J&K Breaking: જમ્મુ-કાશ્મીરના કઠુઆમાં CISF જવાનનું અંધાધૂંધ ફાયરિંગ, એક આસિસ્ટન્ટ કમાન્ડન્ટ સહિત 4 સાથી જવાનોનાં મોત

જમ્મુ-કાશ્મીરના કઠુઆ જિલ્લામાં સેવા પાવર પ્રોજેક્ટની સુરક્ષામાં તૈનાત CISF ના એક જવાને સાથીઓ સાથેના આંતરિક વિવાદ બાદ સરકારી AK-47 રાઇફલથી અંધાધૂંધ ફાયરિંગ કર્યું હતું. આ ગોળીબારમાં આસિસ્ટન્ટ કમાન્ડન્ટ અને સબ-ઇન્સ્પેક્ટર સહિત 4 જવાનોનાં મોત નીપજ્યાં છે. કઠુઆ પોલીસે આરોપી જવાનની ધરપકડ કરી સમગ્ર મામલે તપાસ હાથ ધરી છે.

Sachin Agrawal | Updated on: Sep 29, 2026 | 9:37 PM

જમ્મુ-કાશ્મીરના કઠુઆ જિલ્લામાં ફરજ બજાવતા સેન્ટ્રલ ઇન્ડસ્ટ્રિયલ સિક્યોરિટી ફોર્સ (CISF) ના એક જવાને પોતાના જ સાથીઓ પર સરકારી AK-47 રાઇફલથી ગોળીઓ વરસાવતાં ભારે ચકચાર મચી ગઈ છે. આ ગોળીબારની ભયાનક ઘટનામાં CISF ના 4 જવાનોનાં ઘટનાસ્થળે જ કરૂણ મોત નીપજ્યાં છે. મૃતકોમાં એક આસિસ્ટન્ટ કમાન્ડન્ટ અને એક સબ-ઇન્સ્પેક્ટર રેન્કના અધિકારી પણ સામેલ છે. સમગ્ર ઘટના બાદ કઠુઆ પોલીસે ત્વરિત કાર્યવાહી કરીને આરોપી જવાનની ધરપકડ કરી લીધી છે.

આ લોહિયાળ ઘટના બસોહલી તાલુકાના મશકા વિસ્તારમાં આવેલા ‘સેવા પાવર પ્રોજેક્ટ’ પર સ્થિત CISF કેમ્પમાં બની હતી. ફાયરિંગની જાણ થતાં જ પોલીસ કાફલો ઘટનાસ્થળે દોડી ગયો હતો અને પરિસ્થિતિ પર કાબૂ મેળવીને તપાસ શરૂ કરી હતી.

વિવાદ બાદ અંધાધૂંધ ફાયરિંગ

પ્રાથમિક તપાસમાં મળેલી વિગતો અનુસાર, CISF ના જવાનો વચ્ચે કોઈ બાબતે ઉગ્ર બોલાચાલી અને આંતરિક વિવાદ થયો હતો. વિવાદ એટલો વણસી ગયો કે આવેશમાં આવીને જવાને પોતાની સર્વિસ રાઇફલથી સાથીઓ પર ગોળીબાર શરૂ કરી દીધો હતો.

આ ફાયરિંગમાં જીવ ગુમાવનારા જવાનોની ઓળખ નીચે મુજબ થઈ છે:

અંકિત કુમાર પાંડે (આસિસ્ટન્ટ કમાન્ડન્ટ)
લક્ષ્મણ સિંહ (સબ-ઇન્સ્પેક્ટર)
રફીક અહેમદ (કોન્સ્ટેબલ)
સંદીપ કુમાર (કોન્સ્ટેબલ)

આરોપી જવાન 2009 બેચનો કર્મી

કઠુઆ પોલીસે ધરપકડ કરેલા આરોપી જવાનની ઓળખ અભિદેશ સિંહ તરીકે કરી છે. મળતી માહિતી મુજબ, આરોપી 2009 બેચનો CISF કર્મી છે. તેણે પોતાની સરકારી એકે-47 રાઇફલથી આડેધડ ગોળીબાર કર્યો હતો. CISF ના સૂત્રો મુજબ, ઘટના સમયે તેની પાસે આશરે 150 રાઉન્ડ જીવંત કારતૂસ મોજૂદ હતા.

પાવર પ્રોજેક્ટની સુરક્ષામાં તૈનાત હતી યુનિટ

આ ઘટના કઠુઆના મહત્વના પાવર પ્રોજેક્ટની સુરક્ષા વ્યવસ્થા સંભાળતી CISF યુનિટના કેમ્પ પરિસરમાં બની હતી. ગોળીબારમાં ચારેય જવાનો ગંભીર રીતે ઘાયલ થતાં તેમને તાત્કાલિક સારવાર માટે ખસેડવામાં આવ્યા હતા, પરંતુ તબીબોના તમામ પ્રયાસો છતાં તેમને બચાવી શકાયા નહોતા. કઠુઆ પોલીસે પુષ્ટિ કરી છે કે આ કોઈ બાહ્ય આતંકી હુમલો નથી, પરંતુ ફોર્સના જવાનો વચ્ચેનો આંતરિક વિવાદ હતો. જોકે, ઝઘડાનું ચોક્કસ કારણ હજુ સ્પષ્ટ થયું નથી.

પોલીસ અને CISF દ્વારા ઉચ્ચ સ્તરીય તપાસ

ઘટનાની ગંભીરતાને ધ્યાનમાં રાખીને કઠુઆ જિલ્લા પોલીસની ફોરેન્સિક અને ઇન્વેસ્ટિગેશન ટીમો કેમ્પ અને આસપાસના વિસ્તારમાં તપાસ કરી રહી છે. ગોળીબાર ક્યારે શરૂ થયો, કુલ કેટલા રાઉન્ડ ફાયરિંગ થયું અને સમગ્ર ઘટનાક્રમ કઈ રીતે ઘટ્યો તે અંગે પુરાવા એકત્રિત કરવામાં આવી રહ્યા છે. બીજી તરફ CISF મુખ્યાલય દ્વારા પણ આ સમગ્ર મામલે આંતરિક કોર્ટ ઓફ ઇન્ક્વાયરી (કોર્ટ તપાસ) શરૂ કરવાનો આદેશ આપવામાં આવ્યો છે.