PM Gati Shakti સાથે ચીનને ભારત આપશે ટક્કર, જાણો કેવી રીતે કામ કરશે આ 100 લાખ કરોડ રૂપિયાનો પ્રોજેક્ટ

ભારતની નરેન્દ્ર મોદી (Narendra Modi) સરકારે $1.2 ટ્રિલિયન (100 લાખ કરોડ) પીએમ ગતિ શક્તિ (PM Gati Shakti) યોજના બનાવી છે. નિષ્ણાતોનું માનવું છે કે આ યોજનાથી ચીનમાં (China) ચાલતી વિદેશી ફેક્ટરીઓ ભારત તરફ આગળ વધશે. આવી સ્થિતિમાં પીએમ ગતિ શક્તિ યોજના સંપૂર્ણપણે ચીન સાથે સ્પર્ધા કરવાની યોજના છે. આ યોજનાથી ભારતને ઘણા મોરચે ગતિ મળવાની અપેક્ષા છે. ભારતમાં ચાલી રહેલા ઈન્ફ્રાસ્ટ્રક્ચર પ્રોજેક્ટ્સમાંથી ઘણા મોડેથી ચાલી રહ્યા છે. તેમજ ચાર પ્રોજેક્ટ્સમાંથી એક અંદાજિત બજેટ કરતા વધારે ખર્ચ સાથે ચાલે છે. વડાપ્રધાન નરેન્દ્ર મોદીને વિશ્વાસ છે કે ટેક્નોલોજી આવા અંતિમ તબક્કાના કામમાં ખૂબ ઝડપ લાવી શકે છે. તેથી પીએમ ગતિ શક્તિ માસ્ટર પ્લાનને આગળ વધારવામાં આવી રહ્યો છે.

પીએમ ગતિ શક્તિ દેશનો એક એવો મેગા પ્રોજેક્ટ છે જેમાં 100 લાખ કરોડ રૂપિયાનો ખર્ચ થવાનો છે. આ યોજના હેઠળ મોદી સરકાર એક એવું ડિજિટલ પ્લેટફોર્મ બનાવી રહી છે જેમાં 16 મંત્રાલયોને એકસાથે સામેલ કરવામાં આવશે. આ એક એવું પોર્ટલ હશે જ્યાં કંપનીઓ અને રોકાણકારો સાથે મળીને તેમનું કામ કરી શકશે.

પ્રોજેક્ટની ડિઝાઇન આ પોર્ટલ પર કરવામાં આવશે, અહીંથી તેને મંજૂરી મળશે અને ખર્ચ વિશે સંપૂર્ણ માહિતી ઉપલબ્ધ થશે. આ સાથે, રોકાણકારો અને કંપનીઓએ વિવિધ મંત્રાલયોની ઓફિસના ચક્કર નહીં લગાવવા પડે. તેઓએ પોર્ટલ પર જઈને તમામ પ્રકારની અરજીઓ એક જ પ્રયાસમાં કરવાની રહેશે અને તેમાંથી તેમને મંજૂરી પણ મળશે.

પીએમ ગતિ શક્તિથી ચીનને ઝટકો

સરકારનું કહેવું છે કે પીએમ ગતિ શક્તિ માત્ર ખર્ચ જ નહીં બચાવે, પરંતુ સમયનો બગાડ પણ અટકાવશે. ચીનમાં કાર્યરત કંપનીઓ ભારતને તેમના પસંદગીના સ્થળ તરીકે જોઈ રહી છે. આ વિદેશી કંપનીઓ ભારતમાં ઉત્પાદન માટે અપાર સંભાવનાઓ જોઈ રહી છે. પીએમ ગતિ શક્તિ યોજના આ કામમાં વિદેશી કંપનીઓને સંપૂર્ણ મદદ કરશે. જ્યારથી ચીન ‘ચાઈના પ્લસ વન પોલિસી’ લાગુ કરવા માટે વળેલું છે ત્યારથી વિદેશી કંપનીઓ અન્ય દેશો પર પોતાનું ફોકસ વધારી રહી છે. તેથી ભારત તેમને સૌથી યોગ્ય દેશ લાગે છે જ્યાં તેમનો વ્યવસાય સરળતાથી ચાલી શકે.

PM ગતિ શક્તિ યોજના આ કામમાં વિદેશી કંપનીઓને મદદ કરશે કારણ કે પ્રોજેક્ટને કોઈપણ વિલંબ વિના મંજૂરી મળી જશે. વિદેશી કંપનીઓ ભારતમાં સરળતાથી બિઝનેસ શરૂ કરી શકશે અને તેમની સપ્લાય ચેઈન વધારી શકશે. આ કંપનીઓને સસ્તા લેબરના રૂપમાં સૌથી મોટી સુવિધા મળશે. ભારત એશિયાની ત્રીજી સૌથી મોટી અર્થવ્યવસ્થા છે જ્યાં સૌથી સસ્તી માનવશક્તિ ઉપલબ્ધ છે. આ દ્રષ્ટિકોણથી વિદેશી કંપનીઓ ભારતમાં કામ કરી શકશે.