અંબાણીને ધમકી આપનાર ‘અફઝલ’ નીકળ્યો ‘વિષ્ણુ’, આજે કોર્ટમાં કરાશે હાજર

મુંબઈની રિલાયન્સ હોસ્પિટલમાં (Reliance Hospital) ઉદ્યોગપતિ મુકેશ અંબાણી (Mukesh Ambani) અને તેમના પરિવારને ફોન પર જાનથી મારી નાખવાની ધમકી આપવા બદલ 56 વર્ષીય જ્વેલર વિષ્ણુ વિદુ ભૌમિકની સોમવારે બપોરે મુંબઈ પોલીસે ધરપકડ કરી હતી. સાથે જ આજે (મંગળવારે) આરોપીને ગિરગાંવ કોર્ટમાં રજૂ કરવામાં આવશે. મોટી વાત એ છે કે પોલીસને (Mumbai Police) ગેરમાર્ગે દોરવા વિષ્ણુ વિદુ ભૌમિકે અફઝલ નામથી ધમકી આપી હતી.

મુંબઈના એક પોલીસ અધિકારીએ જણાવ્યું કે, આરોપી વિષ્ણુ વિદુ ભૌમિકની ધમકીના કોલના લગભગ ત્રણ કલાક બાદ બપોરે 1.30 વાગ્યે ઉપનગરીય દહિસરમાંથી ધરપકડ કરવામાં આવી હતી. તે દક્ષિણ મુંબઈમાં જ્વેલરીની દુકાન ચલાવે છે અને મૂળ ત્રિપુરાનો છે. અગાઉ પણ તેની સામે આ અંગેના બે કેસ નોંધાયા છે. તમને જણાવી દઈએ કે ગયા વર્ષે ફેબ્રુઆરીમાં પણ આવી જ રીતે અંબાણીની હત્યાની ધમકી આપવામાં આવી હતી. મુંકેશ અંબાણીના નિવાસસ્થાનની બહાર વિસ્ફોટ ભરેલ એસયુવી કાર બિનવારસી મળી આવી હતી.

લેન્ડલાઈન નંબર પર નવ વખત ફોન કર્યો

પોલીસે જણાવ્યું કે ભૌમિકે સવારે 10.30 વાગ્યે ગિરગાંવમાં રિલાયન્સ ફાઉન્ડેશન હોસ્પિટલના લેન્ડલાઈન નંબર પર નવ વખત ફોન કર્યો અને અંબાણી અને તેમના પરિવારને મારી નાખવાની ધમકી આપી હતી. પોલીસે જણાવ્યું કે પ્રાથમિક તપાસ મુજબ ભૌમિક પર ભૂતકાળમાં પણ આવા જ કોલ કરવાનો આરોપ છે. અને તેની સામે આ પ્રકારે ફોન ઉપર ધમકી આપવા અંગે કેસ નોંધાયેલ છે.

ધમકી પાછળનો હેતુ

તેમણે કહ્યું કે આવા કોલ કરવા પાછળનો હેતુ જાણવા માટે પોલીસ પૂછપરછ કરી રહી છે. જો કે, આરોપી માનસિક રીતે સ્વસ્થ છે કે કેમ તે પોલીસ હજુ સુધી જાણી શકી નથી. જણાવી દઈએ કે મુંબઈના ડીબી માર્ગ પોલીસ સ્ટેશનમાં (DB Marg Police Station) ગુનાહિત ધમકી આપવા બદલ ભારતીય દંડ સંહિતા (આઈપીસી)ની કલમ 506 (2) હેઠળ કેસ નોંધવામાં આવ્યો હતો.

એન્ટિલિયા પાસે એસયુવી મળી આવી હતી

નોંધનીય છે કે ગયા વર્ષે ફેબ્રુઆરીમાં મુંબઈમાં અંબાણીના નિવાસસ્થાન એન્ટિલિયા પાસે એક SUV કાર બિનવારસી મળી આવી હતી, જેમાં વિસ્ફોટક સામગ્રી રાખવામાં આવી હતી. બાદમાં આ કેસમાં પોલીસ અધિકારી સચિન વાજે સહિત કેટલાક લોકોની ધરપકડ કરવામાં આવી હતી.