Champions Trophy : આ ‘ભારતીય’ સેમીફાઈનલમાં ભારત માટે ખતરો બનશે ! જાણો કેવી હશે ઓસ્ટ્રેલિયાની પ્લેઈંગ 11
સેમીફાઈનલમાં એક 'ભારતીય' ખેલાડી જ ટીમ ઈન્ડિયા માટે મુશ્કેલી ઊભી કરી શકે છે. બંને ટીમો 4 માર્ચે દુબઈમાં એક મહત્વપૂર્ણ મેચમાં ટકરાશે. જેમાં ઓસ્ટ્રેલિયા મોટી ચાલ કરી શકે છે. ચાલો જોઈએ કે ભારત સામે ઓસ્ટ્રેલિયાની પ્લેઈંગ ઈલેવન શું હોઈ શકે છે?
ચેમ્પિયન્સ ટ્રોફીની પહેલી સેમીફાઈનલમાં 4 માર્ચે દુબઈમાં ભારત અને ઓસ્ટ્રેલિયાની ટક્કર થશે. આ મેચમાં ભારત સામે ઓસ્ટ્રેલિયા પ્લેઈંગ 11 માં ભારતીય મૂળના એક ખેલાડીને સ્થાન આપીને મોટી ગેમ રમી શકે છે અને ભારત સામે એક 'ભારતીય' ખેલાડી જ મુશ્કેલી ઊભી કરી શકે છે.
સેમીફાઈનલ પહેલા ઓસ્ટ્રેલિયાને મોટો ઝટકો લાગ્યો છે. ઓપનર મેથ્યુ શોર્ટ ઈજાગ્રસ્ત થયા બાદ ટુર્નામેન્ટમાંથી બહાર થઈ ગયો છે. આવી સ્થિતિમાં, જેક ફ્રેઝર-મેકગર્ક ટ્રેવિસ હેડ સાથે ઓપનિંગ કરી શકે છે. કેપ્ટન સ્ટીવ સ્મિથ અને માર્નસ લાબુશેન ત્રીજા અને ચોથા નંબરે બેટિંગ કરવા આવશે. જોશ ઈંગ્લિસ અથવા એલેક્સ કેરી બેમાંથી એક વિકેટકીપર તરીકે રમી શકે છે.
ગ્લેન મેક્સવેલ ફિનિશરની ભૂમિકામાં જોવા મળી શકે છે. જ્યારે ઝડપી બોલરોમાં, સ્પેન્સર જોહ્ન્સન અને બેન દ્વારશુઈસનું રમવું નિશ્ચિત છે. પરંતુ નાથન એલિસની જગ્યાએ સીન એબોટને તક મળી શકે છે. એડમ ઝામ્પા સ્પિન વિભાગની કમાન સંભાળશે. ગ્લેન મેક્સવેલ પણ તેને ટેકો આપશે. પરંતુ ભારત-ન્યુઝીલેન્ડ મેચ પછી કાંગારૂ ટીમ એક મોટું પગલું ભરી શકે છે.
જો આપણે દુબઈના મેદાન પર એકંદર રેકોર્ડ પર નજર કરીએ તો, ઝડપી બોલરો સ્પિનરો કરતા વધુ ફાયદાકારક સાબિત થયા છે. પરંતુ ભારત-ન્યુઝીલેન્ડ મેચ દરમિયાન, સ્પિનરોએ 11 વિકેટ લીધી હતી. ટીમ ઈન્ડિયાના મિસ્ટ્રી સ્પિનર વરુણ ચક્રવર્તીએ પાંચ વિકેટ લીધી હતી. દુબઈની પિચ હાલમાં સ્પિનરો માટે મદદરૂપ સાબિત થઈ રહી છે. આવી સ્થિતિમાં ઓસ્ટ્રેલિયા સ્પિનર તનવીર સંઘાને પણ ટીમમાં સ્થાન આપી શકે છે.
તનવીર અત્યાર સુધીમાં ત્રણ વનડે રમી ચૂક્યો છે જેમાં તેણે બે વિકેટ લીધી છે. ઉલ્લેખનીય છે કે તનવીરનો ભારત સાથે સંબંધ છે. તેના પિતા પંજાબના છે. 1997માં તેઓ ભારત છોડીને ઓસ્ટ્રેલિયા ગયા હતા અને ત્યાં જ સ્થાયી થયા.
ટીમ ઈન્ડિયા સામે ઓસ્ટ્રેલિયાની સંભવિત પ્લેઈંગ ઈલેવન : ટ્રેવિસ હેડ, જેક ફ્રેઝર-મેકગર્ક, સ્ટીવ સ્મિથ (કેપ્ટન), માર્નસ લાબુશેન, જોશ ઈંગ્લિસ/એલેક્સ કેરી, ગ્લેન મેક્સવેલ, સ્પેન્સર જોહ્ન્સન, નાથન એલિસ, સીન એબોટ, એડમ ઝામ્પા, તનવીર સંઘા. (All Photo Credit : PTI / X / INSTAGRAM)
