ડાયનેમેટિક ટેક્નોલોજીસની સ્થાપના વર્ષ 1973 માં કરવામાં આવી હતી. DTL હાઈડ્રોલિક ગિયર પંપ અને ઓટોમોટિવ ટર્બોચાર્જરનું ઉત્પાદન કરે છે. આ ઉપરાંત એરોસ્પેસ, ઓટોમોટિવ અને હાઈડ્રોલિક ઉદ્યોગોમાં કાર્યરત છે. DTL યુરોપ અને ભારતમાં ઉત્પાદન સુવિધાઓ ધરાવે છે. કંપની હાઇડ્રોલિક ગિયર પંપ અને ઓટોમોટિવ ટર્બોચાર્જર્સના વિશ્વના સૌથી મોટા ઉત્પાદકોમાંનું એક છે.
ડાયનેમિક ટેકનોલોજીના શેર આજે 8 ફેબ્રુઆરીએ ફોકસમાં રહ્યા હતા. શેરમાં આજે 10 ટકાનો વધારો થયો અને 7,780 રૂપિયા પર પહોંચ્યો હતો. જે તેની 52 સપ્તાહની નવી ઊંચી સપાટી પણ છે. કંપનીના શેર ગઈકાલે 7,025 રૂપિયા પર બંધ થયા હતા. એટલે કે આજે શેરે 755 રૂપિયા વધ્યા હતા.
શેરના ભાવ વધાવાનું કારણ મોટો ઓર્ડર છે. એરબસે તેના A220 એરક્રાફ્ટના તમામ દરવાજા બનાવવાનો કોન્ટ્રાક્ટ આ ભારતીય કંપનીને આપ્યો છે. 'મેક ઇન ઈન્ડિયા' પહેલના વિસ્તરણ માટે તેને મહત્વપૂર્ણ માનવામાં આવી રહ્યું છે. નાગરિક ઉડ્ડયન મંત્રી જ્યોતિરાદિત્ય સિંધિયાની હાજરીમાં એક કાર્યક્રમમાં આ જાહેરાત કરવામાં આવી હતી.
જ્યોતિરાદિત્ય સિંધિયાએ કહ્યું કે, ભારત એરક્રાફ્ટ કમ્પોનન્ટ મેન્યુફેક્ચરિંગ પ્રવૃત્તિઓ માટે એક સ્થળ બની રહ્યું છે. તેમણે કહ્યું કે એરબસ માટે ભારતમાં રોકાણ કરવાનો આ યોગ્ય સમય છે. એરક્રાફ્ટ ઉત્પાદકનો હેતુ દેશમાંથી એરક્રાફ્ટના ઘટકોના 'સોર્સિંગ'ને US$1.5 બિલિયન સુધી વધારવાનો છે.
ડાયનેમેટિક ટેક્નોલોજીસના શેરે છેલ્લા 6 મહિનામાં ઈન્વેસ્ટર્સને 3034.05 રૂપિયાનું વળતર આપ્યું છે. શેર 6 માસમાં 72.85 ટકા વધ્યો હતો. જે ઈન્વેસ્ટરે એક વર્ષ પહેલા રોકાણ કર્યું હતું તેઓને હાલ 166.08 ટકાનું રિટર્ન મળ્યું છે. કંપનીએ 1 વર્ષ દરમિયાન 4493.45 રૂપિયાનું વળતર આપ્યું છે. શેરે છેલ્લા 5 વર્ષમાં 438.63 ટકાનું રિટર્ન આપ્યું છે.