ભારતના ચીફ જસ્ટિસ ઓફ ઈન્ડિયા શરદ અરવિંદ બોબડેના માતા સાથે કથિતરૂપે કૌટુંબિક સંપત્તિની સંભાળ લેતા એક વ્યક્તિ દ્વારા 2.5 કરોડની ઠગાઈ કરાયાનો મામલો સામે આવ્યો છે. પોલીસ સૂત્રો અનુસાર 49 વર્ષીય તાપસ ઘોષ નામના આરોપીની ધરપકડ કરવામાં આવી છે અને નાગપુર પોલીસની એસઆઈટીના ડીસીપી વિનિતા સાહુની આગેવાની હેઠળ આ કેસની તપાસ ચાલી રહી છે.
મામલે વરિષ્ઠ પોલીસ અધિકારીએ જણાવ્યું કે આકાશવાણી ચોક પાસે બોબડે પરિવારના નિવાસસ્થાન નજીક સંપત્તિ આવેલી છે જેને ‘સીડન લોન’ નામ આપવામાં આવ્યું છે. આ સંપત્તિ વિવિધ કાર્યક્રમોમાં ભાડા પર આપવામાં આવે છે. CJI બોબડેની માતા મુક્તા બોબડે આ સંપત્તિની માલિકી ધરાવે છે અને ઘોષની દેખરેખ માટે નિમણૂક કરવામાં આવી હતી.
પોલીસ અનુસાર તાપસ ઘોષ છેલ્લા દસ વર્ષથી મિલકતનું સંચાલન કરી રહ્યો હતો અને આર્થિક વ્યવહાર પર નજર રાખતો હતો. મુક્તા બોબડેની ઉંમર અને આરોગ્યની નબળાઈનો લાભ લઈને ઘોષે કથિત રીતે લોનની નકલી રસીદો બનાવીને 2.5 કરોડનું કૌભાંડ કર્યું હતું. પોલીસને આશંકા છે કે કૌભાંડની રકમ વધુ હોઈ શકે છે.
ઘોષ અને તેની પત્નીએ લોન ભાડાથી મેળવેલા પૈસા જમા કરાવ્યા ન હતા. છેતરપિંડી પ્રકાશમાં આવ્યા પછી પોલીસે એસઆઈટીની રચના કરી છે જેમાં આર્થિક અપરાધ શાખાના અધિકારીઓ પણ શામેલ છે. મંગળવારે રાત્રે સીતાબુલ્ડી પોલીસ સ્ટેશનમાં એફઆઈઆર નોંધાઈ હતી અને ઘોષની પૂછપરછ કર્યા બાદ તેની ધરપકડ કરવામાં આવી હતી.
Facebook પર તમામ મહત્વના સમાચાર વાંચવા માટે TV9 Gujarati ના આ પેજને Like કરો
Published On - 1:24 pm, Thu, 10 December 20