Canada PR : 3 નવી કેટેગરીમાં કામ કરતા લોકોને મળશે PR, જુઓ નોકરીઓનું લિસ્ટ
કેનેડાએ કુશળ કામદારોની અછત દૂર કરવા 3 નવી ઇમિગ્રેશન શ્રેણીઓ જાહેર કરી છે. આ અંતર્ગત કેનેડિયન કાર્ય અનુભવ ધરાવતા લોકો ખાસ કેટેગરીમાં તાત્કાલિક PR મળશે.
કેનેડામાં અનેક ક્ષેત્રોમાં કુશળ કામદારોની ભારે અછત છે. આ સમસ્યાનો ઉકેલ લાવવા માટે કેનેડિયન સરકારે હવે મહત્વપૂર્ણ પગલું ભર્યું છે. સરકારે 3 નવી ઇમિગ્રેશન શ્રેણીઓની જાહેરાત કરી છે, જેના અંતર્ગત પસંદગીના ક્ષેત્રોમાં કામ કરતા લોકોને કાયમી નિવાસ એટલે કે PR આપવામાં આવશે.
આ નવી શ્રેણીઓ સંશોધન, આરોગ્યસંભાળ, ઉડ્ડયન અને પરિવહન જેવા મહત્વપૂર્ણ ક્ષેત્રોને આવરી લે છે. આ નિર્ણય વડા પ્રધાન માર્ક કાર્નીના ધ્યેયો સાથે સુસંગત છે, જેમાં કુશળ કામદારો અને સંશોધકોને આકર્ષવા સાથે દેશમાં નવા કાયમી રહેવાસીઓની સંખ્યા નિયંત્રિત કરવાનો સમાવેશ થાય છે. સાથે સાથે, યુનાઇટેડ સ્ટેટ્સ પરની નિર્ભરતા ઘટાડવા માટે રક્ષણ અને વ્યૂહાત્મક ક્ષમતાઓ મજબૂત કરવાની યોજના પણ સામેલ છે.
અહીં ધ્યાનમાં રાખવું જરૂરી છે કે આ ત્રણ નવી ઇમિગ્રેશન શ્રેણીઓ હેઠળ PR ફક્ત તે લોકોને મળશે જેમની પાસે Canadian work experience હશે. આવા ઉમેદવારો એક્સપ્રેસ એન્ટ્રી સિસ્ટમ દ્વારા અરજી કરી શકશે. માત્ર એક વર્ષનો Canadian work experience હોવા છતાં PR માટે અરજી કરી શકાય છે.
Canadian work experience ધરાવતા સિનિયર મેનેજરો : પ્રથમ ઇમિગ્રેશન શ્રેણી સિનિયર મેનેજરો માટે છે. બાંધકામ, પરિવહન, ઉત્પાદન અને યુટિલિટી ક્ષેત્રોમાં કાર્યરત સિનિયર મેનેજરો આ શ્રેણી હેઠળ PR માટે પાત્ર બનશે. ઉપરાંત વેપાર, પ્રસારણ અને અન્ય સેવા ક્ષેત્રોના સિનિયર મેનેજરો પણ અરજી કરી શકશે.
આ ઉપરાંત આરોગ્ય, શિક્ષણ, સામાજિક અને સમુદાય સેવાઓ તેમજ સભ્યપદ આધારિત સંસ્થાઓમાં કાર્યરત સિનિયર મેનેજરોને પણ આ યોજના હેઠળ સામેલ કરવામાં આવ્યા છે. ફાઇનાન્સ, કોમ્યુનિકેશન અને અન્ય વ્યવસાયિક સેવાઓમાં કામ કરતા ઉચ્ચ સ્તરના મેનેજરો પણ આ શ્રેણીનો લાભ લઈ શકશે.
Canadian work experience ધરાવતા સંશોધકો : બીજી ઇમિગ્રેશન શ્રેણી કેનેડામાં કાર્ય અનુભવ ધરાવતા સંશોધકો માટે છે. કોલેજો, યુનિવર્સિટીઓ અને વ્યાવસાયિક સંસ્થાઓમાં શિક્ષણ આપતા શિક્ષકો, પ્રોફેસરો અને સંશોધન સહાયકો PR માટે પાત્ર ગણાશે.
તે ઉપરાંત યુનિવર્સિટીના પ્રોફેસરોને પણ આ નવી ઇમિગ્રેશન શ્રેણી હેઠળ કાયમી નિવાસ માટે અરજી કરવાની તક મળશે. કેનેડા સંશોધન અને શિક્ષણ ક્ષેત્રને વધુ મજબૂત બનાવવા માટે આ પગલું લઈ રહ્યું છે.
પરિવહન અને ઉડ્ડયન સંબંધિત નોકરીઓ : ત્રીજી શ્રેણી પરિવહન અને ઉડ્ડયન ક્ષેત્ર સાથે જોડાયેલી નોકરીઓ માટે છે. એર પાઇલોટ્સ, ફ્લાઇટ એન્જિનિયરો અને ફ્લાઇંગ ઇન્સ્ટ્રક્ટર્સ આ શ્રેણી હેઠળ PR માટે અરજી કરી શકશે.
તે ઉપરાંત ઓટોમોટિવ સર્વિસ ટેકનિશિયન, ટ્રક અને બસ મિકેનિક્સ તથા મિકેનિકલ રિપેરર્સને પણ કાયમી વસવાટ માટે વિચારવામાં આવશે. એરક્રાફ્ટ મિકેનિક્સ, એરક્રાફ્ટ ઇન્સ્પેક્ટર્સ, ઇન્સ્ટ્રુમેન્ટ, ઇલેક્ટ્રિકલ અને એવિઓનિક્સ મિકેનિક્સ, ટેકનિશિયન અને ઇન્સ્પેક્ટર્સ પણ આ શ્રેણીમાં સામેલ છે.
કેનેડિયન સશસ્ત્ર દળોમાં સેવા આપનારાઓ માટે ખાસ તક : આ ઉપરાંત, જે વ્યક્તિઓએ કેનેડિયન સશસ્ત્ર દળોમાં ઓપરેશન્સ સભ્યો, વિશેષ સભ્યો અથવા કમિશન્ડ ઓફિસર તરીકે સેવા આપી છે, તેમને પણ પુનર્વસન માટે તક આપવામાં આવી રહી છે. આવા ઉમેદવારોને કેનેડિયન એક્સપિરિયન્સ ક્લાસ (CEC) હેઠળ PR માટે અરજી કરવાની મંજૂરી મળશે.
