ઝુકેંગે નહીં : MNSએ મુંબઈ સહિત અનેક શહેરોમાં મસ્જિદ પાસે લાઉડસ્પીકર પર હનુમાન ચાલીસા વગાડી

રાજ ઠાકરે (Raj Thackeray) એ એક એવા રાજકારણી છે, કે જે હંમેશા કોઈને કોઈ કારણોસર વિવાદોમાં બની રહે છે. અત્યારે મહારાષ્ટ્રમાં (Maharashtra) લાઉડ સ્પીકરનો વિવાદ સતત જોર પકડી રહ્યો છે. મહારાષ્ટ્ર નવનિર્માણ સેના (MNS)ના કાર્યકરોએ આજે ​​સવારે મુંબઈના ચારકોપ વિસ્તાર સહિત રાજ્યના અનેક શહેરોમાં અજાન દરમિયાન લાઉડસ્પીકર પર હનુમાન ચાલીસા વગાડી હતી. અજાન સમયે મુંબઈની એક મસ્જિદ પાસે લાઉડ સ્પીકર પર હનુમાન ચાલીસા વગાડતા હોવાનો વીડિયો વાયરલ (Viral Video) થઈ રહ્યો છે. MNS ચીફ રાજ ઠાકરેએ આ માટે આદેશ આપ્યો છે.

MNSએ મહારાષ્ટ્રની મસ્જિદોને આગામી તા. 4 મેથી લાઉડસ્પીકર પર પ્રતિબંધની માંગ સાથે આંદોલન શરૂ કરવા હાકલ કરી છે. બીજી તરફ, મહારાષ્ટ્ર સરકારે આ આંદોલનને કારણે કોમી તણાવ વધુ ન ફેલાય તે માટે દોડધામ શરૂ કરી દીધી છે. આ દરમિયાન, બુધવારે એટલે કે આજે સવારે મુંબઈ અને નાસિક સહિત અનેક શહેરોમાં અજાનના સમયે હનુમાન ચાલીસા વગાડવામાં આવી હતી. મુંબઈનો એક વીડિયો વાઈરલ થયો છે, જેમાં એક MNS કાર્યકર બહુમાળી ઈમારતમાંથી અજાન સમયે પોતાના હાથમાં પાર્ટીનો ધ્વજ લહેરાવતો જોવા મળ્યો હતો. જયારે લાઉડસ્પીકર પર હનુમાન ચાલીસાનું મોટા અવાજે પઠન કરવામાં આવ્યું હતું.

નાસિકમાં 7 મહિલા કાર્યકરોની અટકાયત કરવામાં આવી

નાશિકમાં પણ નમાઝ દરમિયાન હનુમાન ચાલીસા વગાડવામાં આવી હતી. આ મામલામાં અત્યારે 7 મહિલા કાર્યકરોની અટકાયત કરવામાં આવી છે. બાંદ્રા, ભિવંડી અને નાગપુરમાં પણ અજાન દરમિયાન હનુમાન ચાલીસાના પાઠ થયા હોવાના અહેવાલ છે. અત્યારે પુણે અને નાગપુરમાં ભારે પોલીસ બંદોબસ્ત ગોઠવી દેવામાં આવ્યો છે.

હિંદુઓની તાકાત બતાવવા આહ્વાન કર્યું છે

આ દરમિયાન, રાજ ઠાકરેનો એક મેસેજ સોશિયલ મીડિયા પર વાયરલ થઈ રહ્યો છે. આમાં તેમણે તમામ નાગરિકોને એક હિંદુની તાકાત બતાવવાનું કહ્યું હતું. જો તે હવે નહીં થાય, તો તે ક્યારેય બનશે નહીં. તેવું ઠાકરે કહી રહ્યા છે. તેમણે આગળ કહ્યું કે, ”હું તમામ હિન્દુઓને અપીલ કરું છું કે જો તમે 4 મેના રોજ લાઉડસ્પીકર પરથી અજાન સાંભળો છો, તો તે સ્થળોએ લાઉડસ્પીકર પર હનુમાન ચાલીસા વગાડીને તેનો જવાબ આપો. ત્યારે જ તેમને આ લાઉડસ્પીકરોની પીડાનો અહેસાસ થશે.”

