PM Modi in Surat : વડાપ્રધાન નરેન્દ્ર મોદીએ સુરતને આપી કરોડોના વિકાસકામોની ભેટ, ખેતી બચાવવ અને કેમિકલ ફ્રી ખેતી કરવા PM મોદીની હાકલ

વડાપ્રધાન નરેન્દ્ર મોદીએ સુરતની મુલાકાત દરમિયાન ગુજરાતને વિકાસની વધુ એક મોટી ભેટ આપી છે. સુરતના ઇન્ડોર સ્ટેડિયમ ખાતે આયોજિત કાર્યક્રમમાં તેમણે અંદાજે રૂ. 18,800 કરોડના વિવિધ વિકાસ પ્રોજેક્ટ્સનું લોકાર્પણ અને ખાતમૂહૂર્ત કર્યું. આ પ્રોજેક્ટ્સ રાજ્યના ઈન્ફ્રાસ્ટ્રક્ચર, આરોગ્ય, ઊર્જા અને કનેક્ટિવિટી ક્ષેત્રે મહત્વપૂર્ણ પરિવર્તન લાવશે તેવી અપેક્ષા વ્યક્ત કરવામાં આવી રહી છે.

કાર્યક્રમને સંબોધતા વડાપ્રધાન મોદીએ જણાવ્યું હતું કે ગુજરાત દેશના વિકાસમાં સતત આગેવાની કરી રહ્યું છે અને નવા પ્રોજેક્ટ્સ રાજ્યની આર્થિક પ્રગતિને વધુ મજબૂત બનાવશે. મોટી સંખ્યામાં ઉપસ્થિત લોકોએ વડાપ્રધાનનું ઉષ્માભેર સ્વાગત કર્યું હતું.

ગુજરાત-મહારાષ્ટ્ર વચ્ચે કનેક્ટિવિટી વધુ મજબૂત બનશે

વડાપ્રધાન મોદીએ વડોદરા-મુંબઈ એક્સપ્રેસવેના પેકેજ VI અને VII નું લોકાર્પણ કર્યું. આ પ્રોજેક્ટ્સ પૂર્ણ થતાં ગુજરાત અને મહારાષ્ટ્ર વચ્ચેની મુસાફરી વધુ ઝડપી અને સુવિધાજનક બનશે. સાથે જ વેપાર, ઉદ્યોગ અને લોજિસ્ટિક્સ ક્ષેત્રને પણ મોટો લાભ મળશે.

આ ઉપરાંત, NH-56 પરના મહત્વપૂર્ણ માર્ગોને ફોર-લેન બનાવવા માટેના પ્રોજેક્ટ્સનો પણ શિલાન્યાસ કરવામાં આવ્યો. આ માર્ગો સ્ટેચ્યુ ઓફ યુનિટી સુધીની કનેક્ટિવિટીને વધુ સરળ અને ઝડપી બનાવશે, જેના કારણે પ્રવાસન ક્ષેત્રને પણ વેગ મળશે.

સુરતને મળી 200 બેડની આધુનિક ESIC હોસ્પિટલ

આરોગ્ય ક્ષેત્રે સુરત માટે આજે મહત્વપૂર્ણ દિવસ રહ્યો. વડાપ્રધાનના હસ્તે 200 બેડની અત્યાધુનિક ESIC હોસ્પિટલનું ઉદ્ઘાટન કરવામાં આવ્યું. હોસ્પિટલમાં સેન્ટ્રલ લેબોરેટરી, ઇમરજન્સી કેર યુનિટ સહિતની અદ્યતન સુવિધાઓ ઉપલબ્ધ કરાવવામાં આવી છે.

આ હોસ્પિટલ શરૂ થતાં આસપાસના વિસ્તારના કામદારો અને સામાન્ય નાગરિકોને ગુણવત્તાસભર આરોગ્ય સેવાઓ સરળતાથી મળી શકશે. આરોગ્ય સુવિધાઓને વધુ મજબૂત બનાવવા માટે આ પ્રોજેક્ટને મહત્વપૂર્ણ ગણવામાં આવી રહ્યો છે.

