Breaking News : ગુજરાતમાં આવેલો દેશનો પ્રથમ અમદાવાદ-વડોદરા ફોર લેન એક્સપ્રેસ વે કરાશે પહોળો, NHAIનો મોટો નિર્ણય
Ahmedabad Vadodara Expressway : મદાવાદ-વડોદરા એક્સપ્રેસવે (NE-1) ને હવે 4 થી 6 લેન સુધી પહોળો કરવામાં આવશે. છેલ્લા 21 વર્ષમાં વધતા ટ્રાફિક દબાણને કારણે NHAI દ્વારા આ નિર્ણય લેવાયો છે.
Ahmedabad Vadodara Expressway:ગુજરાતમાં દેશના પ્રથમ ચાર-માર્ગીય એક્સપ્રેસવે તરીકે ઓળખાતા અમદાવાદ–વડોદરા એક્સપ્રેસવે (NE-1) ને હવે વધુ પહોળો બનાવવાની તૈયારી શરૂ થઈ ગઈ છે. છેલ્લા 21 વર્ષમાં સતત વધતા ટ્રાફિકના દબાણને ધ્યાનમાં રાખીને National Highways Authority of India (NHAI) એ આ મહત્વનો નિર્ણય લીધો છે. કેન્દ્રીય માર્ગ પરિવહન અને હાઇવે મંત્રી Nitin Gadkari ની મંજૂરી બાદ ટૂંક સમયમાં વિગતવાર પ્રોજેક્ટ રિપોર્ટ (DPR) તૈયાર કરવાની પ્રક્રિયા શરૂ થશે.
અમદાવાદ અને વડોદરાને જોડતો આ એક્સપ્રેસવે ગોલ્ડન ક્વોડ્રિલેટરલ પ્રોજેક્ટનો મહત્વનો ભાગ છે. હાલ એક્સપ્રેસવેમાં બંને બાજુ બે મુખ્ય લેન અને સર્વિસ લેન છે, પરંતુ હવે તેને છ લેન સુધી વિસ્તૃત કરવાનો નિર્ણય લેવામાં આવ્યો છે. NHAI એ DPR તૈયાર કરવા માટે ટેન્ડર પણ બહાર પાડ્યું છે. એક્સપ્રેસવેનો મોટાભાગનો ભાગ હાલમાં સમારકામ હેઠળ છે અને તેને ગુજરાતના શ્રેષ્ઠ હાઇવેમાં ગણવામાં આવે છે.
એક્સપ્રેસવેનું મહત્વ આગામી વર્ષોમાં વધુ વધવાનું છે. ખાસ કરીને 2030 કોમનવેલ્થ ગેમ્સ પહેલા આ માર્ગની ક્ષમતામાં વધારો થવાથી મોટા ઇવેન્ટ દરમિયાન પરિવહન વ્યવસ્થા સરળ બનશે. પહોળો કરવામાં આવ્યા બાદ વાહનચાલકોને ઝડપી, સલામત અને સરળ મુસાફરીનો અનુભવ મળશે.
2004માં શરૂ થયેલો આ એક્સપ્રેસવે છેલ્લા બે દાયકાથી ગુજરાત માટે ગેમ-ચેન્જર સાબિત થયો છે. તત્કાલીન અટલ બિહારી વાજપેયી સરકારના સમયમાં ગોલ્ડન ક્વોડ્રિલેટરલ યોજના હેઠળ શરૂ થયેલા આ માર્ગને ‘મહાત્મા ગાંધી એક્સપ્રેસવે’ નામ આપવામાં આવ્યું હતું. અમદાવાદ, નડિયાદ, આણંદ અને વડોદરાને જોડતો આ કોરિડોર અમદાવાદ–વડોદરા વચ્ચેનો મુસાફરી સમય 2.5 કલાકથી ઘટાડીને અંદાજે 1 કલાક સુધી લાવવાનો ઉદ્દેશ રાખતો હતો.
NHAI અનુસાર, છેલ્લા વર્ષોમાં ઝડપી શહેરીકરણ, ઔદ્યોગિક વિકાસ, વસ્તી વૃદ્ધિ અને લોજિસ્ટિક્સ પ્રવૃત્તિમાં થયેલા વધારાના કારણે ટ્રાફિકમાં નોંધપાત્ર વધારો થયો છે. હાલ આ એક્સપ્રેસવે પરથી દરરોજ અંદાજે 51,000 વાહનો પસાર થાય છે. ઉપરાંત, આ માર્ગ મુંબઈ–દિલ્હી વચ્ચે બની રહેલા NE-4 એક્સપ્રેસવેને પણ ક્રોસ કરે છે, જેના કારણે તેની વ્યૂહાત્મક મહત્વતા વધુ વધી છે. એક્સપ્રેસવેની કુલ લંબાઈ 93.302 કિલોમીટર છે અને NHAI પાસે બંને બાજુ પહેલેથી જ આશરે 50 મીટર જમીન ઉપલબ્ધ હોવાથી નવા જમીન સંપાદનની જરૂર પડશે નહીં. બે નવી લેન ઉમેરવાથી ટ્રાફિકની ભીડ ઘટશે, માર્ગ સલામતીમાં સુધારો થશે અને અમદાવાદ, વડોદરા તેમજ મુંબઈ તરફની મુસાફરી વધુ સરળ અને ઝડપી બનશે.
