Asian Games 2026: પિતા છેલ્લી મેચમાં ભારત સામે રમ્યા, હવે પુત્ર મેદાનમાં, એશિયન ગેમ્સમાં જોવા મળ્યો ખાસ નજારો
અફઘાનિસ્તાનનો દિગ્ગજ ક્રિકેટર ભારત સામે હાલમાં જ સમાપ્ત થયેલ શ્રેણીમાં રમ્યો હતો, હવે તેના પુત્રે આંતરરાષ્ટ્રીય ક્રિકેટમાં ડેબ્યૂ હતું. એશિયન ગેમ્સમાં પિતા બાદ પુત્રની આ ખાસ એન્ટ્રીએ ક્રિકેટ જગતમાં ચર્ચા જગાવી છે. જોકે, પિતાની જેમ મોટી ઇનિંગ રમવામાં પુત્ર નિષ્ફળ રહ્યો અને ડેબ્યૂ મેચમાં માત્ર 3 રન બનાવીને પેવેલિયન પરત ફર્યો.
એશિયન ગેમ્સમાં મોહમ્મદ નબીના પુત્ર હસન ઈસાખિલે આંતરરાષ્ટ્રીય ક્રિકેટમાં ડેબ્યૂ કર્યું. આ સાથે અફઘાન ક્રિકેટમાં પિતા બાદ પુત્રની નવી સફર શરૂ થઈ.
હસન ઈસાખિલ માટે ડેબ્યૂ મેચ યાદગાર તો બની, પરંતુ બેટિંગમાં તે ખાસ અસર છોડી શક્યો નહીં. તેણે 10 બોલનો સામનો કરીને માત્ર 3 રન બનાવ્યા.
હસનના પિતા મોહમ્મદ નબી અફઘાનિસ્તાનના દિગ્ગજ ઓલરાઉન્ડર છે. એશિયન ગેમ્સ પહેલાં તેઓ ભારત સામેની ત્રણ મેચની T20 શ્રેણીમાં અફઘાન ટીમનો ભાગ હતા.
નબી અને હસન અગાઉ લીગ ક્રિકેટમાં સાથે રમી ચૂક્યા છે. હવે આંતરરાષ્ટ્રીય ક્રિકેટમાં પણ હસને પિતાના પગલે આગળ વધવાની શરૂઆત કરી છે.
અફઘાનિસ્તાન અને જાપાન વચ્ચેની મેચમાં અફઘાન ટીમે પ્રથમ બેટિંગ કરી હતી. મોહમ્મદ અકરમે 34 રનની ઇનિંગ રમી, જ્યારે કેપ્ટન દરવેશ રસૂલીએ 29 રન બનાવ્યા.
અફઘાનિસ્તાનની ટીમે 20 ઓવરમાં 6 વિકેટ ગુમાવીને 129 રન બનાવ્યા. ત્યારબાદ જાપાનની ટીમ લક્ષ્યાંકનો પીછો કરવામાં શરૂઆતથી જ મુશ્કેલીમાં જોવા મળી હતી.
જાપાનના બેટ્સમેનો અફઘાન બોલરો સામે સતત વિકેટ ગુમાવતા રહ્યા અને 19.3 ઓવરમાં માત્ર 81 રનમાં ઓલઆઉટ થઈ ગયા. અફઘાનિસ્તાને 48 રને મેચ જીતી લીધી.
આ જીત સાથે અફઘાનિસ્તાને એશિયન ગેમ્સની શરૂઆત શાનદાર રીતે કરી. બીજી તરફ, હસન ઈસાખિલ માટે આ ડેબ્યૂ ભવિષ્યમાં અફઘાનિસ્તાનની સિનિયર ટીમમાં સ્થાન બનાવવાની સફરનું પહેલું પગથિયું બની ગયું. (PC:PTI/X)
Published On - 7:14 pm, Thu, 24 September 26
