Breaking News: ભારતના રણમાં ફૂટ્યો ‘તેલનો ફુવારો’: યુદ્ધ વચ્ચે દેશ માટે મોટા સમાચાર, તેલના ઉત્પાદનમાં 70% નો તોતિંગ ઉછાળો!
દુનિયા જ્યારે તેલના ભાવ વધારાથી ફફડી રહી છે, ત્યારે ભારતના રણમાંથી સારા સમાચાર આવ્યા છે. ઓઈલ ઈન્ડિયાએ આધુનિક ટેકનોલોજીની મદદથી પથ્થરો વચ્ચેથી રેકોર્ડબ્રેક ક્રૂડ ઓઈલ કાઢવામાં સફળતા મેળવી છે. જાણો કેવી રીતે આ 'દેશી તેલ' ભારતની અર્થવ્યવસ્થાને મજબૂત કરશે.
પશ્ચિમ એશિયામાં ચાલી રહેલા યુદ્ધ અને વૈશ્વિક બજારમાં તેલના ભાવમાં આવતા ઉતાર-ચઢાવ વચ્ચે ભારત માટે રાહતના મોટા સમાચાર આવ્યા છે. સરકારી કંપની ઓઈલ ઈન્ડિયા લિમિટેડ (OIL) એ રાજસ્થાનના થાર રણમાંથી ક્રૂડ ઓઈલના ઉત્પાદનમાં 70 ટકાનો જંગી ઉછાળો નોંધાવ્યો છે. જોધપુર સેન્ડસ્ટોન ફોર્મેશનમાંથી અત્યાર સુધીનું સૌથી વધુ ઉત્પાદન મેળવીને કંપનીએ નવો રેકોર્ડ સ્થાપિત કર્યો છે.
ઉત્પાદનમાં રેકોર્ડબ્રેક ઉછાળો: ઓઈલ ઈન્ડિયાએ તેનું દૈનિક ઉત્પાદન વધારીને 1,202 બેરલ કર્યું છે, જે ગયા વર્ષે માત્ર 705 બેરલ હતું. નાણાકીય વર્ષ 2025-26 દરમિયાન કુલ ઉત્પાદન 43,773 ટન સુધી પહોંચ્યું છે. આ સફળતા પાછળ 'સાયક્લિક સ્ટીમ સ્ટિમ્યુલેશન' (CSS) જેવી અત્યાધુનિક થર્મલ ટેકનોલોજીનો હાથ છે, જે પથ્થરોમાં ફસાયેલા ઘટ્ટ તેલને બહાર કાઢવામાં મદદરૂપ થાય છે.
કેવી રીતે રિફાઇનરી સુધી પહોંચે છે આ તેલ?: જેસલમેરના બાઘેવાલા વિસ્તારમાંથી કાઢવામાં આવેલું આ ક્રૂડ ઓઈલ ટેન્કરો દ્વારા ગુજરાતના મહેસાણા સ્થિત ONGC ના સેન્ટર પર લાવવામાં આવે છે. ત્યાંથી પાઈપલાઈન દ્વારા તેને ઈન્ડિયન ઓઈલની કોયલી રિફાઇનરી (વડોદરા) સુધી મોકલવામાં આવે છે.
ભારત માટે કેમ મહત્વનું?: ભારત તેની જરૂરિયાતનું મોટાભાગનું તેલ આયાત કરે છે. ઈરાન-ઈઝરાયેલ યુદ્ધના કારણે સપ્લાય ચેઈન ખોરવાય તેવા સમયે ઘરેલું ઉત્પાદનમાં વધારો થવો એ આશીર્વાદ સમાન છે. કંપનીએ ફિશબોન ડ્રિલિંગ અને ઈલેક્ટ્રિક ડાઉનહોલ હીટર જેવી આધુનિક પદ્ધતિઓ અપનાવીને અશક્યને શક્ય કરી બતાવ્યું છે.
આ સફળતા માત્ર તેલના ઉત્પાદન પૂરતી સીમિત નથી, પરંતુ તે ભારતના આત્મનિર્ભર બનવા તરફનું એક મોટું પગલું છે. બાઘેવાલા તેલ ક્ષેત્ર હવે ભારતની ઉર્જા સુરક્ષાની નવી આશા બની ગયું છે.
