Breaking News: 7 વર્ષની બાદશાહત દાવ પર, શું વેસ્ટ ઈન્ડિઝ તોડી શકશે ટીમ ઈન્ડિયાનો મજબૂત ગઢ ?
ટીમ ઈન્ડિયાને T20 શ્રેણી જીતવા માટે વેસ્ટ ઈન્ડિઝ સામેની અંતિમ મેચ જીતવી પડશે. આ દરમિયાન, વેસ્ટ ઈન્ડિઝ ઇતિહાસ રચવા માટે તૈયાર છે. ટીમ ઈન્ડિયા ભારતમાં છેલ્લા 7 વર્ષથી T20 શ્રેણી હાર્યું નથી. એવામાં શું વેસ્ટ ઈન્ડિઝ ટીમ ઈન્ડિયાની 7 વર્ષની બાદશાહત ખતમ કરી શકશે? એ મોટો સવાલ છે જેનો જવાબ 17 ઓક્ટોબરે બેંગલુરુમાં મળશે.
ભારત અને વેસ્ટ ઈન્ડિઝ વચ્ચેની પાંચ મેચની રોમાંચક T20 શ્રેણી એક મહત્વપૂર્ણ અને ઐતિહાસિક વળાંક પર પહોંચી ગઈ છે. પ્રથમ ચાર મેચમાં જોરદાર ટક્કર બાદ શ્રેણી 2-2 થી બરાબર છે.
બંને ટીમો વચ્ચે પાંચમી અને અંતિમ મેચ 17 ઓક્ટોબરે બેંગલુરુના એમ ચિન્નાસ્વામી સ્ટેડિયમ ખાતે રમાશે. આ મેચ ટીમ ઈન્ડિયા માટે શ્રેણી જીતવાની લડાઈ જ નહીં, પરંતુ છેલ્લા 7 વર્ષથી ઘરઆંગણે તેમના વર્ચસ્વની મોટી કસોટી પણ છે.
ભારતની ધરતી પર ટીમ ઈન્ડિયાનો T20I રેકોર્ડ છેલ્લા 7 વર્ષથી શાનદાર રહ્યો છે. ભારત છેલ્લે 2019માં ઘરઆંગણે T20I શ્રેણી હાર્યું હતું.
એરોન ફિન્ચની આગેવાની હેઠળની ઓસ્ટ્રેલિયન ટીમે ભારતનો પ્રવાસ કર્યો હતો અને બે મેચની શ્રેણીમાં ભારતને 2-0 થી ક્લીન સ્વીપ કર્યું હતું. તે હાર પછી, ભારતીય ટીમે ઘરઆંગણે ઘણી ટોપની ટીમોને હરાવી છે અને ઘરઆંગણે સતત જીતનો સિલસિલો જાળવી રાખ્યો છે.
હવે, વેસ્ટ ઈન્ડિઝ પાસે આ સાત વર્ષ જૂના જાદુને તોડવાની તક છે. આ શ્રેણીમાં વેસ્ટ ઈન્ડિઝના બેટ્સમેનોએ આક્રમક બેટિંગથી ભારતીય બોલરોની હાલત ખરાબ કરી છે. જો ભારતીય ટીમ બેંગલુરુમાં હારે છે, તો તેમને 2019 પછી પહેલીવાર ઘરઆંગણે T20 શ્રેણીમાં હારનો સામનો કરવો પડશે.
દરમિયાન, વેસ્ટ ઈન્ડિઝ પાસે સતત બીજી વખત T20 શ્રેણીમાં ભારતને હરાવવાની તક છે. બંને ટીમો વચ્ચે છેલ્લી T20 શ્રેણી 2023માં રમાઈ હતી, જેમાં વિન્ડીઝે 3-2 થી જીત મેળવી હતી.
શ્રેણીની ચાર મેચોએ બંને ટીમોની તાકાત અને નબળાઈઓ છતી થઈ છે. ક્યારેક ભારતીય ટીમે વિજય મેળવ્યો છે, તો ક્યારેક કેરેબિયન બેટ્સમેનોએ 240 થી વધુ રન બનાવીને મેચનું પરિણામ પલટી નાખ્યું છે.
બેંગલુરુનું એમ ચિન્નાસ્વામી સ્ટેડિયમ તેની ટૂંકી બાઉન્ડ્રી અને બેટ્સમેન-ફ્રેન્ડલી વિકેટ માટે જાણીતું છે. આવી સ્થિતિમાં વેસ્ટ ઈન્ડિઝના પાવર-હિટરોને રોકવા ભારતીય બોલરો માટે મુશ્કેલ પડકાર હશે, જ્યારે ભારતીય બેટ્સમેન પર પણ મોટો સ્કોર કરવાનું દબાણ હશે. (PC:PTI/X)
Published On - 5:20 pm, Fri, 16 October 26