બાળાસાહેબનો જૂનો વીડિયો શેર કરીને ઉદ્ધવ પર નિશાન સાધ્યું હતું

શિવસેનાના સ્થાપક રાજ ઠાકરે દ્વારા બાળાસાહેબ ઠાકરેનો એક જૂનો વીડિયો શેર કરવામાં આવ્યો છે. જેમાં બાળ ઠાકરે જો રાજ્યમાં તેમની સરકાર બનશે તો મસ્જિદોમાંથી લાઉડસ્પીકર હટાવવાની વાત કરી રહ્યા છે. તેઓ કહે છે કે, ”જ્યારે મારી સરકાર મહારાષ્ટ્રમાં આવશે, ત્યારે અમે રસ્તામાં નમાઝ બંધ કર્યા વિના રહીશું નહીં. ધર્મ એવો હોવો જોઈએ કે તે રાષ્ટ્રહિતના માર્ગમાં ન આવે. આપણા હિંદુઓ કંઈ ખોટું કરે તો મને કહે, મસ્જિદમાંથી લાઉડસ્પીકર નીચે આવી જશે.”

મંદિરોમાં લાઉડસ્પીકરની પરવાનગી લેવી પડશે

રાજ ઠાકરેએ પણ એક નિવેદન જાહેર કર્યું છે. જેમાં તેમણે કહ્યું કે સુપ્રીમ કોર્ટે લાઉડસ્પીકર માટે નિયમો નક્કી કર્યા છે. તેમના મતે આ અવાજ 10 થી 55 ડેસિબલની વચ્ચે હોવો જોઈએ. 10 ડેસિબલનું સ્તર વ્હીસ્પર સમાન છે, જ્યારે 55 ડેસિબલ એ આપણા રસોડાના મિક્સરના ધ્વનિ સ્તરનું સ્તર છે. મસ્જિદોમાં લાઉડ સ્પીકર્સ માન્ય છે, પરંતુ જો આપણે મંદિરોમાં લાઉડસ્પીકર વગાડવું હોય તો અમારે પરવાનગી લેવી પડશે. તેમણે રસ્તા પર બેસીને નમાઝ પઢવા અને ટ્રાફિક જામ થવાનો મુદ્દો પણ ઉઠાવ્યો હતો.

રાજ ઠાકરે પર દબાણ સર્જાયું

મહારાષ્ટ્ર સરકારે રાજ ઠાકરે પર આંદોલન ન કરવા માટે ઘણું જ પરોક્ષ દબાણ કર્યું છે. ઔરંગાબાદમાં તેમના ભાષણ બદલ તેમની સામે કેસ નોંધવામાં આવ્યો છે. તે જ સમયે, સાંગલીની કોર્ટે 14 વર્ષ જૂના કેસમાં તેની વિરુદ્ધ બિનજામીનપાત્ર વોરંટ જારી કર્યું છે. બીજી તરફ, અત્યારે મુંબઈ પોલીસે રાજ ઠાકરેના નિવાસસ્થાનની આસપાસ સૈનિકો તૈનાત કરી દીધા છે. તેમને કસ્ટડીમાં લેવામાં આવે તેવી આશંકા છે.

મહારાષ્ટ્રમાં સુરક્ષા સઘન કરવામાં આવી છે

આ દરમિયાન, મુંબઈ સહિત સમગ્ર મહારાષ્ટ્રમાં રાજ ઠાકરેના આંદોલનને જોતા સુરક્ષા વ્યવસ્થા સઘન કરવામાં આવી છે. પોલીસ કમિશનર સંજય પાંડે પોતે મુંબઈમાં રસ્તા પર ઉતરી આવ્યા છે. મંગળવારે એટલે કે ગઈકાલે ડીજીપી રજનીશ સેઠે સ્પષ્ટ કહ્યું હતું કે કોઈને પણ કાયદો અને વ્યવસ્થા અને સૌહાર્દને ખલેલ પહોંચાડવાની મંજૂરી આપવામાં આવશે નહીં.

આ પણ વાંચો – Jodhpur Violence: જોધપુરમાં હિંસા બાદ તણાવ, 10 પોલીસ સ્ટેશન વિસ્તારમાં કર્ફ્યુ, 1000 પોલીસકર્મીઓ તૈનાત, અત્યાર સુધીમાં 97ની ધરપકડ, વાંચો લેટેસ્ટ અપડેટ્સ