IND vs ENG: અભિષેક શર્માનું ઈંગ્લેન્ડમાં તોફાન, 20 બોલમાં ફટકારી ફિફ્ટી, સૌથી ઝડપી 100 છગ્ગાનો બનાવ્યો રેકોર્ડ
આયર્લેન્ડ પ્રવાસમાં માત્ર એક રનથી અડધી સદી ચૂકી ગયેલા અભિષેક શર્માએ આ વખતે અડધી સદી ફટકારી હતી. આ સાથે જ ઈંગ્લેન્ડમાં ભારતીય ખેલાડી માટે સૌથી ઝડપી T20 આંતરરાષ્ટ્રીય અડધી સદીનો રેકોર્ડ પણ બનાવ્યો છે.
ભારતીય T20 ટીમના સ્ટાર ઓપનર અભિષેક શર્માના સ્થાન અંગે ભલે પ્રશ્નો ઉભા થઈ રહ્યા હોય, ભલે તેની જગ્યાએ વૈભવ સૂર્યવંશીને રમવાની માંગ થઈ રહી હોય, પરંતુ તેની તોફાની બેટિંગ ચાલુ રહી અને હવે અભિષેકે છગ્ગાનો નવો રેકોર્ડ બનાવ્યો છે.
અભિષેક શર્માએ ચેસ્ટર-લે-સ્ટ્રીટ ખાતે ઈંગ્લેન્ડ સામેની શ્રેણીની પહેલી મેચમાં 100 T20I સિક્સર પૂરી કરી હતી. તેણે ચોથી ઓવરમાં સાકિબ મહમૂદની બોલ પર સિક્સર ફટકારીને આ સિદ્ધિ મેળવી હતી.
આ મેચ પહેલા 98 છગ્ગા ફટકારી ચૂકેલા અભિષેકે ત્રીજી ઓવરમાં પોતાનો 99 મો છગ્ગો ફટકાર્યો અને પછી ચોથી ઓવરમાં પોતાની ફિફ્ટી પૂરી કરી. આ સાથે, તેણે સૌથી ઝડપી (બોલની દ્રષ્ટિએ) 100 છગ્ગા ફટકારવાનો રેકોર્ડ બનાવ્યો.
અભિષેકે પોતાની 49 મી T20 આંતરરાષ્ટ્રીય મેચમાં 785 બોલમાં 100 છગ્ગા ફટકાર્યા, અને ICC પૂર્ણ સભ્ય દેશોમાં સૌથી ઝડપી 100 છગ્ગા ફટકારવાનો રેકોર્ડ તોડ્યો. અગાઉ, આ રેકોર્ડ વેસ્ટ ઈન્ડિઝના એવિન લુઈસ (789) ના નામે હતો, પરંતુ અભિષેકે ચાર બોલમાં આ રેકોર્ડ તોડી નાખ્યો હતો.
અભિષેક હવે આ ફોર્મેટમાં 100 છગ્ગા ફટકારનાર પાંચમો ભારતીય બેટ્સમેન બની ગયો છે. રોહિત શર્મા (205) આ સિદ્ધિ મેળવનાર પ્રથમ ખેલાડી હતો, ત્યારબાદ વિરાટ કોહલી (124), સૂર્યકુમાર યાદવ (179) અને હાર્દિક પંડ્યા (126)નો ક્રમ આવે છે.
વધુમાં, અભિષેકે આ મેચમાં માત્ર 20 બોલમાં પોતાની અડધી સદી પૂરી કરી, જે ઈંગ્લેન્ડમાં ભારતીય બેટ્સમેન દ્વારા ફટકારવામાં આવેલી સૌથી ઝડપી T20I અડધી સદી છે. તેણે કેએલ રાહુલનો 27 બોલમાં ફિફ્ટીનો રેકોર્ડ તોડ્યો હતો. અભિષેકે પાંચમી વખત 20 બોલથી ઓછા સમયમાં પોતાની અડધી સદી પૂરી કરી હતી. (PC:PTI/X)