ઊર્જા ક્ષેત્રે પણ મહત્વપૂર્ણ પહેલ

રાજ્યની વીજ પુરવઠા વ્યવસ્થાને વધુ મજબૂત બનાવવા માટે વીજ નિકાસ ક્ષમતા વધારતા વિવિધ પ્રોજેક્ટ્સનું પણ લોકાર્પણ કરવામાં આવ્યું. આ પ્રકલ્પો દ્વારા ભવિષ્યમાં ઊર્જાની વધતી માંગને પહોંચી વળવામાં મદદ મળશે.

વડાપ્રધાન મોદીએ જણાવ્યું કે આ તમામ વિકાસકાર્યો ગુજરાતને નવી ઊંચાઈઓ સુધી પહોંચાડશે અને રાજ્યને દેશના વિકાસના એન્જિન તરીકે વધુ મજબૂત બનાવશે.

“સુરત માત્ર શહેર નહીં, એક સ્પિરિટ છે” : PM મોદી

જનસભાને સંબોધતા વડાપ્રધાન મોદીએ સુરતની વિશેષતાઓનો ઉલ્લેખ કરતાં કહ્યું કે, “સુરત માત્ર એક શહેર નથી, સુરત એક સ્પિરિટ છે.” તેમણે વિશ્વ પર્યાવરણ દિવસ નિમિત્તે મોટી સંખ્યામાં લોકોએ પર્યાવરણ જાગૃતિ માટે પોસ્ટર અભિયાનમાં ભાગ લીધો તે બદલ અભિનંદન પાઠવ્યા.

તેમણે પર્યાવરણ સંરક્ષણ અને કુદરતી ખેતી પર ભાર મૂકતા ખેડૂતોને કેમિકલ ફ્રી ખેતી અપનાવવાની અપીલ કરી. વડાપ્રધાને કહ્યું કે જમીનની ફળદ્રુપતા અને આગામી પેઢીઓના સ્વાસ્થ્ય માટે કુદરતી ખેતી અત્યંત જરૂરી છે. “ખેતી બચાવો અને કેમિકલ મુક્ત ખેતી તરફ આગળ વધો,” એમ તેમણે જણાવ્યું.

સ્થાનિક સ્વરાજ્યની ચૂંટણીમાં ભાજપના વિજયનો ઉલ્લેખ

વડાપ્રધાન મોદીએ તાજેતરમાં યોજાયેલી સ્થાનિક સ્વરાજ્યની ચૂંટણીમાં ભાજપને મળેલા વિજય અંગે ગુજરાતની જનતાનો આભાર વ્યક્ત કર્યો. તેમણે જણાવ્યું કે છેલ્લા અઢી દાયકાથી ગુજરાતની જનતા ભાજપ પર સતત વિશ્વાસ વ્યક્ત કરી રહી છે અને સમય જતાં આ સમર્થન વધુ મજબૂત બનતું ગયું છે.

તેમણે કહ્યું કે, “1987માં રાજકારણમાં પ્રવેશ કર્યા બાદથી લઈને આજ સુધી ભાજપને સતત જનસમર્થન મળતું રહ્યું છે. લોકશાહીમાં કોઈ પણ પક્ષને આટલા લાંબા સમય સુધી જનસેવાનો અવસર મળવો એ ખૂબ મોટી બાબત છે.”

વડાપ્રધાન મોદીની આ મુલાકાત દરમિયાન શરૂ કરાયેલા વિકાસ પ્રોજેક્ટ્સ આગામી વર્ષોમાં ગુજરાતના ઈન્ફ્રાસ્ટ્રક્ચર, આરોગ્ય, ઊર્જા અને પરિવહન ક્ષેત્રને નવી દિશા આપશે તેવી અપેક્ષા વ્યક્ત કરવામાં આવી રહી છે.

વિકાસની ભેટ સાથે સુરત પહોંચ્યા PM મોદી, “મેક ઇન ઇન્ડિયા” અને પર્યાવરણ સંરક્ષણ પર ભાર, સાંભળો હર્ષ સંઘવીએ શું કહ્યું?