ખાલિસ્તાનને અલગ દેશ બનાવવા માટે અમૃતપાલે કરી હતી પૂરી તૈયારી, જાણો તેમની પાસેથી શું મળી આવી વસ્તુઓ

પોલીસે વારિસ પંજાબ દે ચીફ ખાલિસ્તાન સમર્થક અમૃતપાલ સિંહ વિશે નવા દાવા કર્યા છે. તેમનું કહેવું છે કે અમૃતપાલે અલગ દેશ ખાલિસ્તાન બનાવવાની પૂરી તૈયારી કરી લીધી હતી. તેની પાસેથી ખાલિસ્તાનનું ચલણ, ધ્વજ અને નકશો પણ મળી આવ્યો છે. કૌંડલ કહે છે કે આ લોકોએ ખાલિસ્તાનનો નવો ધ્વજ, એક અલગ ચલણ અને શીખ રજવાડાઓના ઝંડા પણ બનાવ્યા હતા. ખાનગી સૈન્ય આનંદપુર ખાલસા ફોજ (AKF) ઉપરાંત ક્લોઝ પ્રોટેક્શન ટીમ (CPT) પણ બનાવવામાં આવી હતી. AKFમાં દરેક વ્યક્તિને એક ખાસ નંબર ફાળવવામાં આવ્યો હતો.

આ પણ વાંચો : બ્રિટનમાં ખાલિસ્તાનીઓના ઉપદ્રવ પર એસ જયશંકરનું સ્પષ્ટ વલણ – બેવડા ધોરણો સહન કરી શકતા નથી

અમૃતપાલ સિંહ ખાલિસ્તાન બનાવવા માટે સશસ્ત્ર સંઘર્ષ શરૂ કરવાની તૈયારી કરી રહ્યો હતો. 2 વોટ્સએપ ગ્રુપ બનાવવામાં આવ્યા હતા. નવા છોકરાઓને આનંદપુર ખાલસા આર્મી જૂથમાં ઉમેરીને તેમને ઉશ્કેરવામાં આવ્યા હતા. બીજું જૂથ અમૃતપાલ ટાઈગર ફોર્સના નામનું હતું, જેમાં અમૃતપાલની નજીકના સભ્યો જ હતા.

અલગ દેશ ખાલિસ્તાનના આયોજન સાથે જોડાયેલી 2 તસવીરો

ખાલિસ્તાનના નકશામાં પાકિસ્તાનના પંજાબ સહિત કેટલાક વિસ્તારો અને ભારતના જમ્મુ-કાશ્મીર અને પંજાબને બતાવવામાં આવ્યા છે.

ફાયરિંગ રેન્જ પણ બનાવવામાં આવી હતી, ભૂતપૂર્વ સૈનિકો ટ્રેનિંગ આપી રહ્યા હતા

પોલીસનું કહેવું છે કે, અમૃતપાલના ગનરના મોબાઈલમાંથી ફાયરિંગ રેન્જનો વીડિયો પણ મળ્યો છે. જેમાં પૂર્વ સૈનિકો હથિયારોના ઉપયોગની ટ્રેનિંગ આપતા જોવા મળે છે. આ ફાયરિંગ રેન્જ અમૃતપાલના જલ્લુપુર ખેડા ગામમાં બનાવવામાં આવી હતી. પોલીસે આ વીડિયો જાહેર કર્યો છે. અમૃતપાલની સાથે રહેતા લોકો ફાયરિંગની પ્રેક્ટિસ કરતા જોવા મળે છે.

ટ્રેનિંગ આપતા 2 ભૂતપૂર્વ સૈનિકોની ઓળખ

પોલીસે તાલીમ આપવાના કેસમાં 19 શીખ બટાલિયનમાંથી નિવૃત્ત થયેલા બે ભૂતપૂર્વ સૈનિક વરિન્દર સિંહ અને થર્ડ આર્મ્ડ પંજાબના તલવિંદરની ઓળખ કરી છે. પોલીસે જણાવ્યું કે બંનેના હથિયાર લાયસન્સ રદ કરવામાં આવ્યા છે. પોલીસ તપાસ મુજબ પંજાબ આવ્યા પછી તરત જ અમૃતપાલે વિવાદાસ્પદ ભૂતપૂર્વ સૈનિકોને શોધવાનું શરૂ કર્યું કે, જેમની પાસે પહેલેથી જ હથિયારનું લાઇસન્સ હતું, જેથી તેને તાલીમ આપવામાં સરળતા રહે.

અમૃતપાલ સાથે જોડાયેલા 4 મોટા અપડેટ્સ

1. પંજાબ પોલીસને અમૃતપાલનો પાસપોર્ટ ઘરમાંથી ગુમ થયો હોવાનું જાણવા મળ્યું છે. પોલીસે પરિવાર પાસેથી તેની માંગણી કરી, પરંતુ તેઓએ પાસપોર્ટ હોવાનો ઇનકાર કર્યો. તેને જોતા પોલીસે એરપોર્ટ અને લેન્ડ પોર્ટ પર તેના લુકઆઉટ સર્ક્યુલરનું રિમાઇન્ડર મોકલ્યું છે.
2. હરિયાણા બાદ પંજાબમાંથી ભાગી ગયેલો અમૃતપાલ સિંહ હવે ઉત્તરાખંડ પહોંચવાની આશંકા છે. પોલીસનું અનુમાન છે કે તેનો આગામી પ્રયાસ નેપાળ સરહદ પાર કરવાનો હશે.
3. ઉત્તરાખંડમાં અમૃતપાલ સિંહ, મીડિયા સલાહકાર પપલપ્રીત સહિત 5 સાથીઓનાં પોસ્ટર લગાવવામાં આવ્યા છે. બીજી તરફ નેપાળ બોર્ડર પર પણ BSFને એલર્ટ રહેવા માટે કહેવામાં આવ્યું છે. આ સાથે તમામ ગુરુદ્વારાની તપાસ કરવામાં આવી રહી છે.
4. ઉત્તરાખંડ પોલીસ કાશીપુર વિસ્તારમાં જાહેરાત કરી રહી છે કે જો કોઈ અમૃતપાલ અને તેના કોઈ સાથીદારને આશ્રય આપશે તો તેમની સામે NSA હેઠળ કાર્યવાહી કરવામાં આવશે. તેમજ જે વ્યક્તિ તેમને જાણ કરશે તેને પુરસ્કાર આપવામાં આવશે.

અમૃતપાલ ISIના ઈશારે કામ કરતો હોવાની છે આશંકા

પોલીસ સૂત્રોના જણાવ્યા અનુસાર અમૃતપાલ પાકિસ્તાની ગુપ્તચર એજન્સી ISIના ઈશારે કામ કરી રહ્યો છે. દુબઈથી પંજાબ આવવાથી લઈને વ્યસન મુક્તિ કેન્દ્ર ખોલવા સુધીની તમામ બાબતો ISIની યોજના હતી. અત્યારે પણ ISI એજન્ટ તેને ફરારીમાં ગુપ્ત રીતે સુરક્ષા આપી રહ્યા છે.