Maharashtra Elections : ભાજપે જાહેર કરી ત્રીજી યાદી, જાણો ઘાટકોપર, બોરીવલી, વસઈથી કોને આપી ટિકિટ

મહારાષ્ટ્ર વિધાનસભા ચૂંટણી માટે ભાજપે આજે વધુ 25 ઉમેદવારોની ત્રીજી યાદી જાહેર કરી છે. ભાજપે મુર્તિજાપુરથી હરીશ મારોતીઅપ્પા પિંપલે, કરંજથી સાઈ પ્રકાશ ડહાકે, ટીઓસાથી રાજેશ શ્રીરામ વાનખેડે અને મોરશીથી ઉમેશને મેદાનમાં ઉતાર્યા છે. આષ્ટી બેઠક ભાજપના ફાળે આવી છે. ભાજપે અહીંથી સુરેશ ધસને પોતાના ઉમેદવાર બનાવ્યા છે. આ બેઠક પરથી અજિત પવાર જૂથના ધારાસભ્ય છે.

જ્યારે, પાર્ટીએ આર્વી વિધાનસભા બેઠક પરથી સુમિત કિશોર વાનખડે, કાટોલથી ચરણ સિંહ બાબુલાલજી ઠાકુર, સાવનેરથી આશિષ રણજીત દેશમુખ, નાગપુર મધ્યથી પ્રવીણ પ્રભાકરાવ દટકે, નાગપુર પશ્ચિમથી સુધાકર વિઠ્ઠલરાવ કોહલેને ઉમેદવાર જાહેર કર્યા છે.

ભાજપે 146 બેઠકો માટે જાહેર કર્યા ઉમેદવારો

ભાજપે અત્યાર સુધી 146 બેઠકો પર ઉમેદવારો જાહેર કર્યા છે. ભાજપે જાહેર કરેલી પ્રથમ યાદીમાં 99 બેઠકો પર ઉમેદવારો ઉભા રાખવામાં આવ્યા હતા. આ પછી 22 ઉમેદવારોની બીજી યાદી બહાર પાડવામાં આવી હતી અને હવે આજે વધુ 25 ઉમેદવારોની ત્રીજી યાદી જાહેર કરી છે.

પ્રકાશ મહેતાને ઘાટકોપરથી ના મળી ટિકિટ

પ્રકાશ મહેતાને ઘાટકોપર બેઠક પરથી ટિકિટ મળી નથી. તેમની જગ્યાએ ભાજપે પરાગ શાહને ઉમેદવાર બનાવ્યા છે. ગત વખતે પણ પ્રકાશ મહેતાને ટિકિટ ન મળતાં શાહ અને મહેતાના સમર્થકો એકબીજા સાથે ઘર્ષણમાં ઉતર્યા હતા. તે જ સમયે બીજેપીએ સંજય ઉપાધ્યાયને બોરીવલીથી ટિકિટ આપી છે, જેને મુંબઈની સલામત બેઠક કહેવામાં આવે છે, આ સીટ પરથી સુનીલ રાણે ધારાસભ્ય હતા, તેમની ટિકિટ કાપવામાં આવી છે. તેમની પહેલા વિનોદ તાવડે બોરીવલીના ધારાસભ્ય હતા અને તેમની ટિકિટ રદ કરીને સુનીલ રાણેને આપવામાં આવી હતી.

નાંદેડ લોકસભા પેટાચૂંટણી માટે સંતુક મારોતરાવ હંબર્ડેને ટિકિટ

ભાજપે નાંદેડ લોકસભા પેટાચૂંટણી માટે સંતુક મારોતરાવ હુંબરડેને પોતાના ઉમેદવાર બનાવ્યા છે. નાંદેડ લોકસભા સીટ માટે 20મી નવેમ્બરે પેટાચૂંટણી યોજાવાની છે. કોંગ્રેસના સાંસદ વસંતરાવ બળવંતરાવ ચવ્હાણના અવસાન બાદ આ બેઠક ખાલી પડી હતી. કોંગ્રેસે હવે આ બેઠક પરથી વસંતરાવ બળવંતરાવ ચવ્હાણના પુત્રને મેદાનમાં ઉતાર્યા છે.