફટકારી, RCB સામે તોફાની ઈનિંગ રમી
Mar 22, 2025 | 10:19 PM
અજિંક્ય રહાણેએ IPL 2025ની પહેલી જ મેચમાં RCB સામે અડધી સદી ફટકારીને શરૂઆત કરી હતી. તેણે બેંગલુરુ સામે 182ના સ્ટ્રાઈક રેટથી 31 બોલમાં 56 રનની તોફાની ઈનિંગ રમી હતી. આ દરમિયાન તેણે 4 છગ્ગા અને 6 ચોગ્ગા ફટકાર્યા હતા.
IPL 2025માં કોલકાતા નાઈટ રાઈડર્સનું નેતૃત્વ કરી રહેલા અજિંક્ય રહાણેએ સિઝનની શાનદાર શરૂઆત કરી છે. તેણે પહેલી જ મેચમાં બેટથી તોફાન મચાવ્યું અને આ સિઝનની પહેલી અડધી સદી પણ ફટકારી હતી.
રહાણેએ રોયલ ચેલેન્જર્સ બેંગલુરુ સામેની શરૂઆતની મેચમાં માત્ર 25 બોલમાં પોતાની અડધી સદી પૂરી કરી. સૌથી મોટી વાત એ હતી કે તેણે સિક્સર ફટકારીને ફિફ્ટી પૂરી કરી હતી. એટલું જ નહીં, સિઝનનો પહેલો છગ્ગો પણ રહાણેના બેટમાંથી જ આવ્યો હતો. કેપ્ટન રહાણેએ કોલકાતાના ચાહકોના દિલ જીતી લીધા હતા.
IPLની નવી સિઝન શરૂ થાય તે પહેલા ઘણા ક્રિકેટ નિષ્ણાતોએ અજિંક્ય રહાણેની કેપ્ટનશીપ અને ટીમમાં તેના સ્થાન અંગે પ્રશ્નો ઉઠાવ્યા હતા. એવું કહેવામાં આવી રહ્યું હતું કે કેપ્ટનશીપ વિના તેને ટીમમાં સ્થાન પણ ન મળે. જોકે, રહાણેએ પહેલી જ મેચમાં પોતાના બેટની તાકાત બતાવી. આ અદ્ભુત પ્રદર્શનની સાથે તેણે તેના પર ઉઠાવવામાં આવી રહેલા પ્રશ્નોના જવાબ પણ આપ્યા. તેણે પહેલી જ મેચમાં કેપ્ટન અને બેટ્સમેન બંનેની જવાબદારી નિભાવી.
વાસ્તવમાં પહેલા બેટિંગ કરતી વખતે KKRની શરૂઆત સારી નહોતી અને ટીમે પહેલી જ ઓવરમાં ક્વિન્ટન ડી કોકની વિકેટ ગુમાવી દીધી. માત્ર 4 રનના સ્કોર પર વિકેટ પડ્યા બાદ રહાણે ત્રીજા નંબરે બેટિંગ કરવા આવ્યો. આ પછી રહાણેએ ઈનિંગ સંભાળી અને ઝડપથી રન બનાવ્યા.
પહેલી 3 ઓવરમાં બેંગલુરુના બોલરોએ કડક બોલિંગ કરી, જેના પરિણામે ફક્ત 9 રન જ બન્યા. પરંતુ આ પછી, KKR કેપ્ટને વળતો આક્રમક બેટિંગ શરૂ કરી અને સુનીલ નારાયણ સાથે મળીને આગામી 3 ઓવરમાં 51 રન બનાવ્યા. આ દરમિયાન તેણે 16 બોલમાં 39 રન બનાવ્યા. રહાણેએ નારાયણ સાથે બીજી વિકેટ માટે 103 રનની ભાગીદારી કરી અને ટીમને ઝડપી શરૂઆત અપાવી. તેની ઈનિંગને કારણે કોલકાતાએ માત્ર 10.3 ઓવરમાં 109 રન બનાવ્યા. જોકે, આ પછી તે કૃણાલ પંડ્યાનો શિકાર બન્યો. (All Photo Credit : PTI)
Published On - 10:17 pm, Sat, 22 March 25