Breaking News: ચેન્નાઈ સુપર કિંગ્સમાં કોણ લેશે આયુષ મ્હાત્રેનું સ્થાન? આ ત્રણ ખેલાડી છે રેસમાં
IPL 2026 દરમિયાન ચેન્નાઈ સુપર કિંગ્સને મોટો ઝટકો લાગ્યો છે. જમણા હાથના વિસ્ફોટક બેટ્સમેન આયુષ મ્હાત્રે ઈજાને કારણે ટુર્નામેન્ટમાંથી બહાર થઈ ગયો છે. હવે CSKમાં મ્હાત્રેનું સ્થાન કોણ લેશે તે મોટો પ્રશ્ન છે.
IPL 2026 માં આયુષ મ્હાત્રેની સફરનો અંત આવી ગયો છે. જમણા હાથના બેટ્સમેનને સનરાઇઝર્સ હૈદરાબાદ સામેની મેચમાં ઈજા થઈ હતી, જેના કારણે તે આ સિઝનની IPLમાંથી બહાર થઈ ગયો છે. આયુષની ગેરહાજરી CSK માટે મોટો ફટકો છે, કારણ કે જમણા હાથનો બેટ્સમેન ઉત્તમ ફોર્મમાં હતો.
આયુષ મ્હાત્રેએ છ મેચમાં 33.50 ની સરેરાશથી 177.87 ના સ્ટ્રાઇક રેટ સાથે 201 રન બનાવ્યા હતા, અને તેણે 12 છગ્ગા અને 20 ચોગ્ગા ફટકાર્યા હતા. જોકે, હૈદરાબાદ સામે બેટિંગ કરતી વખતે તેને હેમસ્ટ્રિંગમાં ખેંચ આવી ગઈ હતી અને હવે તે ટુર્નામેન્ટમાંથી બહાર થઈ ગયો છે. હવે મોટો પ્રશ્ન એ છે કે ચેન્નાઈ સુપર કિંગ્સ તેના સ્થાને કયા ખેલાડીને લેશે.
દિલ્હીના ટોપ ઓર્ડર બેટ્સમેન યશ ધુલને આયુષ મ્હાત્રેની જગ્યાએ તક મળી શકે છે . જમણા હાથનો આ બેટ્સમેન તાજેતરમાં સારા ફોર્મમાં છે. તેણે દિલ્હી પ્રીમિયર લીગમાં 167 થી વધુની સરેરાશથી 435 રન બનાવ્યા હતા. ત્યારબાદ તેણે રણજી ટ્રોફીમાં પાંચ મેચમાં 434 રન બનાવ્યા હતા.
ચેન્નાઈ સુપર કિંગ્સ મ્હાત્રેના સ્થાને સ્વસ્તિક ચિકારાને તક આપી શકે છે. સ્વસ્તિક ચિકારા ઉત્તર પ્રદેશનો ટોપ ઓર્ડર બેટ્સમેન છે. તે ગયા સિઝનમાં RCBનો ભાગ હતો પરંતુ તેને એક પણ મેચ રમવાની તક મળી ન હતી. ચિકારાએ તાજેતરમાં અયોધ્યા પ્રીમિયર લીગ મેચમાં 69 બોલમાં 195 રન બનાવ્યા હતા. ચિકારાએ આ મેચમાં 21 છગ્ગા ફટકાર્યા હતા.
જો ચેન્નાઈ સુપર કિંગ્સ કોઈ અનુભવી ખેલાડીને તક આપવાનું નક્કી કરે, તો કર્ણાટકનો અનુભવી બેટ્સમેન મયંક અગ્રવાલ એક સારો વિકલ્પ છે. આ જમણા હાથના બેટ્સમેને 131 IPL મેચોમાં 2,756 રન બનાવ્યા છે, જેમાં 13 અડધી સદી અને એક સદીનો સમાવેશ થાય છે. (PC:PTI/X)
