લાલ કીડીની ચટણી છે કોરોનાનો ઈલાજ? મામલો પહોંચ્યો સુપ્રીમ કોર્ટ, જાણો પછી શું થયું
સુપ્રીમમાં કરેલી અરજીમાં કહેવામાં આવ્યું હતું કે લાલ કીડી અને લીલા મરચાંને ભેળવીને બનાવેલી ચટણી ઓડિશા અને છત્તીસગઢ સહિત દેશના આદિવાસી વિસ્તારોમાં તાવ, ઉધરસ, શરદી, થાક, શ્વસન સમસ્યાઓ અને અન્ય રોગો માટે દવા તરીકે વપરાય છે. અને આ સાથે કોરોનાની દવા તરીકેની રજા માંગવામાં આવી હતી.
સુપ્રીમ કોર્ટે (Supreme Court) ગુરુવારે કહ્યું કે તે દેશભરમાં કોવિડ -19 ની (Corona) સારવાર માટે પરંપરાગત દવા અથવા ઘરેલું દવાના ઉપયોગનો આદેશ આપી શકાય નહીં. આ સાથે, કોર્ટે તે અરજીને પણ ફગાવી દીધી હતી, જેમાં જીવલેણ વાયરસ કોરોનાની સારવાર માટે લાલ કીડીની ચટણીનો (Red Ant Chutney) ઉપયોગ કરવાની રજા માંગવામાં આવી હતી. જસ્ટિસ ડીવાય ચંદ્રચુડ, જસ્ટિસ વિક્રમ નાથ અને જસ્ટિસ હિમા કોહલીની ખંડપીઠે કહ્યું કે ઘણી પરંપરાગત દવા છે, આપણા ઘરોમાં પણ પરંપરાગત દવા છે. તમારે આ સારવારના પરિણામો પણ તમારે પોતે જ સહન કરવા પડે છે, પરંતુ અમે આ પરંપરાગત દવાને સમગ્ર દેશમાં લાગુ કરવાનું કહી શકતા નથી.
ખંડપીઠે ઓડિશાના આદિવાસી સમુદાયના સભ્ય નયધર પાધિયાલને કોવિડ -19 ની રસી લેવાનો નિર્દેશ આપતી વખતે અરજી ફગાવી દીધી. અરજદાર તરફથી હાજર રહેલા એડવોકેટ અનિરુધ સાંગનેરિયાએ જણાવ્યું હતું કે ઓડિશા હાઇકોર્ટે તેમની અરજી ફગાવી દીધી હતી અને તેઓએ નિર્ણયને પડકાર્યો હતો. બેન્ચે કહ્યું કે સમસ્યા ત્યારે શરૂ થઈ જ્યારે હાઈકોર્ટે આયુષ મંત્રાલયના ડિરેક્ટર જનરલ અને વૈજ્ઞાનિક અને ઔદ્યોગિક સંશોધન પરિષદ (સીએસઆઈઆર) ને ત્રણ મહિનાની અંદર કોવિડ -19 ની સારવાર તરીકે લાલ કીડીની ચટણીનો ઉપયોગ કરવાના પ્રસ્તાવ પર નિર્ણય લેવા નિર્દેશ આપ્યો.
કોર્ટે અરજી ફગાવી દીધી
કોર્ટે કહ્યું કે અમે તેનો અંત લાવવા માંગીએ છીએ. એમ પણ કહ્યું કે અમે બંધારણની કલમ 136 હેઠળ વિશેષ રજા અરજી પર સુનાવણી કરવા માંગતા નથી, તેથી વિશેષ રજાની અરજી ફગાવી દેવામાં આવે છે. અરજીમાં કહેવામાં આવ્યું છે કે લાલ કીડી અને લીલા મરચાંને ભેળવીને બનાવેલી ચટણીનો ઉપયોગ ઓડિશા અને છત્તીસગઢ સહિત દેશના આદિવાસી વિસ્તારોમાં તાવ, ઉધરસ, શરદી, થાક, શ્વસન સમસ્યાઓ અને અન્ય રોગો માટે દવા તરીકે થાય છે.
શું હતી અરજી?
અરજીમાં દાવો કરવામાં આવ્યો છે કે લાલ કીડીની ચટણી ઔષધીય ગુણધર્મોથી સમૃદ્ધ છે અને તેમાં ફોર્મિક એસિડ, પ્રોટીન, કેલ્શિયમ, વિટામિન બી 12 અને ઝીંક હોય છે. એમ પણ કહ્યું કે કોવિડ -19 ની સારવારમાં તેની અસર ચકાસવાની જરૂર છે.
અગાઉ પૂર્વ ભારતના આદિવાસીઓ (Tribes) દ્વારા ફ્લૂ જેવા રોગોની સારવાર માટે પરંપરાગત રીતે ઔષધ તરીકે ઉપયોગમાં લેવાતી લાલ કીડીની ચટણી Corona ની દવા બની શકે તેમ છે કે કેમ તે ચકાસવા ઓડિશા હાઇકોર્ટ દ્વારા કેન્દ્ર સરકારના આયુષ મંત્રાલય તથા કાઉન્સિલ ફોર સાયન્ટિફિક એન્ડ ઇન્ડસ્ટ્રીઅલ રિસર્ચ (ICMR) ને આદેશ આપવામાં આવ્યો હતો. અને આ બાબતે 3 મહિનામાં તપાસ કરી અહેવાલ આપવામાં જણાવ્યું હતું. હાઇકોર્ટમાં આ અંગે એક જાહેર હિતની અરજી થઈ હતી. તે સંદર્ભમાં હાઇકોર્ટે આ આદેશ આપ્યો હતો. બાદમાં આ મામલો સુપ્રીમ પહોંચ્યો હતો.
