Breaking News: ગુજરાત સામે કારમી હાર બાદ હૈદરાબાદને ડબલ ઝટકો, BCCIએ SRHના કેપ્ટનને ફટકાર્યો દંડ
નરેન્દ્ર મોદી સ્ટેડિયમમાં ગુજરાત ટાઈટન્સ સામે રમાયેલી મેચ સનરાઈઝર્સ હૈદરાબાદ માટે દુઃસ્વપ્ન સાબિત થઈ. ટીમને મેદાન પર તેની સૌથી શરમજનક હારનો સામનો કરવો પડ્યો એટલું જ નહીં, પરંતુ મેચ પછી કેપ્ટન પેટ કમિન્સને પણ દંડ ફટકારવામાં આવ્યો હતો.
ગુજરાત ટાઈટન્સ સામે સનરાઈઝર્સ હૈદરાબાદને IPL ઈતિહાસની સૌથી શરમજનક હારનો સામનો કરવો પડ્યો, સાથે જ કેપ્ટન પેટ કમિન્સને સ્લો ઓવર રેટ બદલ BCCI દ્વારા 12 લાખ રૂપિયાનો દંડ ફટકારવામાં આવ્યો. આ હાર બાદ હૈદરાબાદની પ્લેઓફની આશાઓ પર પણ સવાલો ઊભા થયા છે.
નરેન્દ્ર મોદી સ્ટેડિયમમાં રમાયેલી આ મેચમાં ગુજરાત ટાઈટન્સે પહેલા બેટિંગ કરીને 168 રન બનાવ્યા હતા. જવાબમાં સનરાઈઝર્સ હૈદરાબાદની બેટિંગ લાઈનઅપ સંપૂર્ણપણે નિષ્ફળ ગઈ હતી. ટીમ માત્ર 14.5 ઓવરમાં 86 રનમાં ઓલઆઉટ થઈ ગઈ હતી, જે ફ્રેન્ચાઈઝનો IPL ઈતિહાસમાં સૌથી ઓછો સ્કોર છે.
હૈદરાબાદની શરૂઆત અત્યંત ખરાબ રહી હતી. રબાડા-સિરાજે પાવરપ્લેમાં જ SRH ના ટોપ ઓર્ડરને ઝટકા આપ્યા. શરૂઆતમાં ચાર મહત્વપૂર્ણ વિકેટ પડ્યા બાદ હૈદરાબાદ દબાણમાંથી બહાર આવી શક્યું નહીં. ગુજરાતના બોલરોએ સચોટ લાઈન અને લેન્થથી બેટ્સમેનોને રન બનાવવાની કોઈ તક આપી નહીં.
મિડલ ઓવરમાં જેસન હોલ્ડરે પણ ઘાતક બોલિંગ કરી SRH પર દબાણ બનાવ્યું.હૈદરાબાદના બેટ્સમેનો ખોટા શોટ પસંદ કરતા રહ્યા અને સતત વિકેટ ગુમાવતા રહ્યા. ટીમનો કોઈપણ બેટ્સમેન લાંબી ઈનિંગ રમી શક્યો નહોતો. પરિણામે ટીમનો આખો દાવ ઝડપથી સમેટાઈ ગયો હતો.
મેચ બાદ IPL મેનેજમેન્ટે સ્લો ઓવર રેટ માટે કેપ્ટન પેટ કમિન્સને 12 લાખ રૂપિયાનો દંડ ફટકાર્યો હતો. આ સિઝનમાં હૈદરાબાદની આ પહેલી ભૂલ હોવાથી દંડ માત્ર કેપ્ટન સુધી મર્યાદિત રાખવામાં આવ્યો હતો. અગાઉ આ જ કારણસર અક્ષર પટેલ અને શ્રેયસ અય્યરને પણ દંડ થયો હતો.
મોટી હાર છતાં પેટ કમિન્સે ટીમનો આત્મવિશ્વાસ જાળવવાનો પ્રયાસ કર્યો હતો. તેણે કહ્યું કે હજુ પણ બાકીની મેચોમાં જીત મેળવીને ટીમ પ્લેઓફની રેસમાં ટકી શકે છે. કમિન્સે ખેલાડીઓને આ ખરાબ પ્રદર્શનને ભૂલી ફરીથી જીતની લયમાં પરત ફરવા અપીલ કરી હતી. (PC:PTI/X)
