કલમ 370ની જોગવાઈઓને નાબૂદ કરવી દેશના લોકોના ભલા માટે હતી, ઉપરાષ્ટ્રપતિ વેંકૈયા નાયડુનું નિવેદન

ઉપરાષ્ટ્રપતિ એમ વેંકૈયા નાયડુએ (Vice President M Venkaiah Naidu) રવિવારે નેલ્લોરમાં કહ્યું કે બંધારણની કલમ 370ની (Article 370) જોગવાઈઓને નાબૂદ કરવી એ પગલું દેશના લોકોના ભલા માટે હતું અને તેમના જીવનની એક ઐતિહાસિક ક્ષણ હતી. ઉપરાષ્ટ્રપતિએ કહ્યું કે બાળપણથી જ મારા જીવનની આ મહત્વાકાંક્ષા અને મિશન હતું. કાશ્મીર ભારતનું અભિન્ન અંગ છે, તેમાં કોઈ અલ્પવિરામ કે પ્રશ્નાર્થ ચિહ્ન નથી.

કાશ્મીરનો એક-એક ઈંચ ભારતનો છે. તેઓ સમાન નાગરિકો છે, આ મારો વિશ્વાસ છે. તેમણે કહ્યું કે જ્યારે ઐતિહાસિક બિલ પસાર થયું તે સમયે રાજ્યસભાની અધ્યક્ષતા કરીને તેમને પ્રસન્નતા છે. વેંકૈયા નાયડુએ ગૃહમાં બિલ રજૂ કરવાના એક દિવસ પહેલાના તણાવને પણ યાદ કર્યો હતો.

ઉપરાષ્ટ્રપતિ એસપીએસ નેલ્લોર જિલ્લામાં વેંકટચલમ ખાતે તેમના સ્વર્ણ ભારત ટ્રસ્ટની 20મી વર્ષગાંઠના કાર્યક્રમને સંબોધિત કરી રહ્યા હતા. કેન્દ્રીય ગૃહપ્રધાન અમિત શાહ (union home minister amit shah) દ્વારા કલમ 370ની જોગવાઈઓને નાબૂદ કરવાના બિલના ઉલ્લેખના જવાબમાં વેંકૈયા નાયડુએ કહ્યું કે તે લોકોની ઈચ્છા હતી.

ઉપરાષ્ટ્રપતિએ કહ્યું કે બિલની રજૂઆતના એક દિવસ પહેલા પ્રધાનમંત્રી નરેન્દ્ર મોદી મારા ઘરે આવ્યા અને મને કહ્યું કે કાશ્મીર બિલ સૌપ્રથમ રાજ્યસભામાં રજૂ કરવામાં આવશે. મેં તેમને કહ્યું કે અમે લોકસભામાં આમ કેમ ન કરીએ, જ્યાં તમારી પાસે બે તૃતીયાંશ બહુમતી છે. તેમણે કહ્યું કે વેંકૈયાજી, તે પહેલા રાજ્યસભામાં કરવું વધુ સારું છે.

‘રાજ્યસભામાં દરેકને બોલવાની તક આપવામાં આવી હતી’

તેમણે કહ્યું કે એવી શંકા અને આશંકા હતી કે કંઈક (રાજ્યસભામાં) થઈ શકે છે. વેંકૈયા નાયડુએ કહ્યું કે તણાવ હતો. હું ચિંતામાં હતો. મારી પત્ની અને પુત્રી મારા સ્વાસ્થ્યને લઈને ચિંતિત હતી, કારણ કે કાશ્મીર પર ગૃહમાં કંઈ પણ થઈ શકે છે. અમે અમારા હૃદયના ડૉક્ટર બલરામ ભાર્ગવને ફોન કર્યો, તેમણે કહ્યું કે તેઓ ગેલેરીમાં બેસશે, તેથી ચિંતા કરશો નહીં.

નાયડુએ કહ્યું કે ઘણા લોકોને ડર હતો કે રક્તપાત થઈ શકે છે, પરંતુ જે રીતે અમિત શાહે ગૃહમાં રજૂઆત કરી, બધું બરાબર થઈ ગયું. તે ઉતાવળમાં નહીં, પરંતુ વિગતવાર ચર્ચા પછી પસાર કરવામાં આવ્યું હતું. દરેકને બોલવાની તક આપવામાં આવી હતી.

તેમણે કહ્યું કે લોકો અનુચ્છેદ 370 નાબૂદ થવાની આશા રાખતા હતા. આ લોકોના ભલા માટે છે. તેને રાજ્યસભામાં કોઈ ઘટના વિના પસાર કરવામાં આવ્યું હતું. આ માટે હું વડાપ્રધાન અને ગૃહમંત્રીની પ્રશંસા કરું છું. આ મારા જીવનની ઐતિહાસિક ક્ષણ છે. અગાઉ તેમના ભાષણમાં ગૃહમંત્રીએ કહ્યું કે કેવી રીતે વેંકૈયા નાયડુ તેમના વિદ્યાર્થીકાળથી જ કલમ 370નો વિરોધ કરતા હતા.

આ પણ વાંચો :  લદ્દાખમાં ચીન સાથે ચાલી રહેલા સીમા વિવાદ વચ્ચે સેના વધુ M777 તોપો કરશે તૈનાત, પર્વતોમાં વધારાશે મારક ક્ષમતા