Daulat Ki Chat: દિલ્હીની ફેમસ દોલત કી ચાટ હવે ઘરે બનાવો, જાણો ફોમ જેવી આ મીઠાઈની સરળ રેસિપી

ઓલ્ડ દિલ્હીની દૌલત કી ચાટ તેના હળવા, ફોમ જેવા ટેક્સચર માટે જાણીતી છે. દૂધ, મલાઈ, કેસર અને ડ્રાયફ્રૂટ્સથી તૈયાર થતી આ ખાસ મીઠાઈ ઘરે કેવી રીતે બનાવવી? જાણો સ્ટેપ બાય સ્ટેપ રીત.

Daulat Ki Chaat Recipe Image Credit source: AI Generated

Nishat | Updated on: Sep 03, 2026 | 8:52 AM

દિલ્હી તેની મસાલેદાર ચાટ, પરાઠા અને વિવિધ સ્ટ્રીટ ફૂડ માટે જાણીતી છે. પરંતુ આ જ શહેરમાં એક એવી મીઠાઈ પણ મળે છે, જેનું નામ સાંભળીને પહેલીવાર અનેક લોકોને લાગે કે તે કોઈ ચાટ હશે. વાત થઈ રહી છે દૌલત કી ચાટની. નામમાં ‘ચાટ’ હોવા છતાં આ વાનગીનો સ્વાદ સંપૂર્ણપણે મીઠો (સ્વીટ) હોય છે.

દૌલત કી ચાટને તેની અત્યંત હળવી અને ફીણ જેવી બનાવટ માટે ઓળખવામાં આવે છે. મોઢામાં મુક્ત જ તેનો નરમ ટેક્સચર ઝડપથી ઓગળવા લાગે છે. દૂધ અને મલાઈ આધારિત આ ડેઝર્ટને કેસર તથા ડ્રાયફ્રૂટ્સથી સજાવવામાં આવે છે, જેના કારણે તેનો સ્વાદ અને દેખાવ બંને ખાસ બની જાય છે.

રસપ્રદ વાત એ છે કે આ દિલ્હીની લોકપ્રિય મીઠાઈનો સ્વાદ લેવા માટે દિલ્હી જવું જરૂરી નથી. થોડા પ્રયત્નો અને યોગ્ય રીત અપનાવીને તેને ઘરે પણ તૈયાર કરી શકાય છે.

દૌલત કી ચાટ માટે જરૂરી સામગ્રી

આ મીઠાઈ બનાવવા માટે મુખ્ય સામગ્રી તરીકે ફુલ-ફેટ દૂધ અને મલાઈની જરૂર પડે છે. તેની સાથે ક્રીમ ઑફ ટાર્ટર, કેસર અને ખાંડનો ઉપયોગ થાય છે. ગાર્નિશ માટે માવો, પિસ્તા, પીનટ ચિક્કી અને ડ્રાય ગુલાબની પાંખડીઓ લઈ શકાય છે.

આ રેસિપીમાં ફુલ-ફેટ દૂધનો ઉપયોગ કરવો મહત્વપૂર્ણ છે, કારણ કે મીઠાઈનું આખું ટેક્સચર દૂધના ફોમ પર આધારિત છે.

બનાવવાની શરૂઆત દૂધથી કરો

સૌપ્રથમ દૂધને એક મોટા વાસણમાં ગરમ કરો.
દૂધ ગરમ કરતી વખતે તેને વચ્ચે-વચ્ચે હલાવતા રહો, જેથી તે વાસણના તળિયે ચોંટે નહીં.
દૂધ સારી રીતે ગરમ થઈ જાય પછી ગેસ બંધ કરી તેને ઠંડુ થવા દો.
દૂધનું તાપમાન સામાન્ય થઈ જાય પછી તેમાં મલાઈ અને ક્રીમ ઑફ ટાર્ટર ઉમેરો.
આ મિશ્રણને સારી રીતે ફેંટવું જરૂરી છે. ત્યારબાદ તેને ઢાંકીને ઠંડુ થવા માટે ફ્રિજમાં રાખી દો.
અહીં એક વાતનું ખાસ ધ્યાન રાખવું જોઈએ કે મિશ્રણ પૂરતું ઠંડુ હોવું જોઈએ.
દૌલત કી ચાટનું ખાસ ફોમ તૈયાર કરવામાં ઠંડક મહત્વની ભૂમિકા ભજવે છે.

ફોમ કેવી રીતે તૈયાર કરશો?

