યુએસ ફર્સ્ટ લેડી જીલ બાઈડેન રશિયાની ‘વિક્ટરી ડે પરેડ’ પૂર્વે નોટિસ વિના યુક્રેન પહોંચ્યા, રાષ્ટ્રપતિ ઝેલેન્સકીની પત્નીને મળ્યા

રશિયા સાથે ચાલી રહેલા યુદ્ધ (Russia Ukraine War) વચ્ચે અમેરિકાની ફર્સ્ટ લેડી અને રાષ્ટ્રપતિ જો બાઈડેનની પત્ની જીલ બાઈડેન (Jill Biden) યુક્રેન પહોંચી ગઈ છે. વ્હાઇટ હાઉસે આ જાણકારી આપી છે. જીલ બાઈડેનની મુલાકાત અંગેની કોઈ માહિતી અગાઉ શેયર કરવામાં આવી ન હતી. તે કોઈપણ માહિતી વિના યુક્રેન પહોંચી ગઈ છે. અહીં આવીને તેઓ તેમના યુક્રેનિયન સમકક્ષ ઓલેના ઝેલેન્સકીને મળ્યા. “મેં વિચાર્યું કે યુક્રેનિયન નાગરિકોને બતાવવું જરૂરી છે કે આ યુદ્ધ બંધ કરવું પડશે,” તેમણે કહ્યું. આ યુદ્ધ ઘાતકી બની ગયું છે. અમેરિકાના લોકો યુક્રેનના લોકો સાથે ઉભા છે.

અગાઉ, યુએસ ફર્સ્ટ લેડીએ સ્લોવાકિયામાં મધર્સ ડેની ઉજવણી કરી હતી અને યુદ્ધથી વિસ્થાપિત યુક્રેનિયન માતાઓ સાથે વાતચીત કરી હતી. જીલે તેને ખાતરી આપી કે અમેરિકાના નાગરિકો દિલથી તેની સાથે છે. અમેરિકાની ફર્સ્ટ લેડીએ ઓલેના ઝેલેન્સકીને કહ્યું, ‘મારે મધર્સ ડે પર જ આવવાનું હતું. મને લાગ્યું કે યુક્રેનિયન લોકોને બતાવવું જરૂરી છે કે આ યુદ્ધ હવે બંધ કરવું પડશે.’ જીલ અને ઓલેના ઝેલેન્સકી ​​બંને સ્લોવાકિયા સરહદ નજીક ગામની શાળામાં મળ્યા હતા.

ઓલેના ઝેલેન્સકીએ જીલનો આભાર માને છે

ઓલેના ઝેલેન્સકીએ અમેરિકાની ફર્સ્ટ લેડીને કહ્યું, ‘સૌથી પહેલા હું તમારો આભાર માનું છું કે તમે આ યુદ્ધની વચ્ચે અહીં આવ્યા છો. કારણ કે અમે સમજીએ છીએ કે યુનાઈટેડ સ્ટેટ્સની પ્રથમ મહિલા માટે યુદ્ધ દરમિયાન અહીં આવવું કેટલું મુશ્કેલ બન્યું હશે. તે પણ એવા સમયે જ્યારે સતત સૈન્ય કાર્યવાહી થઈ રહી છે. એર સાયરન દરરોજ વાગે છે. આજે પણ તે વાગ્યો.’ તેણે કહ્યું, ‘તમારો ટેકો અમે સમજીએ છીએ. અમે યુએસ પ્રેસિડેન્ટના નેતૃત્વને પણ જાણીએ છીએ. નોંધનીય છે કે આ પહેલીવાર છે જ્યારે ઓલેના ઝેલેન્સકી જાહેરમાં જોવા મળી છે. તે પણ એવા સમયે જ્યારે યુક્રેન અને રશિયા વચ્ચે ભીષણ યુદ્ધની સ્થિતી ચાલી રહી છે.