Tips & Tricks: આ 2 સરળ રીતોથી ઘરે જ બનાવો શુદ્ધ એલોવેરા જેલ, બજારમાંથી લાવવાની નહીં પડે જરૂર
બજારમાં મળતા કેમિકલયુક્ત એલોવેરા જેલને બદલે તમે ઘરે જ કુદરતી રીતે શુદ્ધ જેલ બનાવીને સ્ટોર કરી શકો છો. ત્વચા અને વાળ માટે ફાયદાકારક આ જેલ બનાવવાની 2 સરળ રીતો અને લાંબા સમય સુધી સાચવવાની ટિપ્સ અહીં જાણો.
દર વખતે બજારમાંથી એલોવેરા જેલ ખરીદો છો, તો આ વખતે તમે તેને ઘરે જ તૈયાર કરી શકો છો. માર્કેટમાં મળતા એલોવેરા જેલમાં કેમિકલ પ્રિઝર્વેટિવ્સનો ઉપયોગ થયેલો હોઈ શકે છે. આવા સંજોગોમાં એલોવેરાના પાંદડામાંથી જેલ કાઢીને સ્ટોર કરી શકાય છે, જેથી તમે ગમે ત્યારે તેનો ઉપયોગ કરી શકો.
એલોવેરા જેલ ત્વચા, વાળ અને એકંદર સ્વાસ્થ્ય માટે ખૂબ જ ફાયદાકારક માનવામાં આવે છે. આ જ કારણ છે કે મોટાભાગના લોકો તેનો ઉપયોગ કરે છે. તેમાં વિટામિન્સ, એન્ટીઑકિસડન્ટ અને એન્ટી-બેક્ટેરિયલ ગુણધર્મો રહેલા છે. તે ત્વચામાં ભેજ (મોઇશ્ચર) જાળવી રાખવામાં મદદ કરે છે. ઘણા લોકો તેનો નિયમિત ઉપયોગ પણ કરે છે. સામાન્ય રીતે લોકો તેને બજારમાંથી ખરીદતા હોય છે, જોકે તેને લાંબા સમય સુધી સુરક્ષિત રાખવા માટે કેમિકલ્સનો ઉપયોગ કરવામાં આવતો હોય છે.
બજારમાં મળતા એલોવેરા જેલમાં પ્રિઝર્વેટિવ્સ, આર્ટિફિશિયલ રંગ અને સિન્થેટિક સુગંધ જેવા રસાયણો હોઈ શકે છે. તેથી ઘરે જ શુદ્ધ એલોવેરા જેલ બનાવી શકાય છે, જેનો ઉપયોગ સ્કીન કેર અને વાળ માટે થઈ શકે છે. કુદરતી રીતે છોડમાંથી કાઢવામાં આવેલું એલોવેરા જેલ સામાન્ય રીતે ઓછા સમય સુધી જ સારું રહે છે, પરંતુ અહીં દર્શાવેલી પદ્ધતિની મદદથી તેને લાંબા સમય સુધી તાજું રાખવામાં મદદ મળશે.
એલોવેરા જેલ બનાવવાની પહેલી રીત:
આ જેલ બનાવવા માટે એલોવેરાના તાજા પાંદડાં તોડી લો. હવે તેના નીચેના ભાગને છરીની મદદથી કાપી લો. ત્યારબાદ એક બાઉલમાં પાણી ભરીને એલોવેરાના પાંદડાંને કાપેલા ભાગ તરફથી તેમાં ડૂબાડીને રાખો. તેને આખી રાત પાણીમાં રહેવા દો, જેથી પાંદડામાંથી નીકળતો પીળો પદાર્થ (જેને એલોવેરા લેટેક્સ કહેવામાં આવે છે) તે સંપૂર્ણપણે બહાર નીકળી જાય. જો તમે સામાન્ય રીતે પણ એલોવેરાનો ઉપયોગ કરતા હોવ, તો પાંદડાને કાપીને થોડીવાર ઊભું રાખવું જોઈએ, જેથી પીળો રસ બહાર નીકળી જાય.
હવે પાંદડાંને બહાર કાઢીને તેની બંને કિનારીઓ કાપી લો. ત્યારબાદ ઉપરનું લીલું પડ ઉતારી લો જેથી જેલ કાઢવામાં સરળતા રહે. હવે ચમચીની મદદથી જેલને બાઉલમાં સારી રીતે કાઢી અલગ કરી લો. મેશરની મદદથી તેને બરાબર મેશ કરી લો. ત્યારબાદ એક સુતરાઉ કપડું લઈને જેલને સારી રીતે ગાળી લો, જેથી તે એકદમ સ્મૂથ બની જાય. હવે થોડો ઝેન્થન ગમ (Xanthan Gum) લો અને તેમાં 1 ચમચી એલોવેરા જેલ ઉમેરીને બરાબર મિક્સ કરી લો. આ મિશ્રણને ઢાંકીને આશરે અડધો કલાક રહેવા દો. હવે નેચરલ પ્રિઝર્વેટિવ જીયોગાર્ડ ઇટીસી (Geogard ECT) લો અને તેને એલોવેરા જેલમાં સરખી રીતે ભેળવી દો. ત્યારબાદ તેમાં ઝેન્થન ગમનું મિશ્રણ ઉમેરીને યોગ્ય રીતે હલાવી લો. બાઉલને ઢાંકીને લગભગ 3 થી 4 કલાક રાખી મૂકો જેથી જેલ ઘટ્ટ થઈ જાય. આ રીતે શુદ્ધ એલોવેરા જેલ તૈયાર થઈ જશે. તેને સ્ટોર કરવા માટે તમે એરટાઇટ કાચના કન્ટેનરનો ઉપયોગ કરી શકો છો. આ જેલનો 6 મહિના સુધી ઉપયોગ કરી શકાય છે.
એલોવેરા જેલ બનાવવાની બીજી રીત:
એલોવેરા જેલ બનાવવા માટે તેના પલ્પને મિક્સર જારમાં નાખીને ક્રશ કરી લો. તેમાં ગુલાબજળ અને વિટામિન E કેપ્સ્યુલનું ઓઇલ ઉમેરો. આ સામગ્રીને સારી રીતે મિક્સ કરી લો જેથી એક સ્મૂથ જેલ તૈયાર થઈ જશે. હવે આ જેલને એરટાઇટ કન્ટેનરમાં ભરીને ફ્રિજમાં મૂકી દો. આ એલોવેરા જેલનો ઉપયોગ તમે આશરે 3 થી 4 અઠવાડિયા સુધી કરી શકો છો.
જુઓ Video
નોંધ:
આ સમાચાર સોશિયલ મીડિયા પર વાયરલ થયેલા વીડિયો આધારે તૈયાર કરવામાં આવ્યા છે. સમાચારમાં કરવામાં આવેલા દાવાઓની સ્વતંત્ર રીતે TV9 ગુજરાતી દ્વારા પુષ્ટિ કરવામાં આવી નથી.
ટ્રેનમાં દાળમાંથી નીકળ્યો લોખંડનો ટુકડો: અડધું જમ્યા પછી મુસાફરને થઈ જાણ, IRCTC એ કેટરરને ફટકાર્યો ભારે દંડ
