Jammu Kashmir: નેશનલ કોન્ફરન્સના બે નેતાઓ સહિત 200થી વધુ રાજકીય અને સામાજિક કાર્યકરો ભાજપમાં જોડાયા
પાર્ટીમાં જોડાયેલા લોકોનું સ્વાગત કરતા ભાજપના (BJP) જમ્મુ અને કાશ્મીર યુનિટના પ્રમુખ રૈનાએ કહ્યું કે પાર્ટીને તેના મંત્ર 'સબકા સાથ, સબકા વિકાસ, સબકા વિશ્વાસ'ના કારણે સમાજના દરેક વર્ગમાંથી સમર્થન મળી રહ્યું છે. જમ્મુ અને કાશ્મીરના લોકોએ ભાજપને સમર્થન આપવાનું નક્કી કર્યું છે.
જમ્મુ અને કાશ્મીરમાં મંગળવારે નેશનલ કોન્ફરન્સના 2 નેતાઓ અને 200 થી વધુ રાજકીય અને સામાજિક કાર્યકરો ભારતીય જનતા પાર્ટીમાં જોડાયા છે. આ લોકો બીજેપીના જમ્મુ-કાશ્મીર યુનિટના અધ્યક્ષ રવિન્દર રૈનાની હાજરીમાં પાર્ટીમાં જોડાયા હતા. ભાજપમાં જોડાતા નેશનલ કોન્ફરન્સના નેતાઓમાં તેના પ્રાંતીય ઉપપ્રમુખ એ.એસ. બંટી અને પ્રાંતીય સચિવ પિંકી ભટનો સમાવેશ થાય છે. આ ઉપરાંત નેશનલ જસ્ટિસ પાર્ટીના પ્રમુખ રણધીર સિંહ પરિહાર અને કેટલાક પંચાયત સભ્યો, ડોક્ટર અને નિવૃત્ત સરકારી અધિકારીઓ ભાજપમાં જોડાયા હતા.
મોદી સરકારની જનહિતકારી નીતિઓને કારણે અહીં આવ્યા છે: પૂર્વ ધારાસભ્ય દેવેન્દ્ર સિંહ રાણા
ગત વર્ષે નેશનલ કોન્ફરન્સમાંથી ભાજપમાં જોડાયેલા પૂર્વ ધારાસભ્ય દેવેન્દ્ર સિંહ રાણાએ પાર્ટી ઓફિસમાં નવા સભ્યોનું સ્વાગત કર્યું હતું. રાણાએ જણાવ્યું હતું કે આજે જે લોકો જોડાયા છે તેના કારણે ભાજપ ખાસ કરીને નગરોટા વિધાનસભા ક્ષેત્રમાં વધુ મજબૂત બનશે. તેમણે કહ્યું કે, તેઓ મોદી સરકારની જનહિતકારી નીતિઓને કારણે અહીં આવ્યા છે.
સમાજના દરેક વર્ગમાંથી સમર્થન મળી રહ્યું છે
પાર્ટીમાં જોડાયેલા લોકોનું સ્વાગત કરતા ભાજપના જમ્મુ અને કાશ્મીર યુનિટના પ્રમુખ રૈનાએ કહ્યું કે પાર્ટીને તેના મંત્ર ‘સબકા સાથ, સબકા વિકાસ, સબકા વિશ્વાસ’ના કારણે સમાજના દરેક વર્ગમાંથી સમર્થન મળી રહ્યું છે. તેમણે કહ્યું, જમ્મુ અને કાશ્મીરના લોકોએ ભાજપને સમર્થન આપવાનું નક્કી કર્યું છે.
જે અગ્રણી રાજકીય કાર્યકરો અને સામાજિક કાર્યકરોની મોટા પાયે ભાગીદારીથી સ્પષ્ટ થાય છે. આપણે બધાએ સાથે મળીને કામ કરવું પડશે અને એ સુનિશ્ચિત કરવું પડશે કે ભાજપ સરકાર રચવામાં સક્ષમ છે અને આપણા પોતાના મુખ્યમંત્રી બનવવા માટે આગામી વિધાનસભા ચૂંટણીમાં 50 થી વધુ બેઠકો જીતવાનું લક્ષ્ય રાખવું પડશે.
અગાઉ જમ્મુ-કાશ્મીરમાં નેશનલ કોન્ફરન્સે રાજ્યની વિધાનસભાની ચૂંટણીમાં તમામ 90 બેઠકો પર ચૂંટણી લડવાની જાહેરાત કરી હતી. નેશનલ કોન્ફરન્સે આમ કહીને પીપલ્સ અલાયન્સ ફોર ગુપકર ડિક્લેરેશનને તોડી પાડવાનો સંકેત આપ્યો હતો. સાથે જ ઓમર અબ્દુલ્લાએ રાજ્યના લોકોને વધુમાં વધુ મતદાર યાદીમાં નામ નોંધાવવા અને મતદાનમાં ભાગ લેવા જણાવ્યું હતું. PAGDમાં પાંચ પક્ષોનો સમાવેશ થાય છે. નેશનલ કોન્ફરન્સ, પીપલ્સ ડેમોક્રેટિક પાર્ટી (PDP), અવામી નેશનલ કોન્ફરન્સ, કોમ્યુનિસ્ટ પાર્ટી ઓફ ઈન્ડિયા માર્ક્સિસ્ટ (CPI-M), કોમ્યુનિસ્ટ પાર્ટી ઓફ ઈન્ડિયા (CPI).
Published On - 8:02 pm, Tue, 29 November 22