Breaking News: મેચ દરમિયાન વેપિંગ કરતો વીડિયો વાયરલ થયા બાદ રાજસ્થાન રોયલ્સ કેપ્ટન સામે થશે કાર્યવાહી, BCCIએ માંગ્યો જવાબ
રાજસ્થાન રોયલ્સનો કેપ્ટન રિયાન પરાગ મુશ્કેલીમાં મુકાયો છે. પંજાબ કિંગ્સ સામેની મેચ દરમિયાન વેપિંગ કરતો વીડિયો વાયરલ થયા બાદ હવે તેના પર ગંભીર કાર્યવાહી થઈ શકે છે. BCCIએ રિયાન પરાગ પાસે જવાબ માંગ્યો છે અને જલ્દી આ મામલે BCCI એક્શન લેશે.
IPL 2026 માં રાજસ્થાન રોયલ્સનો કેપ્ટન રિયાન પરાગ એક નવા વિવાદમાં ફસાઈ ગયો છે. રિયાન પરાગનો વેપિંગ કરતો વીડિયો સોશિયલ મીડિયા પર વાયરલ થયો હતો. ભારતમાં ઈ-સિગારેટ પર સખત પ્રતિબંધ છે છતાં પરાગનો વેપિંગ કરતો વીડિયો સામે આવતા વિવાદ વધ્યો છે.
આ મામલો હવે BCCI સુધી પહોંચ્યો છે, અને અહેવાલો અનુસાર BCCI એ રિયાન પરાગ પાસેથી ખુલાસો માંગ્યો છે. એવું કહેવામાં આવી રહ્યું છે કે આ મામલે તેની સામે ગંભીર કાર્યવાહી થઈ શકે છે, જોકે આ કાર્યવાહી તેના જવાબ પછી જ કરવામાં આવશે.
સરકારે ઈ-સિગારેટ પર પ્રતિબંધ મૂક્યો છે. BCCIના નિયમો અનુસાર પસંદગીના વિસ્તારો સિવાય ધૂમ્રપાન અને વેપિંગ પર સખત પ્રતિબંધ છે, અને રિયાન પરાગ ડ્રેસિંગ રૂમમાં આવું કરી રહ્યો હતો. હવે, રિયાન પરાગને તેના પરિણામ ભોગવવા પડશે. તેની સંપૂર્ણ મેચ ફી કાપી શકાય છે.
રિયાન પરાગ એકમાત્ર ક્રિકેટર નથી જેણે સિગારેટ અથવા ઈ-સિગારેટ પીધી છે. તેના પહેલા અનેક ક્રિકેટરો આવું કરતા કેમેરામાં કેદ થયા હતા. IPL 2026માં થોડા દિવસ પહેલા જ ગુજરાત ટાઈટન્સના ફાસ્ટ બોલર કાગીસો રબાડાનો સ્મોકિંગ કરતો વીડિયો વાયરલ થયો હતો.
રિયાન પરાગનું IPL 2026 માં અત્યાર સુધી કંઈ ખાસ સારું પ્રદર્શન રહ્યું નથી. તેણે નવ મેચમાં 14.6 ની સરેરાશથી ફક્ત 117 રન બનાવ્યા છે, તેનો સ્ટ્રાઇક રેટ 124.4 છે. રિયાન પરાગ તેના ખરાબ પ્રદર્શન માટે ખૂબ જ ટ્રોલ થયો છે, અને હવે તે તેની આ મોટી ભૂલ માટે સમાચારમાં છે.
જોકે, સારા સમાચાર એ છે કે રિયાન પરાગની કેપ્ટનશીપ હેઠળ રાજસ્થાનની ટીમ સારું પ્રદર્શન કરી રહી છે. મંગળવારે, રાજસ્થાને પંજાબને છ વિકેટથી હરાવ્યું. રાજસ્થાન રોયલ્સે આ સિઝનમાં નવમાંથી છ મેચ જીતી છે અને પોઈન્ટ ટેબલમાં ત્રીજા સ્થાને છે. (PC:PTI/X)
