Breaking News: IPL 2026 બાદ 15 વર્ષીય વૈભવ સૂર્યવંશીની બ્રાન્ડ વેલ્યુમાં જબરદસ્ત ઉછાળો, પ્રતિ ડીલ વસૂલે છે કરોડો રૂપિયા
IPL 2026માં પોતાના વિસ્ફોટક પ્રદર્શનથી ક્રિકેટ જગતમાં ધૂમ મચાવનાર રાજસ્થાન રોયલ્સના યુવા બેટ્સમેન વૈભવ સૂર્યવંશીની લોકપ્રિયતા હવે મેદાનની બહાર પણ ઝડપથી વધી રહી છે. માત્ર 15 વર્ષની ઉંમરે તેણે ક્રિકેટ ઉપરાંત જાહેરાત ક્ષેત્રમાં પણ મોટી ઓળખ બનાવી છે, જેના કારણે તેની બ્રાન્ડ એન્ડોર્સમેન્ટ ફીમાં જબરદસ્ત વધારો થયો છે.
IPL 2026ની સિઝન ભલે પૂર્ણ થઈ ગઈ હોય, પરંતુ વૈભવ સૂર્યવંશી હજુ પણ ચર્ચાના કેન્દ્રમાં છે. રાજસ્થાન રોયલ્સના આ યુવા બેટ્સમેને પોતાની આક્રમક બેટિંગથી ક્રિકેટપ્રેમીઓને દિવાના બનાવ્યા છે. તેની સફળતાનો સીધો ફાયદો હવે તેની બ્રાન્ડ વેલ્યુમાં જોવા મળી રહ્યો છે.
વૈભવે આ સિઝનમાં 16 ઈનિંગ્સમાં 237.30 ના અદ્ભુત સ્ટ્રાઈક રેટ સાથે 776 રન બનાવ્યા હતા. તેણે ન માત્ર ઓરેન્જ કેપ જ જીતી, પણ સિઝનનો સૌથી મૂલ્યવાન ખેલાડી (MVP)નો એવોર્ડ પણ પોતાના નામે કર્યો હતો. તેના આ શાનદાર પ્રદર્શનથી વૈભવ દેશનો સૌથી ચર્ચિત યુવા ક્રિકેટર બની ગયો છે.
મીડિયા રિપોર્ટ્સ અનુસાર, IPL 2026 પહેલા વૈભવ એક બ્રાન્ડ ડીલ માટે આશરે 1 કરોડ રૂપિયા ચાર્જ કરતો હતો. તેણે કોમ્પ્લેન અને રેડ બુલ જેવી જાણીતી કંપનીઓ સાથે આ દરે કરાર કર્યા હતા. જોકે, તાજેતરના પ્રદર્શન બાદ તેની ફી વધીને 1.5 કરોડથી 2 કરોડ રૂપિયા પ્રતિ ડીલ થઈ ગઈ હોવાનું કહેવાય છે.
ક્રિકેટ વર્તુળમાં એવી પણ ચર્ચા ચાલી રહી છે કે ભવિષ્યમાં જો વૈભવ IPL મેગા ઓક્શનમાં ઉતરે, તો તેના માટે 30 કરોડ રૂપિયા સુધીની ઐતિહાસિક બોલી લાગી શકે છે. હાલમાં તેની બ્રાન્ડ અને પ્રોફેશનલ ડીલ તેના માતા-પિતા કરી રહ્યા છે.
જોકે, નાની ઉંમરે મળેલી આટલી મોટી સફળતા વચ્ચે નિષ્ણાતો સાવધાની રાખવાની સલાહ આપી રહ્યા છે. તેઓ માને છે કે વૈભવે ક્રિકેટ પર સંપૂર્ણ ધ્યાન કેન્દ્રિત કરવું જરૂરી છે, જેથી તે લાંબા ગાળે ભારતીય ક્રિકેટનો મોટો સ્ટાર બની શકે. (PC:PTI/X)
