PM મોદી સ્વીડન, આઈસલેન્ડ-નોર્વેના વડાપ્રધાનોને મળ્યા, જળવાયુ પરિવર્તન, ઉર્જા અને સંરક્ષણ સંબંધિત અનેક મુદ્દાઓ પર વાત કરી

વડાપ્રધાન નરેન્દ્ર મોદી  (Narendra Modi) હાલમાં ત્રણ દિવસીય યુરોપના પ્રવાસે છે. આજે તેમના પ્રવાસનો છેલ્લો દિવસ છે. ફ્રાન્સની રાજધાની પેરિસ જતા પહેલા પીએમ મોદી ડેન્માર્ક, ફિનલેન્ડ, નોર્વે, સ્વીડન અને આઇસલેન્ડના વડાપ્રધાનોને મળ્યા હતા અને ડેન્માર્કની (Denmark) રાજધાની કોપનહેગનમાં બીજી ભારત-નોર્ડિક સમિટમાં હાજરી આપી હતી. આ કોન્ફરન્સમાં વડાપ્રધાન મોદીએ નોર્ડિક દેશોમાંથી ક્લાઈમેટ ચેન્જ, રિન્યુએબલ એનર્જી અને ઈનોવેશન અને ટેકનોલોજીના ક્ષેત્રોને મજબૂત કરવા પર ભાર મૂક્યો હતો.

આ ખાસ અવસર પર વડાપ્રધાન મોદીએ નોર્વેના વડાપ્રધાન જોનાસ ગહર સ્ટોર સાથે મુલાકાત કરી હતી. બંને દેશોના નેતાઓએ એકબીજાનું ઉષ્માભર્યું સ્વાગત કર્યું. આ ખાસ વાતચીત દરમિયાન બંને નેતાઓએ દ્વિપક્ષીય સંબંધોને વધુ મજબૂત કરવા અને વિકાસ સહયોગ વધારવા અંગે ઊંડાણપૂર્વક ચર્ચા કરી હતી.

આ પછી વડાપ્રધાન નરેન્દ્ર મોદીએ આઈસલેન્ડના વડાપ્રધાન કેટરિન જેકોબ્સડોટિર સાથે મુલાકાત કરી હતી. આ વિશેષ બેઠક દરમિયાન બંને નેતાઓએ આર્ક્ટિક, રિન્યુએબલ એનર્જી, ફિશરીઝ, ફૂડ પ્રોસેસિંગ, ડિજિટલ યુનિવર્સિટી સહિત શિક્ષણ અને સંસ્કૃતિના ક્ષેત્રોમાં આર્થિક સહયોગ પર ભાર મૂક્યો હતો. આ દરમિયાન પીએમ મોદીએ લિંગ સમાનતાને પ્રોત્સાહન આપવા માટે પીએમ જેકબ્સડોટિરની પણ પ્રશંસા કરી હતી. આ સાથે ભારત-ઈએફટીએ વેપાર વાટાઘાટોને ઝડપી બનાવવા પર પણ ભાર મૂકવામાં આવ્યો હતો. આ દરમિયાન બંને દેશો વચ્ચે પ્રાદેશિક અને વૈશ્વિક વિકાસ પર પણ ચર્ચા થઈ હતી.

ફ્રાન્સની રાજધાની પેરિસ જતા પહેલા પીએમ મોદીએ ડેન્માર્કની રાજધાની કોપનહેગનમાં ફિનલેન્ડના વડાપ્રધાન સન્ના મારિન સાથે મુલાકાત કરી હતી. આ દરમિયાન બંને દેશોના નેતાઓએ વેપાર, રોકાણ, ટેક્નોલોજી સહિત અન્ય ક્ષેત્રોમાં ભાગીદારીને વધુ મજબૂત કરવાના માર્ગો પર ચર્ચા કરી. ભારત અને ફિનલેન્ડ વચ્ચે વિકાસલક્ષી ભાગીદારી ઝડપથી વધી રહી છે.

તમને જણાવી દઈએ કે બીજી વખત ભારત-નોર્ડિક સમિટનું આયોજન કરવામાં આવી રહ્યું છે. વર્ષ 2018માં સ્વીડનના સ્ટોકહોમમાં પ્રથમ ભારત-નોર્ડિક સમિટ યોજાઈ હતી. બીજી સમિટ જૂન 2021માં યોજાવાની હતી, પરંતુ કોરોના મહામારીને કારણે તે મોકૂફ રાખવામાં આવી હતી. પીએમ મોદીએ પહેલેથી જ કહ્યું છે કે નોર્ડિક દેશો ટકાઉપણું, પુનઃપ્રાપ્ય ઊર્જા, ડિજિટાઇઝેશન અને ઇનોવેશનમાં ભારતના ભાગીદાર છે. પીએમ મોદીની મુલાકાત યુરોપ સાથે ભારતના સંબંધોનું મહત્વ દર્શાવે છે.