T20 World Cup 2026 Prize Money: ભારતીય ટીમ થઈ માલામાલ, T20 વર્લ્ડ કપમાં જીત બાદ મળી રેકોર્ડબ્રેક પ્રાઇઝ મની, જાણો
ભારતે T20 વર્લ્ડ કપ 2026ની ફાઇનલમાં ન્યુઝીલેન્ડને 96 રનથી હરાવી ઐતિહાસિક જીત મેળવી. અમદાવાદમાં ઘરઆંગણે ત્રીજી વખત ખિતાબ જીતી, ભારત T20 વર્લ્ડ કપ ત્રણ વખત જીતનાર પ્રથમ ટીમ બન્યું. આ વિજય સાથે ભારતીય ટીમને મળી રેકોર્ડ બ્રેક પ્રાઇઝ મની.
T20 વર્લ્ડ કપ 2026ની ફાઇનલમાં ભારતે ન્યુઝીલેન્ડને 96 રનથી હરાવીને ઐતિહાસિક જીત નોંધાવી. અમદાવાદના નરેન્દ્ર મોદી સ્ટેડિયમમાં રમાયેલી આ રોમાંચક મેચમાં ભારતીય ટીમે શાનદાર પ્રદર્શન કર્યું. આ જીત સાથે ભારત T20 વર્લ્ડ કપ ત્રણ વખત જીતનાર પ્રથમ ટીમ બની ગયું. સાથે જ, ભારતે પોતાના ઘરઆંગણે T20 વર્લ્ડ કપ જીતવાની અનોખી સિદ્ધિ પણ હાંસલ કરી.
આ ઐતિહાસિક જીત બાદ ટીમ ઈન્ડિયાને આંતરરાષ્ટ્રીય ક્રિકેટ પરિષદ (ICC) તરફથી રેકોર્ડબ્રેક ઈનામી રકમ પણ મળી. ICC દ્વારા ટુર્નામેન્ટ માટે કુલ લગભગ ₹1.2 બિલિયનનું ઈનામ પૂલ જાહેર કરવામાં આવ્યું હતું. તેમાં ચેમ્પિયન ટીમ તરીકે ભારતને $3 મિલિયન (લગભગ ₹27.48 કરોડ)ની ઈનામી રકમ આપવામાં આવી, જે અગાઉની આવૃત્તિઓની સરખામણીએ વધુ છે. અગાઉ ભારતીય ટીમને ટુર્નામેન્ટ જીતવા બદલ $2,340,000 મળ્યા હતા.
ફાઇનલમાં હાર છતાં ન્યુઝીલેન્ડને પણ મોટી ઈનામી રકમ મળી. રનર-અપ તરીકે ન્યુઝીલેન્ડને $1.6 મિલિયન (લગભગ ₹14.65 કરોડ) આપવામાં આવ્યા. જ્યારે સેમિફાઇનલમાં હારનાર ટીમો દક્ષિણ આફ્રિકા અને ઇંગ્લેન્ડને $790,000 (લગભગ ₹7.24 કરોડ)નું ઈનામ મળ્યું. સુપર 8 તબક્કામાં પહોંચેલી પરંતુ સેમિફાઇનલમાં સ્થાન ન મેળવનાર દરેક ટીમને $380,000 (લગભગ ₹3.48 કરોડ) આપવામાં આવ્યા હતા. ઉપરાંત, ગ્રુપ સ્ટેજમાં ભાગ લેનાર તમામ ટીમોને $250,000 (લગભગ ₹2.29 કરોડ)નું ગેરંટીકૃત ઈનામ આપવામાં આવ્યું.
ફાઇનલ મેચમાં ભારતનું પ્રદર્શન એકતરફી રહ્યું. પ્રથમ બેટિંગ કરતાં ભારતીય ટીમે 5 વિકેટના નુકસાન પર 255 રન બનાવ્યા. સંજુ સેમસને માત્ર 46 બોલમાં 89 રનની ધમાકેદાર ઇનિંગ રમી અને ટીમને મજબૂત સ્કોર સુધી પહોંચાડ્યું.
જવાબમાં ન્યુઝીલેન્ડની ટીમ 159 રનમાં જ ઓલઆઉટ થઈ ગઈ. ભારતીય બોલિંગ આક્રમણ સામે કિવી બેટ્સમેન ટકી શક્યા નહીં. જસપ્રીત બુમરાહે 15 રનમાં 4 વિકેટ લઈને શાનદાર પ્રદર્શન કર્યું, જ્યારે અક્ષર પટેલે 3 વિકેટ મેળવી મહત્વપૂર્ણ યોગદાન આપ્યું. આ જીત સાથે ભારતે માત્ર T20 વર્લ્ડ કપ જીત્યો નહીં, પરંતુ ટાઇટલ ડિફેન્ડ કરવાની સિદ્ધિ પણ હાંસલ કરી, જે T20 વર્લ્ડ કપના ઇતિહાસમાં પ્રથમ વખત બન્યું.
Published On - 8:18 am, Mon, 9 March 26
