Breaking News: રિચા ઘોષની 68 રનની તોફાની ઈનિંગ વ્યર્થ ગઈ, ઈંગ્લેન્ડે છેલ્લી ઓવરમાં મેચ છીનવી લીધી
મહિલા T20 વર્લ્ડ કપ પહેલા ટીમ ઈન્ડિયાએ ઈંગ્લેન્ડ સામે પોતાની બીજી વોર્મ-અપ મેચ રમી હતી, જેમાં તેમને 5 રનથી હારનો સામનો કરવો પડ્યો હતો. રિચા ઘોષે ધમાકેદાર ઈનિંગ રમી હતી, પણ તે ટીમને જીત ના અપાવી શકી.
મહિલા T20 વર્લ્ડ કપની તૈયારીઓ વચ્ચે ટીમ ઈન્ડિયાએ ઈંગ્લેન્ડ સામે પોતાની બીજી વોર્મ-અપ મેચ રમી હતી. આ મેચમાં ભારતીય ટીમ 5 રનથી હારી ગઈ. ઈંગ્લેન્ડની ટીમે અંતિમ ઓવરમાં ભારતીય ટીમને હરાવી હતી.
પ્રથમ બેટિંગ કરતા ઈંગ્લેન્ડે 20 ઓવરમાં 171 રન બનાવ્યા. એમી જોન્સે 64 રન, જ્યારે કેપ્ટન સાયવર-બ્રન્ટે 57 રનનું યોગદાન આપ્યું. ગિબ્સન 30 રન બનાવી અણનમ રહી. ભારત તરફથી શ્રેયંકા પાટીલે બે, જ્યારે શેફાલી વર્મા, રેણુકા સિંહ, રાધા યાદવ અને શ્રી ચારણીએ એક-એક વિકેટ લીધી.
જવાબમાં, ભારતની શરૂઆત ખરાબ રહી. સ્મૃતિ મંધાના માત્ર 1 અને શેફાલી વર્મા પણ 13 રન બનાવીને આઉટ થઈ. યાસ્તિકા ભાટિયા (15), હરમનપ્રીત કૌર (17) અને ભારતી ફુલમાલી (18) એ ટૂંકી ઈનિંગ્સ રમી, પરંતુ વિકેટોના સતત પતનને કારણે રન રેટ ધીમો પડી ગયો.
જોકે, રિચા ઘોષે એક છેડો પકડી રાખ્યો અને 36 બોલમાં 68 રનની ધમાકેદાર ઈનિંગ રમી. આ ઈનિંગમાં 9 ચોગ્ગા અને 2 છગ્ગાનો સમાવેશ થતો હતો. રિચા ઘોષે ટીમ ઈન્ડિયાને જીતની ખૂબ નજીક લાવી હતી.
જ્યારે તે આઉટ થઈ ત્યારે ટીમને છેલ્લા 3 બોલમાં 6 રનની જરૂર હતી, અને ટીમ 5 રનથી મેચ હારી ગઈ. ટીમ ઈન્ડિયા 19.5 ઓવરમાં 166 રનમાં ઓલઆઉટ થઈ ગઈ. ટીમ ઈન્ડિયા હવે આ ટુર્નામેન્ટની પોતાની પહેલી મેચ 14 જૂને પાકિસ્તાન સામે રમશે. (PC:X/BCCI)