આગલા દિવસે ઠંડા થયેલા મિશ્રણને બહાર કાઢો.
એક પહોળા વાસણમાં બરફ મૂકી તેની ઉપર દૂધવાળું વાસણ રાખો.
હવે હેન્ડ બ્લેન્ડરની મદદથી મિશ્રણને ફેંટવાનું શરૂ કરો.
ધીમે-ધીમે દૂધની સપાટી પર હળવું ફોમ બનવા લાગશે.
આ ફોમને ચમચીની મદદથી અલગ વાસણમાં કાઢતા જાઓ.
મિશ્રણને સતત ફેંટતા રહો અને જે ફોમ તૈયાર થાય તેને અલગ કરતા જાઓ.
દૌલત કી ચાટ બનાવતી વખતે અહીં ધીરજ રાખવી ખૂબ જરૂરી છે.
ફોમ ઝડપથી તૈયાર ન થાય તો બ્લેન્ડિંગની પ્રક્રિયા થોડો વધુ સમય ચાલુ રાખવી પડી શકે છે.

કેસરથી આપો શાહી ટચ

હવે કેસરને થોડા પાણીમાં પલાળી રાખો.
તૈયાર થયેલા ફોમના એક ભાગમાં કેસરનું પાણી ઉમેરો અને હળવેથી મિક્સ કરો.
આથી ફોમમાં સુંદર પીળો રંગ અને કેસરની સુગંધ આવશે.
તમારી પાસે હવે સાદો સફેદ ફોમ અને કેસરવાળો ફોમ એમ બે પ્રકારનું મિશ્રણ તૈયાર થઈ શકે છે.

ગાર્નિશિંગથી વધશે સ્વાદ

સર્વિંગ માટે એક સુંદર બાઉલ પસંદ કરો.
તેમાં સૌપ્રથમ સફેદ ફોમ મૂકો અને ત્યારબાદ તેની ઉપર કેસરવાળો ફોમ ઉમેરો.
હવે ઉપરથી પીસેલી ખાંડ છાંટો.
ત્યારબાદ માવો અને બારીક સમારેલા પિસ્તા ઉમેરો.
થોડું કૂટેલું પીનટ ચિક્કી નાખવાથી મીઠાઈમાં ક્રિસ્પી ટેક્સચર પણ ઉમેરી શકાય છે.
છેલ્લે ડ્રાય ગુલાબની પાંખડીઓ અને કેસરના થોડા તારથી તેને સજાવો.
જો તમે તેને વધુ શાહી દેખાવ આપવા માંગતા હો તો ખાદ્ય ચાંદીનો વરખ પણ લગાવી શકો છો.

દૌલત કી ચાટ બનાવતી વખતે આ વાતો યાદ રાખો

આ મીઠાઈનું સૌથી મહત્વનું પાસું તેનું ફોમવાળું ટેક્સચર છે. તેથી દૂધની પસંદગીથી લઈને તેને ઠંડુ રાખવા સુધીની દરેક પ્રક્રિયા ધ્યાનપૂર્વક કરવી જોઈએ.

ફુલ-ફેટ દૂધનો ઉપયોગ કરવો, મિશ્રણને સારી રીતે ઠંડુ કરવું અને બ્લેન્ડિંગ દરમિયાન ઉતાવળ ન કરવી, આ બાબતો ખાસ ધ્યાનમાં રાખો. તૈયાર ફોમને લાંબા સમય સુધી રૂમ ટેમ્પરેચર પર રાખવાને બદલે ગાર્નિશ કર્યા પછી તરત સર્વ કરશો તો તેનો નાજુક ટેક્સચર વધુ સારી રીતે માણી શકાશે.

ઘરે જ માણો ઓલ્ડ દિલ્હીની મીઠાઈનો સ્વાદ

દૌલત કી ચાટની ખાસિયત એ છે કે સામાન્ય સામગ્રીમાંથી પણ કંઈક અલગ પ્રકારની ડેઝર્ટ તૈયાર કરી શકાય છે. જો તમને પરંપરાગત ભારતીય મીઠાઈઓથી કંઈક જુદું અજમાવવું હોય તો આ રેસિપી સારો વિકલ્પ બની શકે છે. ઠંડુ ફોમ, કેસરની સુગંધ, માવાનો સ્વાદ અને પિસ્તા-ગુલાબની સજાવટ તેને ખાસ બનાવે છે.

ઓલ્ડ દિલ્હીની ગલીઓમાં મળતી આ લોકપ્રિય મીઠાઈનો અનુભવ હવે ઘરે પણ કરી શકાય છે. જોકે તેની સૌથી મોટી ચાવી છે ઠંડક, યોગ્ય ફેટવાળું દૂધ અને ફોમ તૈયાર કરતી વખતે ધીરજ. આ ત્રણ બાબતોનું ધ્યાન રાખશો તો ઘરે દૌલત કી ચાટ બનાવવાનો પ્રયાસ વધુ સફળ બની શકે છે.