IND vs SL: ગાલે ટેસ્ટમાં સિરાજનો સાથ કોણ આપશે? આ બે બોલરો વચ્ચે જોરદાર ટક્કર
15 ઓગસ્ટથી ભારત અને શ્રીલંકા વચ્ચે ટેસ્ટ શ્રેણી શરૂ થવાની છે. ગાલેમાં રમાનારી પહેલી ટેસ્ટમાં ટીમ ઈન્ડિયાના ઝડપી બોલિંગ આક્રમણને લઈને એક મોટો સવાલ છે. જસપ્રીત બુમરાહની ગેરહાજરીમાં મોહમ્મદ સિરાજનો સાથ કોણ આપશે? આ સ્થાન માટે બે બોલરો વચ્ચે જોરદાર સ્પર્ધા જોવા મળી રહી છે.
ગાલેની પિચ પર સ્પિનરોને મદદ મળવાની શક્યતા હોવાથી ટીમ ઈન્ડિયા વધુમાં વધુ બે ઝડપી બોલરો સાથે મેદાનમાં ઉતરી શકે છે. સિરાજનું સ્થાન લગભગ નક્કી માનવામાં આવે છે, પરંતુ બીજા ઝડપી બોલર માટે પસંદગી મુશ્કેલ બની છે.
આ સ્થાન માટે પ્રસિદ્ધ કૃષ્ણા અને ગુરનુર બ્રાર વચ્ચે મુખ્ય સ્પર્ધા છે. પ્રેક્ટિસ મેચમાં બંનેએ પોતાની બોલિંગથી પસંદગીકારોનું ધ્યાન ખેંચ્યું છે.
પ્રસિદ્ધ કૃષ્ણાએ પહેલી ઇનિંગમાં 8 ઓવરમાં 32 રન આપ્યા હતા, પરંતુ તેને એક પણ વિકેટ મળી નહોતી. બીજી ઇનિંગમાં તેણે 35 રન આપીને એક વિકેટ ઝડપી હતી.
બીજી તરફ, ગુરનુર બ્રારે પહેલી ઇનિંગમાં 12 ઓવરમાં 49 રન આપીને એક વિકેટ લીધી હતી, જ્યારે બીજી ઇનિંગમાં 8 ઓવરમાં 37 રન આપીને બે વિકેટ ઝડપી હતી. તેની બોલિંગમાં વધુ ધાર જોવા મળી હતી.
આ પ્રદર્શનને જોતા ગુરનુર બ્રારને તક મળી શકે છે. બ્રાર બેટિંગમાં પણ યોગદાન આપી શકે છે. તેથી, જો 15 ઓગસ્ટે ગાલેમાં તેને ટેસ્ટ ડેબ્યૂ કરવાની તક મળે તો આશ્ચર્ય નહીં થાય. (PC:PTI/X)
Published On - 9:53 pm, Mon, 10 August 26
