Breaking News: ધોની-ડિવિલિયર્સને છોડો… રિષભ પંતે ટેસ્ટમાં વિરાટ કોહલી કરતા પણ વધુ રન બનાવ્યા છે !
ભારત-અફઘાનિસ્તાન ટેસ્ટ મેચ રિષભ પંત માટે ખાસ બની રહેશે, કારણ કે તે પોતાની કારકિર્દીની 50મી ટેસ્ટ રમવા ઉતરશે. જોકે આ મુકામ સુધી પહોંચતા પહેલાં જ પંતે ટેસ્ટ ક્રિકેટમાં પોતાનું સ્થાન મજબૂત કરી દીધું છે. પંતના ડેબ્યૂ પછીના આંકડાઓ પર નજર કરીએ તો તેણે રન બનાવવા મામલે વિરાટ કોહલીને પણ પાછળ છોડી દીધો છે.
ભારત અને અફઘાનિસ્તાન વચ્ચે 6 જૂનથી શરૂ થનારી ટેસ્ટ મેચ રિષભ પંત માટે ખાસ મહત્વ ધરાવે છે. આ તેની કારકિર્દીની 50મી ટેસ્ટ મેચ હશે. જોકે આ સીમાચિહ્ન સુધી પહોંચતા પહેલાં જ પંતે ટેસ્ટ ક્રિકેટમાં પોતાની આગવી ઓળખ બનાવી લીધી છે. બેટિંગ, દબાણભરી પરિસ્થિતિઓમાં પ્રદર્શન અને વિકેટકીપર-બેટ્સમેન તરીકેના આંકડાઓ તેને આધુનિક યુગના સૌથી પ્રભાવશાળી ટેસ્ટ ખેલાડીઓમાં સ્થાન અપાવે છે.
ભારતીય ટીમના વિકેટકીપર-બેટ્સમેન રિષભ પંતે 2018માં ટેસ્ટ ક્રિકેટમાં ડેબ્યૂ કર્યા બાદ સતત સારું પ્રદર્શન કર્યું છે. માત્ર 49 ટેસ્ટ મેચોમાં તેણે 3,476 રન નોંધાવ્યા છે, જે આ સમયગાળા દરમિયાન કોઈપણ ભારતીય બેટ્સમેન કરતાં વધુ છે. ખાસ વાત એ છે કે તેણે પૂર્વ ભારતીય કેપ્ટન વિરાટ કોહલી કરતાં પણ વધુ ટેસ્ટ રન બનાવ્યા છે.
પંતના ડેબ્યૂ પછીના આંકડાઓ પર નજર કરીએ તો વિરાટ કોહલીએ 55 ટેસ્ટમાં 3,436 રન બનાવ્યા છે, જ્યારે રવિન્દ્ર જાડેજા 2,899 રન સાથે ત્રીજા સ્થાને છે. આ આંકડાઓ દર્શાવે છે કે છેલ્લા કેટલાક વર્ષોમાં ટેસ્ટ ક્રિકેટમાં પંત ભારતના સૌથી વિશ્વસનીય બેટ્સમેન તરીકે ઉભરી આવ્યો છે.
મુશ્કેલ પરિસ્થિતિઓમાં બેટિંગ કરવાની તેની ક્ષમતા પંતને અન્ય ખેલાડીઓથી અલગ બનાવે છે. 2021 બાદ જ્યારે ભારતે શરૂઆતમાં જ બે વિકેટ ગુમાવી હોય તેવી 13 પરિસ્થિતિઓમાં પંતે 61.1ની સરેરાશથી રન બનાવ્યા છે. ટીમના કુલ રનમાં તેનો ફાળો 30 ટકાથી વધુ રહ્યો છે, જે તેની મેચ બદલવાની ક્ષમતાને દર્શાવે છે.
વિકેટકીપર-બેટ્સમેન તરીકે પણ પંત નવા માપદંડ સ્થાપિત કરી રહ્યો છે. ટેસ્ટ ક્રિકેટમાં ટોપ-6માં બેટિંગ કરતી વખતે તેણે 2,745 રન બનાવ્યા છે. આ યાદીમાં તે ચોથા સ્થાને છે અને માત્ર કુમાર સંગાકારા, એલેક સ્ટુઅર્ટ અને એન્ડી ફ્લાવર જ તેના આગળ છે.
પંતે આ મામલે મહેન્દ્ર સિંહ ધોની અને એબી ડી વિલિયર્સ જેવા દિગ્ગજોને પણ પાછળ છોડી દીધા છે. હવે અફઘાનિસ્તાન સામેની તેની 50 મી ટેસ્ટ માત્ર એક સીમાચિહ્ન નહીં, પરંતુ ફરી એકવાર પોતાની પ્રતિભા સાબિત કરવાની મોટી તક બની રહેશે. (PC:PTI/X)
