શેરધારકો થયા ખુશખુશાલ ! આ કંપનીએ જાહેર કર્યું ‘1900%’ નું ડિવિડન્ડ, જાણો ખાતામાં ક્યારે આવશે પૈસા
દેશની એક દિગ્ગજ એન્જિનિયરિંગ કંપનીએ પોતાના શેરધારકોને એક મોટી ખુશખબર આપી છે. કંપનીએ તેના દરેક શેર પર મોટું ડિવિડન્ડ આપવાની જાહેરાત કરી છે, જેનાથી રોકાણકારોને સારો નફો થશે.
દિગ્ગજ એન્જિનિયરિંગ અને કન્સ્ટ્રક્શન કંપનીએ પોતાના શેરધારકોને એક મોટી ખુશખબર આપી છે. કંપનીએ નાણાકીય વર્ષ 2025-26 માટે પ્રતિ ઇક્વિટી શેર રૂ. 38 નું ફાઇનલ ડિવિડન્ડ (ડિવિડન્ડ) આપવાની જાહેરાત કરી છે. કંપનીના શેરની ફેસ વેલ્યુ રૂ. 2 છે, જેના હિસાબે આ ડિવિડન્ડ 1900 ટકા થાય છે. કંપનીના બોર્ડે ચોથા ક્વાર્ટરના પરિણામોની સાથે જ આ બમ્પર રિવોર્ડની જાહેરાત કરી હતી. ગયા વર્ષે પણ કંપનીએ પોતાના રોકાણકારોને પ્રતિ શેર રૂ. 34 નું ફાઇનલ ડિવિડન્ડ આપ્યું હતું પરંતુ તેની સરખામણીમાં આ વખતે રોકાણકારોની કમાણી વધુ થવાની છે.
કંપનીએ આ ડિવિડન્ડ માટે 22 મેને રેકોર્ડ ડેટ (Record Date) તરીકે નક્કી કરી છે. ટૂંકમાં, આ તારીખ સુધી જે રોકાણકારોના પોર્ટફોલિયોમાં L&T ના શેર હશે, તેઓ આ ડિવિડન્ડ મેળવવા માટે હકદાર બનશે. જો કે, રોકાણકારોને આ નાણાં મળવા માટે 10 જૂનના રોજ યોજાનારી કંપનીની આગામી એન્યુઅલ જનરલ મીટિંગ (AGM) માં શેરધારકોની મંજૂરીની રાહ જોવી પડશે. AGM માં મંજૂરી મળતાં જ તેનું પેમેન્ટ કરી દેવામાં આવશે. ડિવિડન્ડની જાહેરાત સાથે જ L&T એ જાન્યુઆરી-માર્ચ 2026 ક્વાર્ટરના આર્થિક પરિણામો પણ જાહેર કર્યા છે. માર્ચ ક્વાર્ટરમાં કંપનીનો કન્સોલિડેટેડ નેટ પ્રોફિટ વાર્ષિક ધોરણે 3 ટકા ઘટીને રૂ. 5,326 કરોડ રહ્યો છે, જે ગયા વર્ષના સમાન ક્વાર્ટરમાં રૂ. 5,497 કરોડ હતો.
જો કે, આ દરમિયાન કંપનીની રેવન્યુ (આવક) માં શાનદાર વધારો જોવા મળ્યો છે. ચોથા ક્વાર્ટરમાં L&T ની રેવન્યુ 11 ટકા વધીને રૂ. 82,762 કરોડ પર પહોંચી ગઈ છે, જે ગયા વર્ષના સમાન ક્વાર્ટરમાં રૂ. 74,392 કરોડ હતી. આ સિવાય કંપનીનો કામકાજી નફો (EBITDA) પણ 5 ટકાના વધારા સાથે રૂ. 8,610 કરોડ રહ્યો છે. સમગ્ર નાણાકીય વર્ષ 2025-26 (FY26) ની વાત કરીએ તો, ઇન્ફ્રા સેક્ટરની આ દિગ્ગજ કંપની માટે ઓર્ડરની દૃષ્ટિએ આ વર્ષ ઐતિહાસિક રહ્યું છે. L&T ગ્રુપને આખા વર્ષ દરમિયાન કુલ રૂ. 4,35,590 કરોડના નવા ઓર્ડર મળ્યા છે, જે ગયા વર્ષની સરખામણીમાં 22 ટકા વધુ છે. આમાં સૌથી મોટો હિસ્સો વિદેશી ઓર્ડર્સનો રહ્યો છે, જે રૂ. 2,51,078 કરોડ હતો અને કુલ ઓર્ડરના 58 ટકા હિસ્સો ધરાવે છે. કંપનીને આ ઓર્ડર ઇન્ફ્રાસ્ટ્રક્ચર, ટ્રાન્સપોર્ટેશન, પાવર ટ્રાન્સમિશન, રિન્યુએબલ્સ, હેવી સિવિલ ઇન્ફ્રાસ્ટ્રક્ચર અને ડિફેન્સ જેવા ઘણા અલગ-અલગ સેક્ટર્સમાંથી મળ્યા છે.
વાર્ષિક ધોરણે કંપનીની કુલ રેવન્યુ 12 ટકાની મજબૂતી સાથે રૂ. 2,85,874 કરોડ રહી છે, જેમાં વિદેશમાંથી આવતી રેવન્યુનો હિસ્સો 54 ટકા (રૂ. 1,53,738 કરોડ) હતો. કંપનીના ચેરમેન અને મેનેજિંગ ડિરેક્ટર એસ. એન. સુબ્રહ્મણ્યને પરિણામો પર ખુશી વ્યક્ત કરતા કહ્યું હતું કે, મજબૂત સ્થાનિક બજાર અને વધતી વૈશ્વિક હાજરીના જોરે કંપનીએ આ વર્ષે રૂ. 4 લાખ કરોડથી વધુના રેકોર્ડ ઓર્ડર મેળવ્યા છે. તેમણે જણાવ્યું કે, કંપની પોતાની વ્યૂહરચના હેઠળ કોર બિઝનેસ (મુખ્ય વ્યવસાય) પર ફોકસ કરી રહી છે.
તેમણે વધુમાં ઉમેર્યું કે, L&T એ પોતાના 'લક્ષ્ય-26' ના મોટાભાગના ટાર્ગેટ હાંસલ કરી લીધા છે અને હવે કંપની 'લક્ષ્ય-31' ના નવા તબક્કામાં કદમ મૂકી રહી છે. આ અંતર્ગત કંપનીનું પૂરું ફોકસ આર્ટિફિશિયલ ઇન્ટેલિજન્સ (AI), ડિજિટલ ટેકનોલોજી, ગ્રીન એનર્જી અને એડવાન્સ્ડ મેન્યુફેક્ચરિંગ જેવા ભવિષ્યના સેક્ટર્સ પર રહેશે.
