Champions Trophy 2025: સેમીફાઈનલમાં ભારતનો મુકાબલો ઓસ્ટ્રેલિયા સામે ! જાણો કેવું છે ટોપ-4 નું સમીકરણ
ચેમ્પિયન્સ ટ્રોફી 2025ની ગ્રુપ સ્ટેજ મેચો આવતીકાલે ભારત-ન્યુઝીલેન્ડ મેચ સાથે સમાપ્ત થશે. આ પછી પહેલી સેમીફાઈનલ 4 માર્ચે અને બીજી સેમીફાઈનલ 5 માર્ચે રમાશે. પરંતુ અત્યાર સુધી સેમીફાઈનલ માટે ફક્ત ત્રણ ટીમો જ નક્કી થઈ છે. આજે આફ્રિકા-ઈંગ્લેન્ડ વચ્ચેની મેચના પરિણામ સાથે સેમીફાઈનલની ચોથી ટીમ પણ નક્કી થશે. પરંતુ એવું માનવામાં આવે છે કે ભારત પ્રથમ સેમીફાઈનલમાં ઓસ્ટ્રેલિયાનો સામનો કરી શકે છે.
ચેમ્પિયન્સ ટ્રોફી 2025ની સેમીફાઈનલમાં ટીમ ગયા કઈ ટીમ સાથે રમી શકે છે? દરેક વ્યક્તિ આ પ્રશ્નનો જવાબ જાણવા માંગે છે, તેની હજુ સુધી સત્તાવાર જાહેરાત કરવામાં આવી નથી. પરંતુ જો આપણે કેટલાક સમીકરણો જોઈએ તો ભારતનો મુકાબલો પ્રથમ સેમીફાઈનલમાં ઓસ્ટ્રેલિયા સામે થઈ શકે છે.
ગ્રુપ A માંથી બે ટીમો પાકિસ્તાન અને બાંગ્લાદેશ બહાર થઈ ગઈ છે, જ્યારે બે ટીમો ભારત અને ન્યુઝીલેન્ડ સેમીફાઈનલમાં પહોંચી ગઈ છે. જ્યારે ગ્રુપ B માંથી ફક્ત એક જ ટીમ ઓસ્ટ્રેલિયા સેમીફાઈનલમાં પ્રવેશી છે. ઈંગ્લેન્ડની ટીમ ચેમ્પિયન્સ ટ્રોફીમાંથી પહેલાથી જ બહાર થઈ ગઈ છે. પરંતુ ગ્રુપ સ્ટેજની તેની છેલ્લી મેચ દક્ષિણ આફ્રિકા સાથે છે.
જો દક્ષિણ આફ્રિકા આ મેચ જીતી જાય તો તેને સેમીફાઈનલમાં પ્રવેશ મળશે. પરંતુ તેણે એ પણ ધ્યાનમાં રાખવું પડશે કે તેણે ઈંગ્લેન્ડ સામે 207+ ના મોટા માર્જિનથી જીતવું પડશે. નહિંતર અફઘાનિસ્તાન પાસે સેમીફાઈનલમાં પહોંચવાની તક બની શકે છે. પરંતુ અફઘાન ટીમની શક્યતાઓ લગભગ નહિવત્ છે.
ઈંગ્લેન્ડને હરાવ્યા બાદ દક્ષિણ આફ્રિકાના 5 પોઈન્ટ થશે. હાલમાં, તે 3 પોઈન્ટ પર છે. આફ્રિકાએ એક મેચ જીતી છે અને એક મેચ અનિર્ણિત રહી હતી. આ કિસ્સામાં, તેના 3 પોઈન્ટ છે. ઈંગ્લેન્ડને હરાવતાની સાથે જ તેને વધુ 2 પોઈન્ટ મળશે અને તેના કુલ 5 પોઈન્ટ થશે. આવી સ્થિતિમાં, ત્રણ મેચમાં એક જીતી અને બે ડ્રો કરી ચાર પોઈન્ટ સાથે રહેલી ઓસ્ટ્રેલિયા ગ્રુપ B માં બીજા ક્રમે રહેશે.
ભારતીય ટીમ અને ન્યુઝીલેન્ડ બંનેએ બે-બે મેચ રમી છે અને બંનેના ચાર-ચાર પોઈન્ટ છે. બંને રવિવારે ગ્રુપ સ્ટેજમાં એકબીજા સામે પોતાની છેલ્લી મેચ રમશે. જો ટીમ ઈન્ડિયા કિવી ટીમને હરાવે છે, તો તે 6 પોઈન્ટ સાથે નંબર વન પર રહેશે, જ્યારે ન્યુઝીલેન્ડના ફક્ત ચાર પોઈન્ટ રહેશે. ઉલ્લેખનીય છે કે સેમીફાઈનલમાં ગ્રુપ A ની ટોચની ટીમ ગ્રુપ B ની નંબર 2 ટીમ સામે રમશે. આવી સ્થિતિમાં, ભારત અને ઓસ્ટ્રેલિયા 4 માર્ચે દુબઈમાં પ્રથમ સેમીફાઈનલમાં ટકરાઈ શકે છે.
જો બધું ઉપર જણાવેલ સમીકરણ મુજબ થાય, તો બીજા સેમીફાઈનલમાં મુકાબલો દક્ષિણ આફ્રિકા અને ન્યુઝીલેન્ડ વચ્ચે થઈ શકે છે. બીજી સેમીફાઈનલ 5 માર્ચે લાહોરના ગદ્દાફી સ્ટેડિયમ ખાતે રમાશે. જો ટીમ ઈન્ડિયા ફાઈનલમાં પહોંચે છે, તો આ મેચ દુબઈમાં રમાશે, નહીં તો ફાઈનલ પણ પાકિસ્તાનમાં જ રમાશે. (All Photo Credit : PTI / X)
Published On - 4:00 pm, Sat, 1 March 25
