અમદાવાદનો SP રિંગ રોડ બનશે 6 લેન, જાણો સંપૂર્ણ પ્રોજેક્ટની વિગતો
અમદાવાદના ટ્રાફિકના ભારને ઘટાડવા માટે, AUDA દ્વારા 2200 કરોડના ખર્ચે 76 કિમી લાંબા SP રિંગ રોડને 6 લેનમાં વિસ્તૃત કરવાની યોજના છે. જેના થકી અમદાવાદના લોકોને લાભ થશે.
અમદાવાદ શહેરમાં ટ્રાફિક સમસ્યાઓને ધ્યાનમાં રાખીને, એસપી રિંગ રોડને 6 લેનમાં વિસ્તૃત કરવાની યોજના બનાવવામાં આવી છે. Ahmedabad Urban Development Authority (AUDA) દ્વારા 2,200 કરોડ રૂપિયાના ખર્ચે 76 કિલોમીટરના રિંગ રોડના પુનઃવિકાસ માટે કાર્ય શરૂ કરાયું છે. આ અંતર્ગત પશ્ચિમમાં 39 કિમી અને પૂર્વમાં 37 કિમીનો વિસ્તાર આવરી લેવાશે.
રિંગ રોડના વિસ્તરણની મુખ્ય વિગતો ચકાસીએ તો વર્તમાન 60 મીટર પહોળા રિંગ રોડને 90 મીટર સુધી વિસ્તૃત કરવામાં આવશે. ટેન્ડર પ્રક્રિયા પૂર્ણ થયા પછી, 3-4 વર્ષમાં પ્રોજેક્ટનું કામ પૂર્ણ થવાની સંભાવના છે. 6 ફૂટનો નવો ઓવરબ્રિજ પણ બનાવવામાં આવશે, જેનાથી આસપાસના વિસ્તારના નાગરિકોને સુવિધા મળશે.
મુખ્ય પુલ અને અંડરપાસની વાત કરવામાં આવે તો ભાટ અને કમોડ પુલની બંને બાજુ નવા 3-લેન પુલ બનાવાશે. ચિલોડા, ભાટ અને અસલાલી સર્કલ પર 6 લેનના અંડરપાસની રચના કરવામાં આવશે. ત્રાગડ અંડરપાસની બંને બાજુ એક નવી લેન ઉમેરાશે. 34 કિમી લાંબા સર્વિસ રોડને 2 લેનમાંથી 4 લેનમાં પરિવર્તિત કરવામાં આવશે. 15 કિમી લાંબા સર્વિસ રોડને 3 લેનમાં વિસ્તૃત કરાશે.
ટ્રાફિક સમસ્યાનું ઉકેલ: શહેરના વિકાસ સાથે ટ્રાફિકનો ભાર વધતાં નાગરિકોને દરરોજ ટ્રાફિક જામનો સામનો કરવો પડે છે. Ahmedabad Municipal Corporation (AMC) દ્વારા રિંગ રોડને 4 લેનથી 6 લેનમાં ફેરવવાની મંજૂરી આપવામાં આવી છે, જેનાથી લોકોને ટ્રાફિક સમસ્યામાં રાહત મળશે.
વધુ સગવડતા અને ગ્રીન હાઇવેની વાત કરવામાં આવે તો સર્વિસ રોડ 2 લેનમાંથી 3 અથવા 4 લેનમાં બદલાશે. ગ્રીન હાઇવે કોન્સેપ્ટને ધ્યાને રાખીને, રિંગ રોડ પર વૃક્ષારોપણ અને ફૂટપાથને વધુ સુવિધાસભર બનાવાશે. ધોલેરા એક્સપ્રેસ વે જંકશન પર નવા ફ્લાયઓવરનો નિર્માણ થશે, જેનાથી વાહનવ્યહાર સરળ બનશે. આ પ્રોજેક્ટ અંતર્ગત, અમદાવાદના એસપી રિંગ રોડ પર આગામી વર્ષોમાં મોટાપાયે પરિવર્તન જોવા મળશે, જે શહેરની અવરજવર અને સુવિધાઓમાં નોંધપાત્ર સુધારો લાવશે.
Published On - 8:49 am, Mon, 3 February 25
