સંરક્ષણ સંશોધન અને વિકાસ સંસ્થા (DRDO) એ શુક્રવારે સિંગલ યુઝ પ્લાસ્ટિકનો ઉપયોગ ઘટાડવાના હેતુથી બાયોડિગ્રેડેબલ પેકેજિંગ પ્રોડક્ટ્સ લોન્ચ કર્યા છે. DRDOએ આ ઇકો ફ્રેન્ડલી પેકેજીંગ બેગને પ્રાકૃતિક અને પ્લાન્ટ આધારિત ફૂડ ગ્રેડ મટિરિયલ્સમાંથી બનાવી છે. DRDOએ આચાર્ય નાગાર્જુન યુનિવર્સિટી અને ઇકોલેસ્ટિક પ્રાઈવેટ લિમિટેડની ભાગીદારીમાં આ બેગ વિકસાવી છે.
ડીઆરડીઓ અને ઇકોલેસ્ટીક પ્રાઈવેટ લિમિટેડએ એક નિવેદનમાં જણાવ્યું છે કે, બેગ દ્રાવ્ય અને અદ્રાવ્ય એમ બે સ્વરૂપોમાં ઉપલબ્ધ છે. આ બેગ ત્રણ મહિનામાં કુદરતી રીતે વિઘટિત કરી શકે છે અને પર્યાવરણને કોઈ નુકસાન પહોંચાડશે નહીં. પેટ્રોકેમિકલ્સમાંથી બનેલી પ્લાસ્ટિકની થેલીઓને સડવામાં વર્ષોનો સમય લાગે છે. તે પર્યાવરણ માટે પણ ખૂબ નુકસાનકારક છે. તેની તુલનામાં, આ બેગ વધુ ટકાઉ, સસ્તુ અને સિંગલ-યુઝ પ્લાસ્ટિક માટે એક ઉત્તમ વિકલ્પ છે.
એક સમાચાર એજન્સી સાથે વાત કરતા ડીઆરડીઓના એડવાન્સ્ડ સિસ્ટમ્સ લેબોરેટરી (ASL) ના ડાયરેક્ટર રામ મનોહર બાબુએ કહ્યું કે, તેમને ઇકોલાસ્ટિંગ પેકેજિંગ પ્રોડક્ટ્સ લોન્ચ કરવામાં ખૂબ ગર્વ છે. તેમણે કહ્યું, ભારત સરકારે 2022 સુધીમાં દેશમાં સિંગલ યુઝ પ્લાસ્ટિકના ઉપયોગને સંપૂર્ણપણે નાબૂદ કરવાનો નિર્ણય લીધો છે. અને આ બાયોડિગ્રેડેબલ પેકિંગ બેગ અમને તે દિશામાં મદદ કરશે.
મીડિયાને સંબોધન કરતાં ચીફ સાયન્ટિસ્ટ ડો.વીરા ભ્રમે જણાવ્યું હતું કે, આ પ્રોડકટ ઘણાં પરીક્ષણો બાદ અને યોગ્ય ફોર્મ્યુલા પર પહોંચ્યા પછી લોન્ચ કરવામાં આવી છે. તેમની ક્ષમતા અને કુદરતી સડો જેવા પરિબળોની કાળજી લીધી છે. આ પછી જ પ્લાસ્ટિકના વિકલ્પ તરીકે સૌથી ટકાઉ ઉત્પાદન બન્યું છે. આ બેગ દ્વારા એક પણ પ્રાણીને નુકસાન થશે નહીં.