IND vs SL: ધ્રુવ જુરેલના કેચથી મચ્યો હોબાળો, ઘૂંટણિયે પડીને પકડ્યો કેચ અને પછી થયો વિવાદ
ગાલે ટેસ્ટના ચોથા દિવસે ધ્રુવ જુરેલના એક કેચે ભારે ચર્ચા જગાવી. માનવ સુથારની બોલ પર શોર્ટ ગલીમાં જુરેલે ઘૂંટણિયે પડીને લાહિરુ ઉદારાનો કેચ પકડ્યો હતો. જોકે, બોલ જમીનને સ્પર્શ્યો હોવાની શંકાને કારણે ત્રીજા અમ્પાયરે રિપ્લે તપાસ્યા. અંતે ઉદારાને આઉટ જાહેર કરવામાં આવ્યો અને જુરેલનો કેચ માન્ય રહ્યો.
ભારત અને શ્રીલંકા વચ્ચેની ગાલે ટેસ્ટમાં ચોથા દિવસે એક કેચે અચાનક સૌનું ધ્યાન ખેંચ્યું. શ્રીલંકાના ઓપનર લાહિરુ ઉદારાની વિકેટ બાદ ભારતીય ખેલાડીઓ ઉજવણી કરવા લાગ્યા, પરંતુ કેચ યોગ્ય રીતે લેવાયો હતો કે નહીં તેને લઈને શંકા ઊભી થતાં મામલો ત્રીજા અમ્પાયર સુધી પહોંચ્યો.
આ ઘટના શ્રીલંકાની ઇનિંગ્સની 22મી ઓવરમાં બની હતી. માનવ સુથારના બોલ પર ઉદારાએ બચાવ કરવાનો પ્રયાસ કર્યો, પરંતુ બોલ બેટની ધારને લાગીને શોર્ટ ગલી તરફ ગયો. ત્યાં ફિલ્ડિંગ કરી રહેલા ધ્રુવ જુરેલે ઝડપથી પ્રતિક્રિયા આપી અને નીચે ઝૂકીને બોલને પકડી લીધો.
જુરેલે કેચ લેતી વખતે ઘૂંટણિયે પડીને બંને હાથ આગળ કર્યા હતા. જોકે, કેચ બાદ સવાલ એ હતો કે બોલ તેની આંગળીઓમાં આવતાં પહેલાં જમીનને સ્પર્શ્યો હતો કે નહીં. આ કારણે મેદાનના અમ્પાયરે ત્રીજા અમ્પાયરની મદદ લીધી.
ત્રીજા અમ્પાયરે અલગ-અલગ એંગલથી રિપ્લે તપાસ્યા. લાંબી સમીક્ષા બાદ તેમને લાગ્યું કે જુરેલની આંગળીઓ બોલની નીચે હતી અને કેચ જમીનને સ્પર્શ્યા વગર લેવામાં આવ્યો હતો. ત્યારબાદ લાહિરુ ઉદારાને આઉટ જાહેર કરવામાં આવ્યો.
ત્રીજા અમ્પાયરના નિર્ણય બાદ ઉદારા આશ્ચર્યચકિત જોવા મળ્યો અને અમ્પાયર સાથે ચર્ચા પણ કરી. બીજી તરફ, જુરેલનો આ કેચ તેની શાનદાર ફિલ્ડિંગ અને ઝડપી પ્રતિક્રિયાના કારણે ચર્ચામાં રહ્યો. શોર્ટ ગલી જેવી નજીકની પોઝિશન પર આ પ્રકારનો કેચ પકડવો સરળ નથી. (PC:X/SONY LIV)
