PM મોદીએ લાલ કિલ્લા પરથી સૌ કોઈને સ્પર્શતા મુદ્દે કરી જાહેરાત, જાણો
લાલ કિલ્લાની પ્રાચીર પરથી દેશને સંબોધન કરતા વડાપ્રધાન નરેન્દ્ર મોદીએ, ઘણી જાહેરાતો કરી છે. GSTના દર ઘટાડવા, યુવાનોને રોજગારી આપવા, નવા પરમાણુ રિએકટર્સ સ્થાપવા, દેશની સુરક્ષા વધારવા સાથે ઘૂસણખોરી અટકાવવા સહિતના ભારતીયોને સ્પર્શતા મુદ્દાઓને લઈને જાહેરાત કરી હતી.
વડાપ્રધાન મોદીએ GST સુધારા યોજના લાવવાની વાત કરી છે. PM મોદીએ કહ્યું કે આ દિવાળીએ એક મોટી ભેટ મળવાની છે. GST આવ્યાને 8 વર્ષ થઈ ગયા છે. અમે તેની સમીક્ષા કરી છે. અમે તેમાં સુધારા કરીને કરવેરા સરળ બનાવ્યા છે. અમે આગામી પેઢીના GST સુધારા લાવી રહ્યા છીએ. અમે સામાન્ય લોકો માટે કર ઘટાડીશું, રોજિંદા વપરાશની વસ્તુઓ સસ્તી થશે, લોકોને ઘણો ફાયદો થશે.
PM મોદીએ 2047 સુધીમાં ભારતને 10 ટ્રિલિયન ડોલરની અર્થવ્યવસ્થા બનાવવા માટે એક ખાસ સુધારા ટાસ્ક ફોર્સની રચનાની જાહેરાત કરી. આ ટાસ્ક ફોર્સની રચના પાછળનું કારણ આર્થિક વિકાસને વેગ આપવા અને સુશાસનને આધુનિક બનાવવાનું છે.
PM મોદીએ દેશમાં થઈ રહેલી ઘૂસણખોરી પર કડક વલણ અપનાવ્યું છે. આ ઘૂસણખોરીને કારણે અહીંના લોકોની આજીવિકા છીનવાઈ રહી છે. આ કોઈપણ સંજોગોમાં ઘૂસણખોરીને સહન કરવામાં આવશે નહીં. પીએમએ તેને દેશ માટે ખતરો ગણાવ્યો છે, તેથી જ તેમણે હાઇ-પાવર્ડ ડેમોગ્રાફી મિશન શરૂ કરવાની જાહેરાત કરી છે. આ અંતર્ગત, દેશની એકતા, અખંડિતતા અને નાગરિકોના અધિકારો સુનિશ્ચિત કરવામાં આવશે.
વડાપ્રધાન મોદીએ કહ્યું કે ભારતના બજેટનો મોટો ભાગ હજુ પણ પેટ્રોલ, ડીઝલ અને ગેસની આયાતમાં જાય છે. 79મા સ્વતંત્રતા દિવસ નિમિત્તે લાલ કિલ્લાના પ્રાચીર પરથી પોતાના સંબોધનમાં તેમણે એમ પણ કહ્યું કે રાષ્ટ્રીય ડીપવોટર એક્સપ્લોરેશન મિશન શરૂ કરવામાં આવી રહ્યું છે. આ સાથે, સૌર ઉર્જા, હાઇડ્રોજન, હાઇડ્રો અને પરમાણુ ઉર્જામાં પણ મોટા વિસ્તરણની યોજના બનાવવામાં આવી છે
વડાપ્રધાનએ કહ્યું કે, જે રીતે આપણે કોવિડ દરમિયાન રસીઓ બનાવી અને ડિજિટલ ચુકવણી માટે UPIનો ઉપયોગ કર્યો. તે જ રીતે, આપણે આપણા જેટ એન્જિન પણ બનાવવા જોઈએ. તેમણે વિદ્યાર્થીઓને આવું કાર્ય કરવાની અપીલ કરી છે. તેમણે કહ્યું કે જો ઉત્પાદન વિશે વિચારતા યુવાનો સરકારી નિયમોમાં ફેરફાર ઇચ્છે છે, તો મને જણાવો. મિત્રો, આજે રાષ્ટ્રીય ઉત્પાદન મિશન પર ઝડપથી કામ ચાલી રહ્યું છે.
