Breaking News : મહારાષ્ટ્રમાં FDA ની મેગા કાર્યવાહી, અનેક જિલ્લામાં દરોડા, કાજુ કતરીથી ખાદ્યતેલ સુધી, કરોડોનો માલ જપ્ત

મહારાષ્ટ્રમાં અન્ન અને ઔષધ પ્રશાસન (FDA) દ્વારા અન્ન સુરક્ષાના નિયમોનું ઉલ્લંઘન કરનાર ખાદ્ય સંસ્થાઓ સામે મોટા પાયે કાર્યવાહી કરવામાં આવી છે. રાજ્યના વિવિધ જિલ્લાઓમાં હાથ ધરાયેલી તપાસ દરમિયાન અસ્વચ્છતા, ખાદ્યપદાર્થોની ગુણવત્તા, ખોટું લેબલિંગ અને પ્રતિબંધિત ખાદ્યપદાર્થોના વેચાણ સહિતની ગંભીર ગેરરીતિઓ સામે આવી છે. કાર્યવાહી દરમિયાન મોટી માત્રામાં ખાદ્યપદાર્થો જપ્ત કરવામાં આવ્યા છે, જ્યારે કેટલાક વ્યવસાયોના ફૂડ અને FSSAI લાઇસન્સ પણ સસ્પેન્ડ કરવામાં આવ્યા છે.

બુળઢાણા જિલ્લામાં FDAની ટીમે કાજુ કતરીના જથ્થાની તપાસ દરમિયાન તેમાં ફૂગ અને જીવાત હોવાની બાબત સામે આવતા કાર્યવાહી કરી હતી. તપાસ દરમિયાન કુલ 11.34 કિલો કાજુ કતરીનો જથ્થો જપ્ત કરવામાં આવ્યો હતો, જેની કિંમત આશરે ₹10,238 હોવાનું જણાવાયું છે. ખાદ્યપદાર્થની ગુણવત્તા અને સ્વચ્છતા અંગે ગંભીર બેદરકારી સામે આવતા Blink Commerceનું ફૂડ લાઇસન્સ તાત્કાલિક સસ્પેન્ડ કરવામાં આવ્યું છે. સ્થળ પર અસ્વચ્છતા અને વંદાના ઉપદ્રવની પણ નોંધ લેવાઈ હતી.

બીડ જિલ્લામાં FDAએ ખાદ્યતેલના રીપેકિંગ યુનિટ્સ સામે પણ મોટી કાર્યવાહી કરી હતી. તપાસ દરમિયાન 1.19 લાખ કિલોથી વધુ ખાદ્યતેલનો જથ્થો જપ્ત કરવામાં આવ્યો હતો. જપ્ત કરાયેલા ખાદ્યતેલની કુલ કિંમત ₹1.94 કરોડથી વધુ હોવાનું સામે આવ્યું છે. નિયમોના ભંગ બદલ પાંચ ખાદ્યતેલ સંસ્થાઓના FSSAI લાઇસન્સ સસ્પેન્ડ કરવામાં આવ્યા છે.

જળગાંવમાં પણ ખાદ્ય સુરક્ષાને ધ્યાનમાં રાખીને મોટી કાર્યવાહી કરવામાં આવી હતી. FDAની તપાસ દરમિયાન 87,320 લિટર પેકેજ્ડ ડ્રિંકિંગ વોટરનો જથ્થો જપ્ત કરવામાં આવ્યો હતો. પેકેજ્ડ પાણીની ગુણવત્તા અને જરૂરી નિયમોના પાલન અંગે શંકા ઊભી થતાં આ કાર્યવાહી કરવામાં આવી હતી.

નાગપુરમાં ખાદ્યપદાર્થોના ખોટા લેબલિંગ સામે FDAએ કડક પગલાં લીધા છે. તપાસ દરમિયાન Ruskના લેબલિંગમાં નિયમોનું પાલન ન થયું હોવાનું સામે આવતા 9,827 કિલો Ruskનો જથ્થો જપ્ત કરવામાં આવ્યો હતો. આ ઉપરાંત નાગપુરમાં Cheese Analogue સહિતના દૂધજન્ય પદાર્થોના મોટા જથ્થા સામે પણ કાર્યવાહી કરવામાં આવી હતી. તપાસ બાદ 13,866 કિલો જેટલા દૂધજન્ય પદાર્થો નષ્ટ કરવામાં આવ્યા હતા.

કોલ્હાપુરમાં ગોળ બનાવવાના કેન્દ્ર પર FDAની ટીમે દરોડો પાડ્યો હતો. તપાસ દરમિયાન સ્થળ પરથી 950 કિલો ગોળ અને ખાંડનો જથ્થો જપ્ત કરવામાં આવ્યો હતો. ઉત્પાદન અને સંગ્રહ દરમિયાન સ્વચ્છતા તથા ખાદ્ય સુરક્ષાના નિયમોનું પાલન થાય છે કે નહીં તે અંગે પણ તપાસ હાથ ધરવામાં આવી હતી.

પાલઘર અને ઠાણે વિસ્તારમાં પણ પનીરના જથ્થા સામે FDA દ્વારા કાર્યવાહી કરવામાં આવી છે. બીજી તરફ, નાંદગાંવમાં અસ્વચ્છ સ્થિતિમાં સંગ્રહ કરાયેલું 196 લિટર દૂધ જપ્ત કરવામાં આવ્યું હતું. ખાદ્યપદાર્થોનું યોગ્ય રીતે સંગ્રહ અને હેન્ડલિંગ ન થતું હોવાના કિસ્સામાં FDA દ્વારા નિયમ મુજબ કાર્યવાહી કરવામાં આવી રહી છે.

મહારાષ્ટ્રમાં પ્રતિબંધિત પાન મસાલા અને તમાકુના વેચાણ સામે પણ FDAએ તવાઈ બોલાવી છે. કોંકણ, પુણે, નાશિક અને નાગપુર સહિતના વિવિધ વિસ્તારોમાં પ્રતિબંધિત ખાદ્યપદાર્થોનો જથ્થો જપ્ત કરવામાં આવ્યો છે. કેટલાક કિસ્સાઓમાં FIR નોંધવાની સાથે ધરપકડની કાર્યવાહી પણ કરવામાં આવી હોવાનું સામે આવ્યું છે.

FDAની આ સમગ્ર કાર્યવાહીનો મુખ્ય ઉદ્દેશ રાજ્યમાં ખાદ્યપદાર્થોની ગુણવત્તા જાળવવા અને લોકોના આરોગ્ય સાથે ચેડાં કરનારા વેપારીઓ તથા સંસ્થાઓ સામે કડક કાર્યવાહી કરવાનો છે. અન્ન સુરક્ષાના નિયમોનું ઉલ્લંઘન કરનારાઓ સામે આગળ પણ આવી તપાસ અને કાર્યવાહી ચાલુ રાખવામાં આવશે તેવો સંદેશ આ મેગા ડ્રાઇવથી આપવામાં આવ્યો છે.

‘મેં ક્યારેય વિચાર્યું ન હતું કે આવો દિવસ આવશે’ – સૌર ઉર્જામાં ભારતની પ્રગતિથી ચીન સ્તબ્ધ