મહારાષ્ટ્રમાં પેટ્રોલ 5 રૂપિયા અને ડીઝલ 3 રૂપિયા સસ્તું, સીએમ એકનાથ શિંદેએ જાહેરાત કરી

મહારાષ્ટ્ર(Maharashtra)ની એકનાથ શિંદે સરકારે આજે રાજ્યમાં પેટ્રોલ અને ડીઝલના ભાવમાં ઘટાડો કર્યો છે. રાજ્યમાં પેટ્રોલ 5 રૂપિયા અને ડીઝલ 3 રૂપિયા(Petrol Diesel Price) સસ્તું કરવાની જાહેરાત કરવામાં આવી છે. શિંદ સરકારના આ નિર્ણયથી સામાન્ય લોકોને રાહત મળશે. મહારાષ્ટ્રના સીએમ એકનાથ શિંદે  (CM Eknath Shinde)એ પ્રેસ કોન્ફરન્સ દરમિયાન કહ્યું કે અધિકારીઓ સાથે ચર્ચા કર્યા બાદ અમારી સરકારે આજે પેટ્રોલના ભાવમાં પ્રતિ લીટર 5 રૂપિયા અને ડીઝલના ભાવમાં 3 રૂપિયા પ્રતિ લીટરનો ઘટાડો કરવાનો નિર્ણય લીધો છે. તેમણે કહ્યું કે જે ખેડૂતો નિયમિતપણે તેમની લોન ચૂકવે છે તેમને 50,000 રૂપિયાનું પ્રોત્સાહન આપવાનો નિર્ણય લેવામાં આવ્યો છે. જેમાં સરકાર દ્વારા અગાઉની પરિસ્થિતિમાં જે ખેડૂતોનું નુકસાન ભરપાઈ કરવામાં આવ્યું હતું તે ખેડૂતોનો સમાવેશ કરવામાં આવ્યો ન હતો, હવે આવા ખેડૂતોને પણ તેનો લાભ મળશે.

ઈમરજન્સીમાં જેલમાં જતા લોકોને પેન્શન મળશે

આ દરમિયાન મહારાષ્ટ્રના ડેપ્યુટી સીએમ દેવેન્દ્ર ફડણવીસે એક મોટી જાહેરાત કરતા કહ્યું કે મહારાષ્ટ્ર સરકાર 1975ની ઈમરજન્સી દરમિયાન જેલમાં ગયેલા તમામ લોકોને પેન્શન આપશે. તેમણે કહ્યું કે આ નિર્ણય 2018માં લેવામાં આવ્યો હતો, પરંતુ અગાઉની સરકારે તેને રદ કરી દીધો હતો. ડેપ્યુટી સીએમ દેવેન્દ્ર ફડણવીસે કહ્યું કે રાજ્યમાં મુંબઈ-અમદાવાદ બુલેટ ટ્રેન માટે પણ તમામ મંજૂરીઓ આપવામાં આવી છે.

મહારાષ્ટ્રના લોકોને મોટી રાહત

વાસ્તવમાં, મહારાષ્ટ્રમાં લાંબી રાજકીય અસ્થિરતા બાદ રાજ્યને મળેલા નવા મુખ્યમંત્રી એકનાથ શિંદેએ પેટ્રોલના ભાવમાં 5 રૂપિયા અને ડીઝલના ભાવમાં 3 રૂપિયાનો ઘટાડો કરવાનો મોટો નિર્ણય લીધો છે. મીડિયા રિપોર્ટ્સ અનુસાર, મુંબઈમાં પેટ્રોલની કિંમત ઓછામાં ઓછા છેલ્લા 11 દિવસથી 111.35 રૂપિયા પર સ્થિર હતી. કિંમતમાં ઘટાડા બાદ હવે તેની કિંમત 106.35 રૂપિયા થશે. તે જ સમયે, ડીઝલની કિંમત 97.28 રૂપિયાથી ઘટીને 94.28 રૂપિયા થઈ જશે.