Uttar Pradesh: જ્ઞાનવાપી બાદ હવે જામા મસ્જિદમાં શિવ મંદિરનો દાવો, જાણો શું છે સમગ્ર મામલો?
બદાયૂંની જામા મસ્જિદને (Jama Masjid) લઈને વિવાદ શરૂ થયો છે. આ મસ્જિદને નીલકંઠ મહાદેવનું મંદિર હોવાનો દાવો કરતી અરજી સિવિલ કોર્ટમાં દાખલ કરવામાં આવી હતી.
ઉત્તર પ્રદેશના (Uttar Pradesh) વારાણસીની જ્ઞાનવાપી મસ્જિદ (Gyanvapi Masjid) પરિસરમાં શિવલિંગ હોવાનો દાવો કરવામાં આવ્યો હતો, જેના વિશે હજુ પણ કોર્ટમાં મામલો ચાલી રહ્યો છે. બદાયૂંની જામા મસ્જિદને (Jama Masjid) લઈને વિવાદ શરૂ થયો છે. આ મસ્જિદને નીલકંઠ મહાદેવનું મંદિર હોવાનો દાવો કરતી અરજી સિવિલ કોર્ટમાં દાખલ કરવામાં આવી હતી. સિવિલ કોર્ટે પણ આ અરજીની સુનાવણી માટે મંજૂરી આપી છે. તમને જણાવી દઈએ કે બદાયૂંની જામા મસ્જિદમાં નીલકંઠ મહાદેવ મંદિર હોવાનો દાવો કરતી અખિલ ભારતીય હિંદુ મહાસભા (ABHB)ની અરજી પર સુનાવણી કરતી વખતે સિવિલ કોર્ટે શુક્રવારે કેસ નોંધવાનો આદેશ આપ્યો છે. કોર્ટે આ મામલે આગામી સુનાવણી માટે 15 સપ્ટેમ્બરની તારીખ નક્કી કરી છે. આ અરજી 8 ઓગસ્ટના રોજ દાખલ કરવામાં આવી હતી.
બદાયૂંમાં જામા મસ્જિદ પર વિવાદ
TOI દ્વારા ટાંકવામાં આવેલા બીબીસીના અહેવાલ અનુસાર, હિંદુ મહાસભાની અરજીમાં દાવો કરવામાં આવ્યો છે કે બદાયૂંમાં આવેલી જામા મસ્જિદ એક સમયે હિંદુ રાજાનો કિલ્લો હતો. એવો દાવો કરવામાં આવ્યો છે કે આ મસ્જિદનું હાલનું માળખું નીલકંઠ મહાદેવના પ્રાચીન મંદિરને તોડીને બનાવવામાં આવ્યું છે. આ અરજી પર સુનાવણી કરતી વખતે કોર્ટે જામા મસ્જિદની ઈન્તેજામિયા કમિટી, ઉત્તર પ્રદેશ સુન્ની વક્ફ બોર્ડ, ઉત્તર પ્રદેશ પુરાતત્વ વિભાગ, કેન્દ્ર સરકાર, ઉત્તર પ્રદેશ સરકાર, બદાયૂં જિલ્લા મેજિસ્ટ્રેટ અને રાજ્યના મુખ્ય સચિવને પણ આ સંદર્ભે જવાબ દાખલ કરવાનો નિર્દેશ આપ્યો છે.
મસ્જિદના બંધ રૂમનો ઉલ્લેખ
આ અંગે અખિલ ભારતીય હિંદુ મહાસભાના જિલ્લા પ્રમુખ મુકેશ સિંહ પટેલે દાવો કર્યો હતો કે આ મસ્જિદને બદલે મંદિર હતું. એક રૂમનો ઉલ્લેખ કરતા તેમણે કહ્યું કે મંદિરના અસ્તિત્વ સાથે જોડાયેલા પુરાવા તેમાં છે અને તે લાંબા સમયથી બંધ છે. તેમણે કહ્યું કે હિંદુ મહાસભાએ કોર્ટને આ મામલે કેસ નોંધવા અને સર્વેનો આદેશ આપવા અપીલ કરી છે.
કોર્ટમાં કિલ્લાના પુરાવા રજૂ કરવામાં આવ્યા
અરજદારોના વકીલ વેદ પ્રકાશ ગુપ્તાએ જણાવ્યું કે અરજીમાં તેમણે આ મસ્જિદ અહીં એક કિલ્લો હોવાના તમામ પુરાવા કોર્ટ સમક્ષ મૂક્યા છે. આ સાથે પરિસરની અંદર મંદિર હોવાના તથ્યોનો પણ ઉલ્લેખ કરવામાં આવ્યો છે.
સૌથી જૂની મસ્જિદોમાંની એક
વાસ્તવમાં જામા મસ્જિદ બદાયૂંના મૌલવી ટોલા વિસ્તારમાં આવેલી છે. તેની ગણના દેશની સૌથી મોટી મસ્જિદોમાં થાય છે. આ ઉપરાંત, તે દેશની સૌથી જૂની મસ્જિદોમાંથી એક છે. આ મસ્જિદમાં એક સમયે 23 હજારથી વધુ લોકો એકઠા થઈ શકે છે.
